သျှမ်းပြည် ကျောက်မဲမြို့ပေါ်ရှိ ဌာနဆိုင်ရာရုံးများနှင့် ကြံ့ခိုင်ရေးပါတီရုံးတန်းလျားများ မီးရှို့ခံရပြီး အကြီးအကျယ် မီးလောင်ကျွမ်းနေကြောင်း စုံစမ်းသိရသည်။
ယနေ့ (စက်တင်ဘာလ ၃၀ ရက်) မွန်းလွဲ ၁ နာရီကျော်မှ စတင်ပြီး တအာင်း(ပလောင်) အမျိုးသားလွတ်မြောက်ရေးတပ်မတော် TNLA လက်လွှတ်ရဖွယ် ရှိနေသည့် ကျောက်မဲမြို့ပေါ်တွင် ဌာနဆိုင်ရာ ရုံးများနှင့် ကားဂိတ်ဖွင့်လှစ်ထားသည့် ကြံ့ခိုင်ရေးပါတီ ရုံးတန်းလျား မီးရှို့ခံရပြီး အကြီးအကျယ် လောင်ကျွမ်းနေကြောင်း ဒေသခံများက ပြောသည်။
“နေ့လယ် ၁ နာရီကျော်က မြို့မရဲစခန်းနဲ့ သစ်တောရုံးဘက် မီးစလောင်တာ၊ အဲ့ဘက်က ပင်လုံလမ်းလည်း ဖြတ်သွားလို့ မရဘူး။ ၃ နာရီလောက်ကျတော့ ကြံ့ခိုင်ရေးရုံး ကားကွင်းဘက်လည်း ထပ်ရှို့ခံရတယ်၊ မီးများတယ် မီးခိုးလိပ်တွေ ထောင်တက်နေတာ။ ရုံးတွေကို လက်နက်ကိုင်ဘက်က မီးလိုက်ရှို့နေတယ်လို့တော့ ပြောနေကြတယ်”ဟု ကျောက်မဲဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
ကျောက်မဲမြို့ပေါ်ရှိ TNLA တပ်ဖွဲ့ဝင်များ ဆုတ်ခွာသွားပြီး ဌာနဆိုင်ရာရုံးများ မီးရှို့ဖျက်ဆီးခံရခြင်းနှင့် ပတ်သက်၍ အတည်ပြုနိုင်ရန် သျှမ်းသံတော်ဆင့်မှ အသေးစိတ် ဆက်လက်စုံစမ်းနေသည်။
လက်ရှိတွင် ကျောက်မဲမြို့ကို မြေပြင်ထိုးစစ်ဆင်နေသည့် စစ်ကော်မရှင်တပ်သည် စစ်ကြောင်းနှစ်ကြောင်းဖြင့် မြို့နှင့် ၃ မိုင်ခန့်သာ ကွာဝေးသည့် ခိုမုန်းကျေးရွာတွင် TNLA ပူးပေါင်းတပ်နှင့် ထိတွေ့တိုက်ပွဲ ပြင်းထန်နေပြီး လေကြောင်းဖြင့်လည်း ဖိအားပေး တိုက်ခိုက်နေကြောင်း ဒေသခံများက ပြောသည်။
ကျောက်မဲမြို့နှင့် သီပေါမြို့သည် လာမည့် ဒီဇင်ဘာလတွင် စစ်ကော်မရှင် ရွေးကောက်ပွဲ ကျင်းပပြုလုပ်မည့် မြို့နယ်စာရင်းထဲတွင် ပါဝင်ထားခြင်းကြောင့် ယင်းမတိုင်မီ ပြန်လည်ထိန်းချုပ်နိုင်ရန် TNLA ကို အပြင်းအထန် ထိုးစစ်ဆင် တိုက်ခိုက်နေသည်။
Leave a Comments