သျှမ်းပြည် တောင်ကြီးမြို့နှင့် နမ့်စန်မြို့ရှိ စစ်ကောင်စီအသွင်ပြောင်း စစ်ကော်မရှင်က ဌာနဆိုင်ရာဝန်ထမ်းများနှင့် မဘသများကို နေ့စားခပေးကာ သျှမ်းဝတ်စုံ ဝတ်ခိုင်းပြီး TNLA နှင့် MNDAA တို့ကို ဆန့်ကျင်ဆန္ဒပြခိုင်းကြောင်း စုံစမ်းသိရသည်။

ယနေ့ (ဩဂုတ်လ ၁၉ ရက်) နံနက်ပိုင်းတွင် သျှမ်းပြည်တောင်ပိုင်း တောင်ကြီးမြို့နှင့် နမ့်စန်မြို့ရှိ စစ်ကော်မရှင်လက်အောက်ခံ ဌာနဆိုင်ရာ ဝန်ထမ်းများမှ မဘသများနှင့် ဒေသခံများကို နေ့စားခပေးကာ ညီနောင်မဟာမိတ်အဖွဲ့ဝင် TNLA နှင့် MNDAA တို့ကို ဆန့်ကျင်ကြောင်း မြို့ပေါ်တွင် စီတန်းလှည့်လည်ကာ ဆန္ဒပြခိုင်းခဲ့သည်။

တောင်ကြီးမြို့ပေါ်တွင် ယနေ့( နံနက် ၁၁) နာရီမှ စတင်ပြီး ကျောင်းကြီးစု၊ ကံကြီး၊ စိန်ပန်း ရွှေတောင်ရပ်ကွက်နှင့် အေးသာယာမြို့မှ စစ်တပ်ထောက်ခံသူများ၊ မဘသများကို နေ့စားခနှင့် ထမင်းထုပ်များပေးကာ ပြည်နယ်ဘောလုံးကွင်းမှတဆင့် စူဠာမုဏိစေတီအထိ လူအင်အား (၃၀၀) ကျော်ဖြင့် နာရီဝက်ခန့် လမ်းလျှောက်ဆန္ဒပြခဲ့ကြောင်း တောင်ကြီးဒေသခံများက ပြောသည်။

“မဘသနဲ့ စစ်တပ်ထောက်ခံသူတွေ လုပ်ကြတာ၊ အေးသာယာနဲ့ စိန်ပန်း ရွှေတောင်ဘက်က လူတွေပါ။ ခေါ်သလောက် လူမလာလို့ သူတို့ရုံးဝန်ထမ်းတွေကို အလံပေးပြီး လမ်းလျှောက်ခိုင်းတာ။ MNDAAနဲ့ TNLAကို ပြတာတဲ့၊ သျှမ်းနဲ့ရန်တိုက်တာပေါ့။ ပိုက်ဆံ ၆၈၀၀ကျပ်ပေးခေါ်တယ်လို့ ကြားတယ်။ သျှမ်းဝတ်စုံ ဝတ်ပြီး တက်ခိုင်းတယ်၊ သူတို့လုပ်နေကြတွေပါ”ဟု တောင်ကြီးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

စစ်ကော်မရှင်က တောင်ကြီးမြို့ပေါ် ဆန္ဒပြပွဲတွင် လူအင်အား နည်းပါးခြင်းကြောင့် ၎င်းလက်အောက်ခံ ဆည်မြောင်း၊ လွှတ်တော်ရုံးနှင့် စုပေါင်းရုံးတို့မှ ဌာနဆိုင်ရာများကို အလံနှင့် ဆိုင်းဘုတ်ပေးကာ ပါဝင်အားဖြည့်ခိုင်းပြီး လမ်းလျှောက်ဆန္ဒပြခိုင်းခဲ့ကြောင်း တောင်ကြီးဒေသခံများထံမှ သိရသည်။

