သျှမ်းပြည်တောင်ပိုင်း ညောင်ရွှေမြို့နယ် ရှိ ပအိုဝ်းပြည်သူ့စစ် PNO ထိန်းချုပ်သည့်နယ်မြေ အတွင်းနေထိုင်သော ပြည်သူများကို စစ်ဝတ်စုံဝတ်ခိုင်းပြီး ကင်းစောင့်ခိုင်းနေကြောင်း သတင်းရရှိသည်။

ပြီးခဲ့သည့် ဇူလိုင်လ လယ်မှစပြီး ညောင်ရွှေမြို့နယ် တောင်ပို့ကွဲရွာနှင့် လွယ်နွဲ့ကျေးရွာတွင် စစ်ကောင်စီနှင့် PNOက နေရပ်ပြန်ခိုင်းပြီးကျေးရွာအတွင်း ငွေကောက်ခြင်း၊ ငွေမထည့်နိုင်သူများက်ု PNOယူနီဖောင်း ဝတ်ခိုင်းပြီး ကင်းစောင့်ခိုင်းကြောင်း ဒေသခံများက ပြောသည်။

တောင်ပို့ကွဲကျေးရွာတွင် အိမ်ခြေ ၃၀၀ ကျော်ရှိပြီး တစ်အိမ်လျှင် ငွေကျပ် (၈သိန်း)အထိကောက်ခံနေပြီး မပေးနိုင်သည့် နေအိမ်များကို PNO၏ ယူနီဖောင်း ဝတ်ခိုင်းပြီး အလှည့်ကျ ကင်းစောင့်ခိုင်းကြောင်း ဒေသခံ အမျိုးသားတစ်ဦးက သျှမ်းသံတော်ဆင့်ကိုပြောသည်။

“ရွာမှာ အလုပ်လည်း သိပ်လုပ်ခွင့်မပေးဘူး။ ပိုက်ဆံလည်းတစ်အိမ်ကို ၈ သိန်းတဲ့။ ဘယ်ကနေသွားယူရမှာလဲ။ ပိုက်ဆံရှိတဲ့ သူက ထည့်နိုင်တာပေါ့။ မထည့်နိုင်တဲ့ သူတွေကတော့ PNOယူနီဖောင်း ဝတ်ခိုင်းပြီး ကင်းစောင့်ရတယ်။စားစရာမရှိရတဲ့ကြားက ထမင်းထုတ်လည်း ပို့ရတယ်။”ဟု ၎င်း အမျိုးသားတစ်ဦးက ပြောသည်။

ထို့အပြင် လွယ်နွဲ့ကျေးရွာတွင်လည်း PNOက ရွာသားများကို၁၅ ရက်လျှင် တစ်ကြိမ် ငါးယောက်စီ အလှည့်ကျကင်းစောင့် ခိုင်းနေသည်ဟု သိရကြောင်း ၎င်းက ဆက်ပြောသည်။
တောင်ပို့ကွဲကျေးရွာသည် အင်းလေးဒေသနှင့် ၂နာရီကျော်ကွာဝေး၍ ဖယ်ခုံအရှေ့ဖက်ကမ်း တွင်တည်ရှိပြီး စစ်ကောင်စီနှင့် PNOတပ်သားများက ကျေးရွာအတွင်း တပ်စွဲထားကြောင်းသိရသည်။

ဆက်လက်ပြီး ဘုရားတောင်ကျေးရွာတွင်လည်း စစ်ကောင်စီနှင့် PNOက ပြန်လည်နေထိုင်ခွင့် ပြုခဲ့ပြီး တစ်အိမ်လျှင် ငွေကျပ် (၅) သိန်းထည့်ပြီး စစ်မှုထမ်းရမည်ဆိုသောကြောင့် ဒေသခံများ မပြန်ရဲသေးကြကြောင်း အသက် ၃၀ ကျောက်အရွယ်ရှိ ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ရွာကိုတော့ ပြန်လို့ရပြီတဲ့ ပိုက်ဆံ ငါးသိန်းနဲ့ စစ်မှုထမ်းရမယ်ပြောတယ်။ အပြင်မှာလည်း အလုပ်ပေးမလုပ်ဘူးတဲ့။ ကျနော်တော့ မပြန်ရဲတော့ဘူး။ ဒီနေ့မပြန်ရင် တစ်နှစ်စာ မပြန်ရတော့ဘူးတဲ့။ ပြန်ရင်လည်း စစ်မှုထမ်းရမယ်ဆို‌ေတာ့ မပြန်ရဲတော့ဘူး။ “ဟု ၎င်း ဒေသခံအမျိုးသားက ပြောသည်။

ညောင်ရွှေမြို့နယ် ဘုရားတောင်ကျေးရွာ၊ လွယ်နွဲ့ကျေးရွာ၊ ညောင်လေးပင်ကျေးရွာ၊ ရေပူကျေးရွာ ၊ နှင့် ပင်လောင်းမြို့နယ် နန်းတုတ်ကျေးရွာတို့ကို စစ်ရှောင်နေရသည်မှာ ၆ လကျော်ကြာပြီဖြစ်ပြီးပြီးခဲ့သည့် ဇူလိုင်လမှစ၍ နေရပ်ပေးပြန်ကြောင်း သိရသည်။

ပြီးခဲ့သည့် မတ်လမှ စပြီး ဖက်ခုံအရှေ့ဘက်ကမ်း အင်းလေး​ဒေသ အနီးတွင် စစ်ကောင်စီ၊ PNOနှင့် တော်လှန်ရေးအင်အားစုတို့က တိုက်ပွဲဖြစ်ပွားခဲ့ပြီး စစ်ကောင်စီမှ လေကြောင်းဖြင့် ပစ်ခတ်တိုက်ခိုက်သောကြောင့် ကျေးရွာများ ရွာလုံးကျွတ်စစ်ဘေးရှောင်ခဲ့ရသည်။
ယခုလက်ရှိ အင်းလေးဒေသတွင် စစ်ရှောင် သုံးရာနီးပါးသာကျန်ရှိပြီး အလှူရှင်များကို အားပြုကာ ရှင်သန်နေရကြောင်း သိရသည်။