သျှမ်းပြည် လားရှိုးမြို့ရှိ စစ်ကောင်စီလက်အောက်ခံ မြို့နယ်လူဝင်မှုကြီးကြပ်ရေး လဝကရုံးတွင် ငွေပေးနိုင်သည့် တရုတ်လူမျိုးများထံမှ လာဘ်စားပြီး မှတ်ပုံတင်ပြုလုပ်ပေးခဲ့သည့် မြို့နယ်ဦးစီးမှူးကို နယ်ပြောင်းရွှေ့လိုက်ကြောင်း စုံစမ်းသိရသည်။

စစ်ကောင်စီ ပြန်လည်ထိန်းချုပ်ထားသည့် လားရှိုးမြို့ရှိ လူဝင်မှုကြီးကြပ်ရေး လဝကရုံးတွင် မြို့နယ်ဦးစီးမှူးအဖြစ် ထမ်းဆောင်နေသည့် ဦးစီးအရာရှိ ဦးခင်မောင်ထွန်း အား တရုတ်လူမျိုးများကို မှတ်ပုံတင် ဦးစားပေးထုတ်ပေးမှုနှင့် မွေးစာရင်းသွင်းရာတွင် ငွေအများအပြား တောင်းခံပြီး လာဘ်စားမှုတို့ကြောင့် ဩဂုတ်လ ဒုတိယပတ်အတွင်းက စစ်ကောင်စီမှ နယ်ပြောင်းရွှေ့လိုက်ကြောင်း လဝကရုံးနှင့် နီးစပ်သူများက ပြောသည်။

“နာမည်ထွက်တဲ့ သုံးပွင့်နဲ့ မြို့နယ်ဦးစီးမှူးကတော့ နယ်ပြောင်းခံရတယ်၊ သူ့လက်အောက်က နှစ်ပွင့်နဲ့ ဒုဦးစီးမှူးကတော့ ဆက်နေတုန်းပဲ။ သူတို့လုပ်ပုံက ရုံးထဲ ပွဲစားပေးမဝင်ဘူး၊ ပြည်သူက ကိုယ့်ဘာသာ အလှည့်ကျ တန်းစီရတယ် ဆိုတဲ့ ပုံစံပေါ့။ တရုတ်ဆိုရင်တော့ လဝကမှူးတွေ သိန်းတစ်ရာကျော်အထိ စိတ်ကြိုက်တောင်းတယ်၊ ပိုက်ဆံမရှိတဲ့ တိုင်းရင်းသားတွေကျတော့ နေ့တိုင်း တန်းသွားစီတာတောင် မလုပ်ရတာ အများကြီးရှိတယ်”ဟု လားရှိုးမြို့ရှိ လဝကရုံး အသိုင်းအဝိုင်းနှင့် နီးစပ်သူတစ်ဦးက သျှမ်းသံတော်ဆင့်ကို ပြောသည်။

လက်ရှိ လားရှိုးမြို့ရှိ မြို့နယ်လဝကရုံးတွင် တရုတ်လူမျိုးများကို မှတ်ပုံတင် ဦးစားပေး လုပ်ပေးကာ မွေးတိုးစာရင်းများကို ငွေအများအပြား တောင်းခံပြီး လာဘ်စားနေသူမှာ မြို့နယ်ဦးစီးမှူး ဦးခင်မောင်ထွန်းနှင့် ဒုဦးစီးမှူး ဒေါ်သီတာမြင့် ဖြစ်ပြီး နယ်ပြောင်းခံရသည့် မြို့နယ်ဦးစီးမှူးအတွက် နှုတ်ဆက်ပွဲကို ဩဂုတ်လ (၁၀) ရက်နေ့တွင် ပြုလုပ်ခဲ့ကြောင်း ၎င်းအမျိုးသားက ဆက်ပြောသည်။

၎င်းတို့နှစ်ဦးမှ နိုင်ငံသားစိစစ်ရေးကတ်ပြားနှင့် မွေးတိုးစာရင်း ပြုလုပ်ပေးရန်အတွက် တရုတ်လူမျိုးများထံမှ ကျပ်ငွေ သိန်း ၂၀ မှ သိန်းရာဂဏန်းအထိ တောင်းခံပြီး တိုင်းရင်းသားလူမျိုး ဖြစ်ပါက တစ်ဦးလျှင် ကျပ်သုံးသိန်းမှ ဆယ်သိန်းခန့်အထိ ငွေတောင်းခံနေကြောင်း ဒေသခံများထံမှ သိရသည်။