အလားတူ နမ့်စန်မြို့တွင်လည်း TNLA နှင့် MNDAA တို့ကို ဆန့်ကျင်ဆန္ဒပြရန်အတွက် စစ်ကော်မရှင်လက်အောက်ခံ အထွေထွေအုပ်ချုပ်ရေး ဝန်ထမ်းများက ရပ်ကွက်/ကျေးရွာ အုပ်ချုပ်ရေးမှူးများကို လူရှာခိုင်းပြီး သျှမ်းဝတ်စုံ ဝတ်ခိုင်းကာ လာရောက်စုဝေးခိုင်းကြောင်း ဒေသခံများထံမှ သိရသည်။

စစ်ကော်မရှင်၏ လုပ်ရပ်များသည် ယခင်စစ်အာဏာရှင် အဆက်ဆက် ကျင့်သုံးသည့် သွေးခွဲဖိနှိပ် အုပ်ချုပ်ရေးစနစ်များသာ ဖြစ်ပြီး ယခုဆန္ဒပြပွဲများသည် သျှမ်းပြည်ဌာနေလူမျိုးစု အချင်းချင်းကြား ပဋိပက္ခ ဖြစ်ပွါးစေရန် ရည်ရွယ်လုပ်ဆောင်နေသည်မှာ ထင်ရှားကြောင်း သျှမ်းလူငယ်ကွန်ဂရက်က ယမန်နေ့တွင် ထုတ်ပြန်သည်။

စစ်ကော်မရှင်တွင် အားတက်သရော ပါဝင်နေကြသော သျှမ်းလူမျိုးအချို့သည်လည်း သျှမ်းပြည်သူတစ်ရပ်လုံး၏ သဘောဆန္ဒများကို လုံးဝ ကိုယ်စားမပြုဘဲ စစ်ကော်မရှင်၏ ဆိတ်ခေါင်းချိတ်၍ ခွေးသားရောင်းသကဲ့သို့ ကျင်းပသည့် ဆန္ဒပြပွဲများမှာ နိုင်ငံရေးအသုံးချခံများသာဖြစ်ပြီး ပြင်းပြင်းထန်ထန် ကန့်ကွက်ကြောင်း သျှမ်းလူငယ်ကွန်ဂရက်၏ ထုတ်ပြန်ချက်ထဲတွင် ရေးသားထားသည်။

သျှမ်းပြည်တောင်ပိုင်းရှိ စစ်ကော်မရှင် လက်အောက်ခံများက RCSS/SSA ထိန်းချုပ်လှုပ်ရှားနေသည့် မြို့နယ်များတွင် ညီနောင်မဟာမိတ်တပ်များကို ဆန့်ကျင်ကြောင်း ဆန္ဒပြခိုင်းခြင်းသည် သျှမ်းပြည်အတွင်း အတူနေ တိုင်းရင်းသားအချင်းချင်း ပဋိပက္ခဖြစ်အောင် ဖန်တီးနေခြင်းဖြစ်ပြီး RCSS နှင့် သက်ဆိုင်ခြင်းမရှိကြောင်း RCSS/SSA အတွင်းရေးမှူး(၂)ဖြစ်သူ ဗိုလ်မှူးစိုင်းခမ်းစံက သျှမ်းသံတော်ဆင့်ကို ယမန်နေ့တွင် ဖြေကြားထားသည်။

ယမန်နေ့တွင် သျှမ်းပြည်တောင်ပိုင်းရှိ မိုးနဲမြို့၊ မိုင်းပန်မြို့နှင့် ကွန်ဟိန်းမြို့တို့မှ ဒေသခံများကို စစ်ကော်မရှင်လက်အောက်ခံများမှ ညီနောင်မဟာမိတ်အဖွဲ့ဝင် TNLA နှင့် MNDAA တို့ကို ဆန့်ကျင်ကြောင်း မြို့ပေါ်တွင် ဆန္ဒပြခိုင်းခဲ့ပြီး ဩဂုတ်လ ၂၀ ရက်တွင် သျှမ်းပြည်မြောက်ပိုင်း မိုင်းရယ်မြို့၊ နမ့်လန်မြို့တို့တွင်လည်း ဆန္ဒပြရန် ဒေသခံများကို လိုက်လံပြောဆိုနေသည်ဟု သိရသည်။