ထိုင်းနိုင်ငံ ချင်းမိုင်မြို့တွင် ဓားခုတ်မှုဖြစ်ပွားပြီးနောက် ဓားခုတ်မှုကျူးလွန်ခဲ့သည် လူငယ်ဂိုဏ်းများကို ထိုင်းရဲတပ်ဖွဲ့များက လိုက်လံရှာဖွေ ဖမ်းဆီးနေကြောင်း Chiang Mai News သတင်းဌာနက ဖော်ပြသည်။

ပြီးခဲ့သည့် စက်တင်ဘာလ ၁၆ ရက်နေ့ ညပိုင်းက ချင်းမိုင်မြို့၊ ဆန်ကမ်ဖိုင်ရပ်ကွက်၊ ၂၄ နာရီဖွင့်သည့် အဝတ်လျှော်ဆိုင်ဘေးရှိ စတိုးဆိုင်ရှေ့တွင် လူငယ်ဂိုဏ်းအဖွဲ့သည် အသက် (၁၄) နှစ်အရွယ် မိန်းကလေးတစ်ဦး အပါအဝင် လူငယ် (၃) ဦးကို ဓားဖြင့်ဝင်ရောက် တိုက်ခိုက်ခဲ့ခြင်း ဖြစ်သည်။

ဓားခုတ်ခံရခြင်းကြောင့် မိန်းကလေးတစ်ဦးသည် လက်ကောက်ဝတ် ပြတ်သွားခဲ့ပြီး ဆေးရုံတွင် ဆေးကုသမှု ခံယူနေရကာ အခြားဒဏ်ရာရရှိသူ အမျိုးသားနှစ်ဦးမှာလည်း ဆေးကုသမှု ခံယူနေရဆဲဖြစ်ကြောင်း သိရသည်။

ထိုကျူးလွန်သူများအားလုံးကို ဖမ်းဆီးနိုင်ရန်အတွက် ယမန်နေ့ (စက်တင်ဘာလ ၁၈ )ရက်က ချင်းမိုင်မြို့၌ ပြုလုပ်သည့် အစည်းအဝေးတွင် လူငယ်ဂိုဏ်းများ၊ အန္တရာယ်ရှိသူများကို လိုက်လံဖမ်းဆီးမှု စစ်ဆင်ရေးကို ချက်ချင်းစတင်ရန် ရဲမှူးချုပ် Kritthaphon Yisakhon ကအမိန့်ပေးလိုက်ကြောင်း သိရသည်။

ထိုသို့ အမိန့်ပေးပြီးနောက် ဘန်ကောက်မြို့သို့ ထွက်ပြေးရန်ကြိုးစားနေသည့် တရားခံ အိုက်မောက်ကို လမ်းပွန်းခရိုင် (Mae Tha) စစ်ဆေးရေးဂိတ်တွင် ဖမ်းဆီးရမိကြောင်း Chiang Mai News သတင်းဌာနတွင် ရေးသားဖော်ပြထားသည်။

ထို့ပြင် ယနေ့ (စက်တင်ဘာလ ၁၉) ရက် ည ၁၁ နာရီခွဲ အချိန်ထိ သံသယရှိသူ အားလုံးကို ဖမ်းဆီးရမိရေး ဆက်လက်ဆောင်ရွက်သွားမည် ဖြစ်ကြောင်း သိရသည်။

ပြီးခဲ့သည့် သြဂုတ် ၂၉ ရက် နံနက် ၃ နာရီခွဲ အချိန်ခန့်တွင်လည်း ချင်းမိုင်မြို့ ချန့်မွဲ့ရပ်ကွက် ဈေးကြီး (ကက်လုံအနီး) တွင် မြန်မာနိုင်ငံသား (သျှမ်းလူငယ်) ၆ ဦးသည် ထိုင်းတက္ကသိုလ် ကျောင်းသားလူငယ်များကို ဓားဖြင့် လိုက်ခုတ်သဖြင့် ၅ ဦးကို ဖမ်းဆီးရမိကြောင်း သိရသည်။