ကရင်နီ(ကယား)ပြည်နယ် လွိုင်ကော်မြို့တွင် နေရပ်ပြန်လာကြသော စစ်ဘေးရှောင်များက မိုင်းရှင်းခအဖြစ် ငွေကျပ်တစ်သိန်းကို စစ်ကောင်စီထံ ပေးနေရကြောင်း စုံစမ်းသိရသည်။

စစ်ကောင်စီ ပြန်လည်ထိန်းချုပ်ထားသည့် လွိုင်ကော်မြို့တွင် ယခင်က တိုက်ပွဲများကြောင့် ဒေသခံများ မြို့လုံးကျွတ်ထွက်ပြေးခဲ့ရပြီး ယခု ဇူလိုင်လမှစ၍ ပန်ကန်းရပ်ကွက်၊ ချိကယ်ရပ်ကွက်၊ ရွာတန်းရှည်ရပ်ကွက်နှင့် ဒေါဥခူရပ်ကွက် တို့တွင် စစ်ဘေးရှောင်များကို ပြန်လည်နေထိုင်ခွင့် ပြုလာကြောင်း မြို့ခံများထံမှ သိရသည်။

ထိုသို့ နေရပ်ပြန်လာသော စစ်ဘေးရှောင်များကို စစ်ကောင်စီတပ်သားများက အိမ်ဝိုင်းထဲတွင် မိုင်းရှင်းပေးမည်ဟုဆိုကာ မိုင်းရှင်းခ တောင်းခံနေကြောင်း အသက် ၄၀ ဝန်းကျင် မြို့ခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“အိမ်တွေမှာ မိုင်းထောင်ထားတာတွေ ရှိတယ်ပြောတယ်၊ ပြန်လာတော့ ချက်ချင်း မနေရဲသေးဘူး။ စစ်တပ်က မိုင်းရှင်းပေးခ ငွေတစ်သိန်းတောင်းတယ်၊ သူတို့က ခြံဝန်းလောက်ပဲ ရှင်းသွားပေးတာ။ ဘယ်လိုရှင်းတာလဲတော့ မသိဘူး၊ မြက်တွေ ပေါင်းပင်တွေတော့ စက်နဲ့ ရိတ်သွားပေးတာပဲ။ မနေရဲ နေရဲနဲ့ နေနေရတာပေါ့ သွားစရာမှ မရှိတာ”ဟု အဆိုပါ လွိုင်ကော်မြို့ခံ အမျိုးသမီးက ပြောသည်။

မိမိနေအိမ်သို့ ပြန်လာသော စစ်ရှောင်များသည် နေအိမ်တွင် ပစ္စည်းများ အခိုးခံထားရပြီး ပြတင်းပေါက်နှင့် တံခါးပေါက်များပါ အခိုးခံထားရသောကြောင့် နေအိမ်ပြန်လည်ပြင်ဆင်ရန် ရုန်းကန်ရတော့မည်ဖြစ်ကြောင်း ၎င်းအမျိုးသမီးက ဆက်ပြောသည်။

“ဒုက္ခတွေနဲ့ ပြေးပြီး ဒုက္ခတွေနဲ့ ပြန်လာရတာပါဆို၊ အိမ်မှာက ဘာမှမကျန်တော့ဘူး။ အိမ်ဆို အခွံပဲ ကျန်တာ အကုန်အခိုးခံထားရတာ။ ပြတင်းပေါက် တံခါးပေါက်တွေတောင် အကုန်ဖြုတ်ခိုးသွားတာ။ စားဖို့တောင် အနိုင်နိုင် မိုင်းရှင်းခပေးရ၊ အိမ်ကိုလည်း ပြန်ပြင်ဖို့လိုနဲ့ အရမ်း ဒုက္ခများတယ်”ဟု အသက် ၄၀ ဝန်းကျင် အဆိုပါ အမျိုးသမီးက ထပ်လောင်းပြောသည်။

ထိုသို့ နေရပ်ပြန် နေထိုင်ကြခြင်းကြောင့် ရပ်ကွက်အတွင်း ပြန်လည်စည်ကားလာသော်လည်း လက်နက်ကြီး ပစ်ခတ်သံ ကြားနေရသောကြောင့် ကြောက်စိတ်ဖြင့် နေထိုင်နေရကြောင်း ဒေသခံများထံမှ သိရသည်။

ဆက်လက်ပြီး လွိုင်ကော်မြို့တွင် ကုန်ဈေးနှုန်းများ မြင့်တက်နေကာ ကြက်ဥ တစ်လုံးလျှင် ကျပ်(၅၀၀)၊ ဆန်ကြမ်းတစ်အိမ်လျှင် ငွေကျပ်(၇)သောင်း မှ ကျပ်တစ်သိန်းအထိ ရှိနေပြီး ယခင်က ဝမ်းတီးနို့ဆီ တစ်ထုပ်လျှင် ကျပ်(၅၀)သာ ရှိသော်လည်း ယခုတွင် ငွေကျပ်(၄၀၀)အထိ ရှိနေပြီဖြစ်ကြောင်း အသက် ၃၀ ဝန်းကျင် အမျိုးသမီးက ပြောသည်။

လွိုင်ကော်မြို့အတွင်း စစ်ဘေးရှောင်များ နေရပ်ပြန်လာနေကြသည်မှာ သုံးပုံ နှစ်ပုံခန့် ရှိပြီဖြစ်ပြီး အချို့သော စစ်ဘေးရှောင်များမှာ ကလေးများ ကျောင်းတက်နေသောကြောင့် မပြန်လာနိုင်ကြသေးကြောင်း သိရသည်။

“ပြန်ချင်တာပေါ့၊ ကလေးတွေကလည်း ကျောင်းမပြီးသေးတော့ မပြန်ရသေးဘူး။ ဒီနှစ်နွေရာသီတော့ ပြန်မယ်လုပ်ထားတယ်၊ မပြန်ရတာ ၂ နှစ် ရှိပြီလေ။ ကိုယ့်ရေကိုယ့်မြေဆိုတော့ ဘာနဲ့ပဲ စားရစားရ၊ ဘယ်လိုပဲ နေရ နေရ ပြန်ချင်ပြီ။ အိမ်ကို အရမ်းလွမ်းတာပဲ၊ အိမ်မှာတော့ ပစ္စည်းတွေတော့ မကျန်တော့ဘူးပေါ့”ဟု အဆိုပါ အသက် ၃၀ ဝန်းကျင် အမျိုးသမီးတစ်ဦးက ပြောသည်။

ပြီးခဲ့သည့် ၂၀၂၄ ခုနှစ် ဇွန်လဆန်းပိုင်းတွင် စစ်ကောင်စီတပ်က လွိုင်ကော်မြို့ကို ပြန်လည်ထိန်းချုပ်ခဲ့ပြီး ယခုလက်ရှိ လွိုင်ကော်မြို့ပေါ် ရပ်ကွက်များတွင် စစ်ကောင်စီတပ်များက စစ်ဆေးရေးဂိတ်များ ချထားပြီး လုံခြုံရေးတင်းကြပ်ထားကြောင်း မြို့ခံများထံမှ သိရသည်။