နိုင်ငံ့ဝန်ထမ်းများနှင့် ပြည်သူလူထုတို့အား ဒလန်ဟုစွပ်စွဲ၍ သတ်ဖြတ်နေမှုများ ရွေးကောက်ပွဲ ကာလတွင် ပိုမိုဖြစ်ပေါ်လာနိုင်ကြောင်း စစ်ကော်မရှင်ဥက္ကဋ္ဌ ဗိုလ်ချုပ်မှူးကြီး မင်းအောင်လှိုင်က ပြောသည်။

စစ်ကောင်စီသည် လာမည့် ဒီဇင်ဘာလနှင့် ၂၀၂၆ ခုနှစ် ဇန်နဝါရီလတွင် ရွေးကောက်ပွဲကို မဖြစ်ဖြစ်အောင် ဆောင်ရွက်သွားမည်ဖြစ်ပြီး အောင်မြင်စွာကျင်းပနိုင်ရေးအတွက် နိုင်ငံတော်လုံခြုံရေးနှင့် အေးချမ်းသာယာရေး ကော်မရှင်ကို ဖွဲ့စည်းထားပြီဖြစ်ကြောင်း သြဂုတ် ၁၂ ရက်နေ့က ကျင်းပသည့် အစည်းအဝေးတွင် ဗိုလ်ချုပ်မှူးကြီး မင်းအောင်လှိုင်က ပြောသည်။

ရွှေးကောက်ပွဲ ဥပဒေတွင် ဆန္ဒမဲပေးသူမည်သည့် ရာခိုင်နှုန်းရှိမှရွေးကောက်ပွဲ အောင်မည်ဟု သတ်မှတ်ပြဋ္ဌာန်းထားခြင်း မရှိကြောင်း၊ ၅၀ ရခိုင်နှုန်းနှင့်အထက် ဆန္ဒမဲပေးနိုင်မည်ဆိုပါက လူထုအများစု၏ ဆန္ဒပါဝင်သည်ဟု သတ်မှတ်နိုင်မည်ဖြစ်ကြောင်း ၎င်းက ပြောသည်။

ထို့ပြင် လွှတ်တော်အစည်းအဝေး အထမြောက်ရန်အတွက် ဖွဲ့စည်းပုံအခြေခံ ဥပဒေပုဒ်မ (၈၅)အရ ပထမဆုံးလွှတ်တော် အစည်းအဝေးကျင်းပရာ၌ လွှတ်တော်တက်ရောက်ခွင့်ရှိသူ ကိုယ်စားလှယ်ဦးရေ၏ ထက်ဝက်ကျော်တက်ရောက်ပါက အစည်းအဝေးအထမြောက်မည်ဟု ဖော်ပြထားသည်။

ပထမအစည်းအဝေး အထမမြောက်ပါက ဒုတိယအကြိမ် အစည်းအဝေး၌ လွှတ်တော်တက်ရောက် ခွင့်ရှိသူ ကိုယ်စားလှယ်များအနက် အနည်းဆုံး ၃ ပုံ ၁ ပုံ တက်ရောက်ပါက ဒုတိယအကြိမ် အစည်းအဝေး အထမြောက်သည်ဟု စစ်ကောင်၏ ထုတ်ပြန်ချက်၌ ဖော်ပြထားသည်။

ထိုကြောင့် မြို့နယ်များအားလုံးတွင် ရွှေးကောက်ပွဲ ကျင်းပနိုင်ရေေး ရည်မှန်းထားပြီး မဲပေးခွင့်ရှိသူ ပြည်သူများအားလုံး ဆန္ဒမဲပေးနိုင်ရေး ဆောင်ရွက်ပေးမည်ဖြစ်သကဲ့သို့ သဘာဝဘေးအန္တရာယ်ကြောင့် ရွှေ့ပြောင်းနေထိုင်ရသည့် မဲဆန္ဒရှင်များလည်း ကြိုတင်မဲများဖြင့် ဆန္ဒမဲများပေးအပ်နိုင်ရေး ဆောင်ရွက်သွားမည် ဖြစ်ကြောင်း ဆိုသည်။

ရွှေးကောက်ပွဲဖြစ်မြောက်မှုမရှိစေရေး ပြည်တွင်း၊ ပြည်ပမှ အဖျက်အမှောင့်လုပ်ရပ်များ လုပ်ဆောင်လာမည့်သူများ၊ အဖွဲ့အစည်းများ လည်းရှိနိုင်ပြီး ၎င်းတို့အနေဖြင့် ရွှေးကောက်ပွဲအောင်မြင်မှု မရှိစေရေး နည်းလမ်းပေါင်းစုံဖြင့် လုပ်ဆောင်လာနိုင်ကြောင်း ဗိုလ်ချုပ်မှူးကြီး မင်းအောင်လှိုင်က ပြောသည်။

သို့သော် စစ်ကောင်စီ ကျင်းပပြုလုပ်မည့် ရွေးကောက်ပွဲအပေါ် ထောက်ခံအားပေးသည့်၊ အပြုသဘောဆောင်သည့် နိုင်ငံများရှိသကဲ့သို့ ရွေးကောက်ပွဲအပေါ် စောဒက တက်နိုင်သည့် နိုင်များလည်း ရှိနိုင်ကြောင်း ၎င်းက ပြောသည်။

စစ်ကောင်စီအနေဖြင့် ရွေးကောက်ပွဲအား ဆန့်ကျင်လှုပ်ရှားမှုများအပေါ် နှိပ်ကွပ်ထိန်းချုပ်နိုင်ရေး အနည်းဆုံး ထောင်ဒဏ် ၃ နှစ်မှ သေဒဏ်အထိချမှတ်နိုင်သော ပါတီစုံဒီမိုကရေစီ အထွေထွေရွေးကောက်ပွဲများကို နှောင့်ယှက်ဟန့်တားဖျက်ဆီးခြင်းမှ ကာကွယ်ပေးရေးဥပဒေ ကိုလည်း ဇူလိုင် ၂၉ ရက်၌ ပြဋ္ဌာန်းခဲ့သည်။

ထိုဥပဒေပါ ပြစ်မှုတရပ်ရပ်ကျူးလွန်စဉ် လူသေဆုံးစေပါက ပါဝင်သူအားလုံး သေဒဏ်ချမှတ်ရမည်ဟု ပုဒ်မ ၂၇ တွင် ပြဋ္ဌာန်းထားပြီး ပြစ်မှုတရပ်ရပ်ကို ကျူးလွန်ရန် ပူးပေါင်းကြံစည်၊ အားပေးကူညီသူများအနေဖြင့်လည်း မူလပြစ်ဒဏ် အတိုင်း ချမှတ်ရမည်ဟု ပုဒ်မ ၂၈ ၌ ပြဋ္ဌာန်းထားသည်။