ကရင်နီ(ကယား)ပြည်နယ်တွင် မိုးဗြဲဆည်ဖောက်ချ၍ ဘီလူးချောင်းရေလျှံပြီး လွိုင်ကော်မြို့ ရပ်ကွက်အချို့ရှိ နေအိမ်နှင့် စပါးခင်းများ ရေနစ်မြှုပ်သွားကြောင်း သတင်းရရှိသည်။

ပြီးခဲ့သည့် စက်တင်ဘာလ ၂၂ ရက်မှ စ၍ မိုးဗြဲဆည်ကို စစ်ကော်မရှင်လက်အောက်ခံများ ရေဖောက်ချခဲ့ခြင်းကြောင့် ဘီလူးချောင်း ရေလျှံတက်လာကာ လွိုင်ကော်မြို့ မြေနိမ့်ပိုင်း ရပ်ကွက်အတွင်း ရေဝင်ရောက်လာပြီး နီးစပ်ရာသို့ ပြောင်းရွှေ့နေရကြောင်း လွိုင်ကော်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“ရေတက်နေတာ ၁၅ ရက်ကျော်ပြီ၊ ဘီလူးချောင်းဘေးက ရပ်ကွက်တွေ အကုန်ရေတက်တာ။ နှစ်ထပ်အိမ်ဆိုရင် အောက်ထပ်က အကုန်မြုပ်သွားပြီ။ ရေမတက်တဲ့ မိုင်းလုံးရပ်ကွက်ဘက် ပြောင်းရွှေ့ပြီး နေနေကြတယ်။ မိုးကလည်း ဒီရက်ပိုင်း တအားရွာတာ၊ အဲကြောင့် ဘီလူးချောင်းရေ တက်တာလား မသိဘူး”ဟု အဆိုပါ လွိုင်ကော်ဒေသခံ အမျိုးသမီးတစ်ဦးက ပြောဆိုသည်။

လက်ရှိ လွိုင်ကော်မြို့ပေါ် ရွှေတောင်ရပ်ကွက်၊ သျှမ်းပိုင်းရပ်ကွက် စသည်တို့တွင် ရေဝင်နေပြီး စပါးခင်း ဧက ၁၀၀ ထက်မနည်း နစ်မြုပ်သွားကြောင်း ၎င်းအမျိုးသမီးက ဆက်ပြောသည်။

ထိုသို့ လွိုင်ကော်မြို့ မြေနိမ့်ပိုင်းရပ်ကွက်များတွင် ရေဝင်နေသည်မှာ သျှမ်းပြည်တောင်ပိုင်း အင်းလေးဒေသတွင် ဖောင်တော်ဦးဘုရားပွဲ ကျင်းပနေခြင်းကြောင့် ရေတက်မည်ကို စိုးရိမ်ပြီး မိုးဗြဲဆည်ကို ဖောက်ချလိုက်သဖြင့် ယခုကဲ့သို့ လွိုင်ကော်တွင် ရေတက်လာခြင်းဖြစ်ကြောင်း လွိုင်ကော်ဒေသခံ အသက် ၃၀ ဝန်းကျင် အမျိုးသာားတစ်ဦးက ပြောသည်။

“ရွှေတောင်မင်္ဂလာအစပ် အကုန်နေမြုပ်ပဲ၊ လူတွေက စစ်ဒဏ်ရော ရေဒဏ်ရော ခံနေရတာ။ သိရသလောက်တော့ ဖောင်တော်ဦးဘုရားပွဲမှာ ရေတက်မှာစိုးလို့ မိုးဗြဲဆည်ကို ဖောက်ချတာတဲ့။ အဲဒါနဲ့ ဒီဘက်ရပ်ကွက်တွေ အကုန် ရေတက်တော့တာပဲ။ အရင်နှစ်လောက်တော့ မဆိုးလို့ တော်သေးတယ်၊ မနှစ်က ၂၀၂၄ တုန်းကဆိုရင် စက်လှေနဲ့ သွားရတယ်”ဟု အဆိုပါ အမျိုးသားတစ်ဦးက ပြောသည်။

ထို့အပြင် လွိုင်ကော်မြို့ မြေနိမ့်ပိုင်းရပ်ကွက်များတွင် မိုးရွာတိုင်း ရေကြီးရေလျှံ ဖြစ်ပေါ်တတ်သောကြောင့် ရေနှုတ်မြောင်းများကို တူးဖော်ခဲ့ရပြီး ယမန်နှစ် ၂၀၂၄ ခုနှစ်ကဲ့သို့ အခြေအနေ မဆိုးတော့ကြောင်း သိရသည်။

အလားတူ ဩဂုတ်လ နောက်ဆုံးပတ်တွင် လွိုင်ကော်မြို့တွင် ဘီလူးချောင်းရေ ထပ်မံမြင့်တက်လာခြင်းကြောင့် မြေနိမ့်ပိုင်းရှိ ရပ်ကွက်များဖြစ်သည့် နမ့်ကွက်၊ ဒေါနိုးကူး၊ ရွှေတောင် စသည့် ရပ်ကွက်များထဲ ရေဝင်ရောက်လာပြီး ရပ်ကွက်နေ ဒေသခံအချို့ နီးစပ်ရာသို့ ပြောင်းရွှေ့‌နေရကြောင်း ဒေသခံများထံမှ သိရသည်။

ယမန်နှစ် ၂၀၂၄ သြဂုတ်လတွင်လည်း မိုးဗြဲမြို့တွင် အခြေစိုက်ထားသည့် စစ်ကော်မရှင်တပ် ခြေမြန်တပ်ရင်း (ခမရ-၄၂၂) မှ မိုးဗြဲရေကာတာ ရေဖွင့်ချလိုက်ခြင်းကြောင့် မိုးဗြဲမြို့ အပါအဝင် လွိုင်ကော်မြို့၊ ဘီလူးချောင်းနှင့် နီးစပ်သည့် ကျေးရွာတလျှောက် ရေကြီးရေလျှံမှုများ ကြုံတွေ့ခဲ့ရသည်။