“မွေးတိုးစာရင်းက တိုင်းရင်းသားဆိုရင် တစ်ယောက် ၃ သိန်း၊ တရုတ်ဆိုရင် သိန်း ၂၀ တောင်းတယ်။ အသက် တစ်နှစ်ကြီးသွားရင် တစ်သိန်း ထပ်တောင်းတယ်၊ ကလေးက အသက်ငါးနှစ်နေမှ မွေးတိုးစာရင်း သွားထည့်ရင် ငါးသိန်းထပ်ပေးရတယ်။ ဒေါ်သီတာမြင့်က လဝက ရုံးထဲမှာ ဂျင်ကလယ်၊ ပွဲစားတွေနဲ့ ချိတ်ပြီး ဦးစီးမှူးဆီ လူခေါ်သွင်းတယ်။ ပွဲစားအသေးတွေဆို စကားတောင်မပြောဘူး၊ ပိုက်ဆံကို သိန်းဆယ်ချီ ရာချီ ပေးနိုင်တယ့် တရုတ်ပွဲစားတွေမှပဲ အဖတ်လုပ်တယ်”ဟု လားရှိုးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

အလားတူ လားရှိုးမြို့နယ်အတွင်း ကိုးကန့်တပ်ဖွဲ့ MNDAA ထိန်းချုပ်ထားပြီး စစ်ကောင်စီ လက်လှမ်းမမီသည့် ကျေးရွာများမှ ပြည်သူများ မှတ်ပုံတင်ပြုလုပ်လိုပါက ရပ်ကွက် သို့မဟုတ် ကျေးရွာ အုပ်ချုပ်ရေးမှူး ထောက်ခံစာ မလိုအပ်သော်လည်း လားရှိုးမြို့ပေါ်ရှိ စစ်ကောင်စီလက်အောက်ခံ ရဲစခန်းထောက်ခံစာ ရရှိရန် ငွေထပ်ပေးရကြောင်း ဒေသခံများက ပြောဆိုသည်။

“မှတ်ပုံတင်ဆိုရင် တိုင်းရင်းသားစစ်စစ် ဖြစ်တယ်၊ FRC ကိုင်တဲ့လူ မဟုတ်ရင် ၃ သိန်းခွဲကနေ ၈ သိန်းအထိ ပေးရတယ်။ အရာရှိတွေ မြို့နယ်မှူးတွေ ဘယ်လောက်ပြောင်းပြောင်း၊ အသစ်လာတဲ့လူလည်း သူတို့အကျင့်က ဒေါ်သီတာမြင့်နဲ့ ပေါင်းစားတွဲစား လုပ်ကြဦးမှာပဲ။ လူပြောင်းပြီး မူမပြောင်းရင် အလကားပဲ၊ လူပြောင်းဖို့ထက်ကို မူပြောင်းရမှာ”ဟု လားရှိုးဒေသခံ ၎င်းအမျိုးသားက ဆက်ပြောသည်။

လားရှိုးမြို့ရှိ စစ်ကောင်စီလက်အောက်ခံ ခရိုင်နှင့် မြို့နယ် လူဝင်မှုကြီးကြပ်ရေးဌာန လဝကရုံးများကို မေလ (၁၉) ရက်မှ စတင်ဖွင့်လှစ်ခဲ့ပြီး MNDAA ထိန်းချုပ်ထားသည့် သိန္နီမြို့နယ်နှင့် ကွမ်းလုံမြို့နယ်မှ ပြည်သူများလည်း လားရှိုးမြို့ရှိ ခရိုင်လဝကဦးစီးမှူးရုံးတွင် အိမ်ထောင်စုစာရင်း၊ နိုင်ငံသားစိစစ်ရေး မှတ်ပုံတင်ကတ်နှင့် UID စမတ်ကတ်များ ပြုလုပ်နိုင်ကြောင်း ကြေညာထားသည်။

ပြီးခဲ့သည့် ဩဂုတ်လ (၁၂) ရက်တွင် စစ်ကောင်စီ ပြန်လည်ထိန်းချုပ်ထားသည့် နောင်ချိုမြို့သို့ စစ်ကောင်စီလက်အောက်ခံ လူဝင်မှုကြီးကြပ်ရေးနှင့် ပြည်သူ့အင်အားဝန်ကြီးဌာန ပြည်ထောင်စုဝန်ကြီး ဦးမြင့်ကြိုင်နှင့်အဖွဲ့ သွားရောက်ပြီး နောင်ချို၊ ကျောက်မဲ၊ သီပေါ၊ နမ္မတူမြို့နယ်များမှ ဒေသခံများအတွက် မှတ်ပုံတင်နှင့် UID စမတ်ကတ်များ ထုတ်ပေးမှုအခြေအနေကို သွားရောက်စစ်ဆေးခဲ့ကြောင်း သိရသည်။