သျှမ်းပြည်တောင်ပိုင်း၊ ပင်လောင်းမြို့ ပေါ်တွင် စစ်ကော်မရှင် လက်အောက်ခံ ယာဉ်ထိန်းရဲများက လိုင်စင်မဲ့ ယာဉ်များကို ထပ်မံဖမ်းဆီးနေကြောင်း သတင်းရရှိသည်။

ပြီးခဲ့သည့် ဩဂုတ်လ (၁၈)ရက်နေ့မှ စပြီး ပင်လောင်းမြို့ပေါ်၌ လိုင်စင်မဲ့ယာဉ်များကို ထပ်မံဖမ်းဆီးလာသောကြောင့် မြို့ပေါ်သို့ ဈေးသုံးသွားသည့် အနီးနားကျေးရွာမှ ပြည်သူများနှင် ကျန်းမာရေးကိစ္စကြောင့် ဆေးခန်းသွာပြမည့်သူများ သွားလာရန် အခက်အခဲ ဖြစ်နေကြောင်း ပင်လောင်းမြို့ မှ အမျိုးသားတစ်ဉီးက သျှမ်းသံတော်ဆင့်ကိုပြောသည်။

“ဖမ်းနေတာ သုံးရက်လောက်ရှိပြီ။ မြို့ထဲဆို ကားတွေဆိုင်ကယ်တွေ ရှင်းလင်းနေတာပဲ။ ပင်လောင်းဈေးနား တဝိုက်တွေမှာ ဖမ်းတယ်။ လမ်းမကြီးမှာဖမ်းတယ်။ ရွာက ဈေးလာသုံး ဆေးခန်းလာပြတဲ့ လူတွေဆို လည်း ဖမ်းမိတာပဲ။ သွားလာရ ခက်တာပေါ့။” ဟု ပင်လောင်းမြို့ခံ အမျိုးသားတစ်ဦးက ပြောသည်။

ထို့အပြင် ပြီးခဲ့သည့် မေလ ဒုတိယပတ် မှစ၍ ဖမ်းဆီးမှုများအနည်းငယ်ရှိခဲ့ရာမှ ယခုရက်ပိုင်းမှ စီမံကိန်းအရ ဖမ်းဆီးမှုများနေကြောင်း ၎င်းက ဆက်ပြောသည်။

ဖမ်းဆီးရမိသည့် အချို့သောယာဉ်များကို ငွေကျပ်(၃သောင်း) တောင်း၍ ပြန်လွှတ်ပေးပြီး တချို့သော ယာဉ်များကို ပုံရိုက်၍ ပြန်လွှတ်ပေးလိုက်ကြောင်း အဆိုပါ အမျိုးသားက ထပ်လောင်းပြောသည်။

“ဒေသခံတွေက အများစုက လိုင်စင်မဲ့ ဆိုင်ကယ်တွေပဲ စီးကြတာ။ လိုင်စင်ဘီးဆို ဈေးက နှစ်ဆ သုံးဆလောက်ရှိတော့ မတတ်နိုင်ဘူးလေ။ ဒီလိုင်စင်မဲ့တွေကို သိမ်းမယ်ဆိုရင် ပြည်သူတွေ ဒုက္ခရောက်မှာပေါ့။ ဖမ်းမိထားတာတွေကိုတော့ တချို့ဟာကို ပုံရိုက်ပြီး ပြန်လွှတ်ပေးတယ်။ တချို့ကိုတော့ ပိုက်ဆံ သုံးသောင်းတောင်းပြီး ပြန်လွှတ်ပေးတယ်။”ဟု ၎င်း အမျိုးသားက ထပ်လောင်းပြောသည်။

ပြီးခဲ့သည့် မေလ ၂ ရက်တွင် စစ်ခေါင်းဆောင် မင်းအောင်လှိုင်မှ လိုင်စင်မဲ့မော်တော်ယာဉ်များနှင့် ဆိုင်ကယ်များကို ထိထိရောက်ရောက် ဖမ်းဆီးအရေးယူရန် ညွှန်ကြားခဲ့ပြီး သျှမ်းပြည်တောင်ပိုင်းရှိ ဟဲဟိုး၊ ညောင်ရွှေ၊ အောင်ပန်း၊ ရပ်စောက်၊ ဟိုပုံး၊ ဆီဆိုင် တို့တွင် ဈေးလာသုံးသည့် ပြည်သူများ၏ ဆိုင်ကယ်၊ ကားများ မ်းဆည်းခံခဲ့ရသည်။

ပြီးခဲ့သည့် ဇွန်လ (၁)ရက်မှ ဇွန်လ(၅)ရက်အတွင်း တောင်ကြီးတွင် လိုင်စင်မဲ့ယာဉ်များ ဖမ်းဆီးခံခဲ့ရသည်မှာ ကားအစီးရေ ၄၀၀ ကျော်နှင့် ဆိုင်ကယ်အစီးရေ ၄၀၀ နီးပါးဖမ်းဆီးခံခဲ့ရကြောင်း သိရသည်။