သျှမ်းပြည် ကျောက်မဲမြို့နယ်တွင် စစ်ကော်မရှင်တပ်နှင့် တအာင်း (ပလောင်) အမျိုးသားလွတ်မြောက်ရေး တပ်မတော် (TNLA) တို့အကြား စစ်ရေးတင်းမာနေကြောင်း ဒေသခံများထံမှ စုံစမ်းသိရှိရသည်။

တရုတ်အစိုးရ၏ အစီအစဉ်ဖြင့် ပြီးခဲ့သော ဩဂုတ် ၂၇ ရက်က တရုတ်နိုင်ငံ ယူနန်ပြည်နယ် ကူမင်းမြို့တွင် စစ်ကော်မရှင်နှင့် TNLA တို့အကြား အပစ်ရပ်ရေးအတွက် တွေ့ဆုံဆွေးနွေးခဲ့ရာတွင် မအောင်မြင်ခဲ့သဖြင့် ယခုရက်ပိုင်း၌ ကျောက်မဲမြို့နယ်တွင် စစ်ရေးတင်းမာနေကြောင်း ဒေသခံများက ပြောသည်။

လက်ရှိ ကျောက်မဲမြို့ စခန်းသာကျေးရွာတွင် တအာင်းတပ် TNLA က ရွာခံမှအပ အခြားဒေသမှ လာသည့် သူများအား ကျေးရွာအတွင်းသို့ ဝင်ခွင့်မပြုတော့ကြောင်း ကျောက်မဲမြို့ ဒေသခံအမျိုးသားတစ်ဦးက ပြောသည်။

“အခု စခန်းသာရွာမှာ ဒေသခံကလွဲပြီး ဘယ်သူကိုမှ အဝင်အထွက်မပေးတော့ဘူး။ တာဝန်ရှိတဲ့သူတွေတော့ ဝင်လို့ရပေမယ့် တခြားဘာကိစ္စမှမရှိတဲ့သူတွေတော့ ဝင်လို့မရတော့ဘူး၊ အလည်သွားလို့လည်း မရဘူး။ တိုက်ပွဲက ဘယ်ချိန်ဘယ်လိုစဖြစ်မလဲဆိုတာ မသိနိုင်သေးဘူး။ အခုတံတားတွေလည်း ပြန်ပြင်ပြီးပြီဆိုတော့ ပြည်သူတွေကတော့ ကြိုတင်ရှောင်ထားနေကြပြီ” ဟု ဒေသခံအမျိုးသားတစ်ဦးက ပြောသည်။

ကျောက်မဲမြို့နယ်အတွင်းရှိ စခန်းသာကျေးရွာသည် ကျောက်မဲမြို့ နှင့် (၇) မိုင်သာ ကွာဝေးသည်။

ထို့အပြင် စစ်ကော်မရှင်တပ်နှင့် TNLA တို့အကြား ဆွေးနွေးမှုမအောင်မြင်သောကြောင့် နောင်ချိုမြို့ကဲ့သို့ စစ်ကော်ရှင်တပ်က လေကြောင်းဖြင့်ဖိအာပေး ဗုံးကြဲတိုက်ခိုက်လာမည်ကို ကျောက်မဲမြို့ဒေသခံများက စိုးရိမ်နေကြသည်။

ပြီးခဲ့သည့် ဩဂုတ်လ ၂၀ ရက်နေ့တွင်လည်း ကျောက်မဲမြို့နယ် နောင်ပိန်တိုက်နယ်ကို စစ်ကော်မရှင်တပ်က လေကြောင်းဖြင့် ဗုံးကြဲတိုက်ခိုက်ခဲ့သောကြောင့် ပြည်သူ ၂၀ ကျော်သေဆုံးသွားခဲ့ပြီး ၄၀ ကျော် ထိခိုက်ဒဏ်ရာရရှိသွားခဲ့ကြောင်း သိရသည်။

ယင်းကဲ့သို့ စစ်ရေးတင်းမာနေခြင်းကြောင့် ပြည်သူများ အကြပ်အတည်းဖြစ်လာနိုင်ကြောင်း ကျောက်မဲမြို့ လူမှုကူညီရေးလုပ်နေသည့် အမျိုးသားတစ်ဦးက ပြောသည်။

