သျှမ်းပြည် ကျောက်မဲမြို့နယ်ရှိ ရှမ်းပြည်တိုးတက်ရေးပါတီ/ ရှမ်းပြည်တပ်မတော် (SSPP/SSA) ထိန်းချုပ်ထားသည့် နောင်ပိန်ကျေးရွာအနီးတဝိုက်ကို စစ်ကော်မရှင်က ဒရုန်းဖြင့် ထပ်မံ ဗုံးကြဲတိုက်ခိုက်သဖြင့် အရပ်သားတစ်ဦး သေဆုံးသွားကြောင်း စုံစမ်းသိရသည်။

ယနေ့ (ဩဂုတ်လ ၁၈ ရက်) နေ့လယ် ၁၂ နာရီခန့်မှ စတင်ပြီး နောင်ချိုစစ်ကောင်စီတပ်သည် ဂုတ်ထိပ်တဖက်ကမ်းရှိ ကျောက်မဲမြို့နယ် SSPP/SSA ထိန်းချုပ်ထားသည့် နောင်ပိန်အနီးတဝိုက်ရှိ လုံကြိမ်၊ ကျောင်းကုန်းနှင့် ပင်တိန်ကျေးရွာတို့ကို ဒရုန်းဖြင့် ဗုံးကြဲတိုက်ခိုက်ခဲ့ရာ အရပ်သားတစ်ဦး ထိမှန်သေဆုံးခဲ့ကြောင်း နောင်ပိန်ဒေသခံများက ပြောသည်။

“ရွာဘေးပတ်လည်မှာ ဗုံးသီးတွေ ကျတယ်။ ဒရုန်းဗုံးတွေ ပင်တိန်အရှေ့ဘက် နှစ်လုံး၊ ကျောင်းကုန်းမှာက ရွာထဲ တစ်လုံးကျလို့ တစ်ယောက်သေတယ်။ ၁၂ နာရီလောက်ကနေ ခြားပြီး ပစ်နေတာ။ အဲ့လိုဖြစ်ပြီးသွားရင် ရွာထဲမှာ ရှောင်ပြေးကြပါလေရော”ဟု နောင်ပိန်ဒေသခံ အသက် (၂၀) ကျော်အရွယ် ဒေသခံအမျိုးသားတစ်ဦးက သျှမ်းသံတော်ဆင့်ကို ပြောသည်။

ကျောက်မဲမြို့နယ် နောင်ပိန်တိုက်နယ်အတွင်း SSPP/SSA မှ ထိန်းချုပ်ထားသော်လည်း ဇူလိုင်လ နောက်ဆုံးပတ်မှ စတင်ပြီး ဂုတ်ထိပ်တဖက်ကမ်းရှိ နောင်ချိုစစ်ကောင်စီတပ်မှ နောင်ပိန်ကျေးရွာ လူနေရပ်ကွက်ထဲနှင့် ပြည်ထောင်စုလမ်းမကြီးအနီး ကျေးရွာများသို့ နေ့စဉ်နီးပါး လက်နက်ကြီးနှင့် ဒရုန်းဗုံးဖြင့် ပစ်ခတ်တိုက်ခိုက်လာကြောင်း ဒေသခံများက ပြောသည်။

ပြီးခဲ့သည့် ဩဂုတ်လ ၁၃ ရက်ကလည်း ကျောက်မဲမြို့နယ် ပင်ပေါ၊ ဇီးပင်စခန်းရွာသို့ စစ်ကောင်စီတပ်မှ ပေါင် ၂၅၀ ဗုံးနှစ်လုံး ကြဲချတိုက်ခိုက်ခဲ့ခြင်းကြောင့် နေအိမ်(၁၀) လုံးခန့် ထိခိုက်ပျက်စီးခဲ့ကြောင်း သိရသည်။

စစ်ကောင်စီအသွင်ပြောင်း စစ်ကော်မရှင်သည် ဇူလိုင်လအတွင်း နောင်ချိုမြို့ကို ပြန်လည်ထိန်းချုပ်နိုင်ပြီးနောက် ဂုတ်ထိပ်တဖက်ကမ်းရှိ ကျေးရွာများကို လက်နက်ကြီး၊ ဒရုန်းနှင့် လေကြောင်းတိုက်ခိုက်မှုများ ဆက်တိုက်ပြုလုပ်လာခြင်းကြောင့် နောင်ပိန်တိုက်နယ်အတွင်း ကိုရင်တစ်ပါး အပါအဝင် ဒေသခံနှင့် စစ်ဘေးရှောင် (၅) ဦးထက်မနည်း သေဆုံးခဲ့ကြောင်း ဒေသခံများထံမှ သိရသည်။