သျှမ်းပြည် တောင်ကြီးမြို့တွင် နာမည်ကြီး တန်ဆောင်တိုင်ပွဲတော် ရောက်ရှိလာတော့မည် ဖြစ်သဖြင့် စစ်ကော်မရှင် လက်အောက်ခံများသည် ရသမျှနည်းဖြင့် ငွေညှစ်တောင်းယူမှုများ ပြုလုပ်နေကြောင်း ဒေသခံပြောပြချက်အရ သိရသည်။

လာမည့် အောက်တိုဘာလ ၂၉ ရက်မှ နိုဝင်ဘာလ ၅ ရက်အထိ တောင်ကြီးမြို့တွင် စစ်ကော်မရှင်က တန်ဆောင်တိုင်ပွဲတော်ကို ဦးဆောင်ကျင်းပမည်ဖြစ်ပြီး၊ ထိုပွဲတော် နာမည်ခံကာ လိုင်စင်မဲ့ ကားများ ဖမ်းဆီးခြင်း၊ ပွဲတော်အတွင်း ဆိုင်ခန်းများကို စျေးနှုန်းအဆမတန် ငှားရမ်းခြင်းတို့ ပြုလုပ်နေသည်။

ယမန်နေ့ (အောက်တိုဘာ ၁၅ ရက်) နေ့လည်ပိုင်းတွင် စစ်ကော်မရှင် လက်အောက်ခံ ယာဉ်ထိန်းရဲများသည် တန်ဆောင်တိုင် ပွဲတော်ရက် အတွင်း ယာဉ်လမ်းကြောင်း ရှင်းလင်းရန် ဟု အကြောင်းပြကာ လိုင်စင်မဲ့ယာဉ်များကို ဖမ်းဆီးစစ်ဆေးနေကြောင်း တောင်ကြီးမြို့ခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

“အခုက ပွဲတော်ရက်မှာ ယာဉ်တွေ ရှင်းလင်းဖို့ ဆိုပြီး လိုင်စင်မဲ့ဆိုင်ကယ်၊ ကားတွေ ဖမ်းနေတာ။ အခုခေတ်က လိုင်စင်လုပ်ဖို့ကလည်း မလွယ်ဘူး။ အရေးမကြီးရင် အပြင်မထွက်ဖို့ပဲ၊ ထွက်ရင်လည်း လိုင်စင်ရှိတဲ့ ယာဉ်နဲ့ သွားဖို့လိုပါတယ်” ဟု တောင်ကြီးဒေသခံ ၎င်းအမျိုးသားက ပြောဆိုသည်။

လက်ရှိတွင် စစ်ကော်မရှင်လက်အောက်ခံ ယာဉ်ထိန်းရဲများသည် အေးသာယာမြို့အထိ ဖမ်းဆီးစစ်ဆေးမှု ပြုလုပ်နေပြီး၊ ဖမ်းဆီးခံထားသည့် လိုင်စင်မဲ့ယာဉ်များမှာ တပိုင်တနိုင် စျေးရောင်းနေသည့် ကားများ၊ အိမ်တွင်းမုန့် လုပ်ငန်းသုံးကားများ အပါအဝင် စုစုပေါင်း ၂၀ စီးခန့် ရှိကြောင်း အေးသာယာဒေသခံ အမျိုးသားတစ်ဉီးက သျှမ်းသံတော်ဆင့်ကို ပြောသည်။

ပြီးခဲ့သည့် ၂၀၂၄ ခုနှစ်တွင်လည်း တောင်ကြီးတန်ဆောင်တိုင် ပွဲတော်ရက်အနီးတွင် ယာဉ်လမ်းကြောင်းများ ရှင်းလင်းစေရန် လိုင်စင်မဲ့ယာဉ်များ ဖမ်းဆီးခဲ့ရာ အစီးရေ ၅၀ ထက်မနည်း ဖမ်းဆီးခံခဲ့ရကြောင်း သိရသည်။

ဆက်လက်ပြီး စစ်ကော်မရှင်လက်အောက်ခံ ဌာနဆိုင်ရာများသည် တောင်ကြီးတန်ဆောင်တိုင် ပွဲတော်အကြို စျေးရောင်းရန်အတွက် ဆိုင်ခန်းအငှားများကို တစ်ခန်းလျှင် ကျပ်သိန်း ၃၀ မှ ကျပ်သိန်း ၄၅ သိန်းထိ ပေါက်စျေးသတ်မှတ်ထားသည်။

သို့သော်လည်း ပွဲကျင်းပရေးကော်မတီနှင့် ပွဲစားများက တစ်ဆင့်ရောင်းချရာတွင် ဆိုင်ခန်းတစ်ခန်းလျှင် ကျပ်ငွေ သိန်း ၇၀ ထိ ဈေးပေါက်နေကြောင်း ပွဲစျေးရောင်းရန် ပြင်ဆင်နေသည့် တောင်ကြီးဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“တကယ်တော့ ဆိုင်ခန်းတစ်ခန်းကို ကျပ်သိန်း ၃၀ ကနေ ၄၅ သိန်းထိပဲ ရှိတယ်။ အခုက ပွဲစားတွေက လေလံဆွဲ ပေါက်စျေးထက် များများပေးနိုင်တဲ့သူက ရတော့ တချို့ဆိုရင် ဆိုင်ခန်းတစ်ခန်းကို ကျပ်သိန်း ၇၀ ထိပေးရတယ်။ တစ်ရက်ကို ကျပ် ၆ သိန်း ရောင်းရမှ မဟုတ်ရင် အိပ်ရေးပျက် အလုပ်ရှုပ်ခံပြီး ကိုယ့်အတွက် ဘာမှ မကျန်ဘူး ဟု တောင်ကြီးဒေသခံ ၎င်းအမျိုးသမီးက ဆိုသည်။

စစ်ကော်မရှင် ဦးဆောင်ကျင်းပမည့် တောင်ကြီး တန်ဆောင်တိုင်ပွဲတော် လာမည့်သူများသည် ပွဲတော်ရက်မတိုင်ခင် ဟိုတယ်ဘွတ်ကင် ကြိုတင်ထားရပြီး လက်ရှိ သျှမ်းသံတော်ဆင့် စုံစမ်းမှုအရ တောင်ကြီးမြို့ရှိ ဟိုတယ်များ အားလုံးနီးပါးတွင် အခန်းကြိုတင် စာရင်းပေးထားခြင်း ပြည့်နေပြီဖြစ်ကြောင်း သိရသည်။

ထို့ပြင် တောင်ကြီးမြို့ရှိ ဟိုတယ်၊ တည်းခိုခန်းတွင် တည်ခိုမည့်သူများသည် ဧည့်စာရင်း တိုင်ကြားရမည်ဖြစ်ပြီး၊ ယမန်နှစ်ကဲ့သို့ ဓာတ်ပုံနှင့်တကွ သက်ဆိုင်ရာ တာဝန်ရှိသူများထံသို့ ပို့ဆောင်ရမည်ဖြစ်ကြောင်း သိရသည်။

စစ်အာဏာသိမ်းပြီးနောက်ပိုင်း တောင်ကြီးမြို့ပေါ်သို့ အနယ်နယ် အရပ်ရပ်မှ ပြည်သူများ ရွှေ့ပြောင်း လာရောက်နေထိုင်ခြင်း၊ အလုပ်လာရောက်လုပ်ကိုင်ခြင်းတို့ ရှိနေပြီး ဒုစရိုက်သမားများလည်း ပေါများသည့် ဒေသတစ်ခု ဖြစ်လာသည်။