“အခုလို ဆက်ပြီးတင်းမာနေမယ်ဆိုရင် ပြည်သူတွေကပဲပိုပြီး ဒုက္ခရောက်မယ်။ ကျနော်အနေနဲ့တော့ ဘက်လိုက်တာတော့မဟုတ်ဘူး။ သူတို့သဘောတူညီချက်ကိုရှာပြီးတော့ အရင်ကလိုပဲ ကိုယ်နေရာ၊ သူနေရာပြန်နေရင်လည်း ကောင်းသွားနိုင်တာပဲလေ။ တကယ်လို့ သူတို့ဒီလိုမလုပ်ရင်တော့ ကျနော်တို့ ပြည်သူတွေကတော့ ဒီထက်ပိုပြီး ကြပ်တည်းလာနိုင်တယ်။ အခုလည်း ပြောင်းဖူးချိုးနေတဲ့အချိန်လေ” ဟု ၎င်း က ပြောသည်။

ထိုကြောင့် ကျောက်မဲမြို့တွင် တိုက်ပွဲပြန်လည် ပြင်းထန်လာပါက ပျက်စီးဆုံးရှုံးမှု ပိုများလာနိုင်ပြီး ပြည်သူအတွက် ကယ်ဆယ်ရေးလုပ်ငန်းများအတွက်လည်း လုံလောက်မှုရှိမည်မဟုတ်ကြောင်း အထက်ပါ အမျိုးသားတစ်ဦးက ဆက်ပြောသည်။

“တိုက်ပွဲဆက်ဖြစ်ရင်တော့ ပိုပြီးပျက်စီးမှုတွေများလာမယ်။ ကျောက်မဲတမြို့လုံးအတွက်လည်း လူမှုကယ်ဆယ်ရေး အဖွဲ့က သုံး၊ လေး ဖွဲ့ပဲရှိတယ်။ နောက်တစ်ခုက စားသောက်ကုန်ပစ္စည်းနဲ့ ဆေးဝါးတွေလည်း ဒီဘက်ကိုပေးမလာဘူးဆိုတော့၊ အခုဆေးကုသနေတဲ့ လူနာတွေ ဆက်တိုးလာရင် ဆေးကုသဖို့ ဆေးမလုံလောက်တော့ဘူး” ဟု ၎င်းက ထပ်လောင်းပြောသည်။

တစ်ဖက်တွင်လည်း တအာင်းတပ် TNLA သည် တရုတ်အစိုးရ၏ ဖိအားပေးမှုကို ခံနေရသည့်အပြင် UWSA ထံမှ လက်နက်နှင့် ငွေကြေး ထောက်ပံ့မှုအား မရရှိတော့ပေ။

သျှမ်း-မန္တလေးနယ်စပ် မိုးကုတ်အပါအဝင် ကျောက်မဲ၊ မိုင်းငေါ့၊ သီပေါနှင့် မိုင်းလုံ မြို့နယ်တွင် စစ်ကော်မရှင်တပ်မှ လေကြောင်း၊ လက်နက်ကြီးနှင့် ဒရုန်းတို့ဖြင့် ဗုံးကြဲပစ်ခတ်တိုက်ခိုက်မှုကြောင့် သြဂုတ်လအတွင်း ပြည်သူ (၄၆) ဦး သေဆုံးခဲ့ရကြောင်း TNLA က ယမန်နေ့ စက်တင်ဘာလ ၁ ရက်နေ့တွင် သတင်းထုတ်ပြန်သည်။

ထိုသေဆုံးမှုတွင် သံဃာတော် (၃) ပါး၊ သီလရှင် (၁) ပါး၊ အမျိုးသား (၁၉) ဦး၊ အမျိုးသမီး (၁၈) ဦးနှင့် ကလေး (၅) ဦး ပါဝင်ပြီး စစ်ကော်မရှင်တပ်က ပြည်သူများကို ဦးတည်၍ လေကြောင်းဖြင့် ဗုံးကြဲတိုက်ခိုက်နေခြင်း ဖြစ်ကြောင်း ထုတ်ပြန်ချက်တွင် ရေးသားဖော်ပြထားသည်။

ထို့ပြင် စစ်ကော်မရှင်တပ်၏ လေကြောင်းဗုံးကြဲမှုကြောင့် သံဃာတော် (၆) ပါး၊ သာမဏေ (၆) ပါး၊ အမျိုးသား (၃၁) ဦး၊ အမျိုးသမီး (၁၂) ဦး စုစုပေါင်း လူ (၅၅) ဦးလည်း ထိခိုက်ဒဏ်ရာရရှိသွားခဲ့ကြောင်း ဆိုသည်။