ကရင်နီ(ကယား)ပြည်နယ် လွိုင်ကော်မြို့တွင် ဘီလူးချောင်းရေ မြင့်တက်မှုကြောင့် မြေနိမ့်ပိုင်း ရပ်ကွက်အချို့ ရေဝင်နေကြောင်း သတင်းရရှိသည်။

ပြီးခဲ့သည့် သြဂုတ်လ နောက်ဆုံးပတ်မှ စတင်ကာ လွိုင်ကော်မြို့တွင် ဘီလူးချောင်းရေ ထပ်မံမြင့်တက်လာခြင်းကြောင့် မြေနိမ့်ပိုင်းရှိ ရပ်ကွက်များဖြစ်သည့် နမ့်ကွက်၊ ဒေါနိုးကူး၊ ရွှေတောင် စသည့် ရပ်ကွက်များထဲ ရေဝင်ရောက်လာပြီး ရပ်ကွက်နေ ဒေသခံအချို့ နီးစပ်ရာသို့ ပြောင်းရွှေ့‌နေရကြောင်း လွိုင်ကော်မြို့ ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။

“မနေ့ (သြဂုတ် ၃၁ ရက်) ကလည်း မိုးတွေ ရွာနေတာ။ ရေချောင်းနဲ့ နီးတဲ့ မြေနိမ့်ပိုင်း ရပ်ကွက် ၄ ခု လောက်မှာ ရေတက်နေတယ်၊ တံတားနဲ့ ထိနေပြီ။ တချို့လူတွေကတော့ နီးစပ်ရာတွေ ပြောင်းတယ်။ အိမ်နှစ်ထပ်နဲ့ နေတဲ့လူဆိုရင် အပေါ်ထပ်မှာ နေကြတယ်။ ဘယ်သူမှ တကူးတက လာကူညီတာ မရှိဘူး၊ ကိုယ့်ဟာကိုယ်ပဲ ပြောင်းရွှေ့ကြတာ”ဟု လွိုင်ကော်မြို့ ဒေသခံ အမျိုးသမီးတစ်ဦးက ပြောသည်။

ပြီးခဲ့သည့် သြဂုတ်လ ပထမပတ်မှ စပြီး မိုးဗြဲဆည် ရေလျှံလာသဖြင့် စစ်ကော်မရှင်တပ် ခြေမြန်တပ်ရင်း (ခမရ-၄၂၂) မှ ရေကာတာကို ဖောက်ချလိုက်ခြင်းကြောင့် ဘီလူးချောင်း‌ဘေးရှိ လယ်ဧက ရာနှင့်ချီ နစ်မြှုပ်ပျက်စီးခဲ့သည်။

တောင်တရုတ်ပင်လယ်ပြင်တွင် ဖြစ်ပေါ်ခဲ့သည့် “ကာချီဂီ” တိုင်ဖွန်းမုန်တိုင်းအရှိန်ကြောင့် မြန်မာနိုင်ငံ နေရာအနှံ့အပြားတွင် သြဂုတ်လ ၂၅ ရက်မှ စ၍ မိုးအဆက်မပြတ် ရွာသွန်းခဲ့ပြီး သျှမ်းပြည် တောင်ပိုင်း ညောင်ရွှေမြို့နယ်နှင့် အင်းလေးဒေသတွင် ရေကြီးရေလျှံမှုများ ဖြစ်ပေါ်ခဲ့ကြောင်း သိရသည်။

ပြီးခဲ့သည့် ၂၀၂၄ သြဂုတ်လတွင်လည်း မိုးဗြဲမြို့တွင် အခြေစိုက်ထားသည့် စစ်ကော်မရှင်တပ် ခြေမြန်တပ်ရင်း (ခမရ-၄၂၂) မှ မိုးဗြဲရေကာတာ ရေဖွင့်ချလိုက်ခြင်းကြောင့် မိုးဗြဲမြို့ အပါအဝင် လွိုင်ကော်မြို့၊ ဘီလူးချောင်းနှင့် နီးစပ်သည့် ကျေးရွာတလျှောက် ရေကြီးရေလျှံမှုများ ကြုံတွေ့ခဲ့ရသည်။