မြန်မာ-ထိုင်းနယ်စပ် သျှမ်းပြည် တာချီလိတ်မြို့ ရှိ လန်ချန်း-မဲခေါင်ပူးပေါင်းဆောင်ရွက်မှု အထူးရန်ပုံငွေဖြင့် တည်ဆောက်ထားသော ၀မ်ပုံရေကြောင်းရဲတပ်ဖွဲ့စခန်းအတွင်း အဆောက်အဦးများ နှင့် စိုက်ပျိုးရေး၊ မွေးမြူရေးနှင့် ဆည်မြောင်းဝန်ကြီးဌာန၏ ရော်ဘာကုန်ထုတ်လုပ်ရေး စင်တာကို မြန်မာနိုင်ငံဆိုင်ရာ တရုတ်သံအမတ် Ms. Ma Jia က သွားရောက်စစ်ဆေးခဲ့ကြောင်း သိရသည်။

မြန်မာနိုင်ငံဆိုင်ရာတရုတ်သံအမတ်ကြီး Ms. Ma Jia သည် သျှမ်းပြည် တာချီလိတ်ရှိ လန်ချန်း-မဲခေါင် ပူးပေါင်းဆောင်ရွက်မှု စီမံကိန်းများကို သြဂုတ်လ ၁၄ရက် မှ ၁၅ရက်အထိ သွားရောက်စစ်ဆေးခဲ့ကြောင်း သိရသည်။

လန်ချန်း-မဲခေါင်စီမံကိန်းများသည် တိုးတက်လာကြောင်း၊ စီမံကိန်းများသည် မြန်မာနိုင်ငံရှိ ပြည်သူလူထုကို များစွာ အကျိုးပြုခဲ့ကြောင်းနှင့် မြန်မာနိုင်ငံ ဒေသတွင်း စီးပွားရေးဖွံ့ဖြိုးတိုးတက်မှုနှင့် ပြည်သူ့လူနေမှုဘဝ မြှင့်တင်ရေးဆိုင်ရာကိစ္စရပ်များကို ဆွေးနွေးခဲ့ကြကြောင်း မြန်မာနိုင်ငံ တရုတ်သံရုံက ယနေ့ (သြဂုတ် ၁၆)ရက်စွဲဖြင့် ထုတ်ပြန်လာသည်။

ကွင်းဆင်းကြည့်ရှုကာလအတွင်း တရုတ်နိုင်ံ သံအမတ်ကြီး Ms. Ma Jia မှ တရုတ်နိုင်ငံဆိုင်ရာ စခန်းချ ရဲဝန်ထမ်းများအား နှစ်သိမ့်အားပေးခဲ့ပြီး တာချီလိတ်မြို့ရှိ တာ့ဟွာတရုတ်ဘုံကျောင်း နှင့် တာ့ဟွာ ဗုဒ္ဓဘာသာ စံပြစာသင်ကျောင်းသို့ ကြည့်ရှုလေ့လာခဲ့ကြောင်း မြန်မာနိုင်ငံ တရုတ်သံရုံး ထုတ်ပြန်ချက်တွင် ရေးသားထားသည်။