သျှမ်းပြည် ကျောက်မဲမြို့ အင်ကြင်းတောင်ရပ်ကွက်တွင် အသက် (၆) နှစ်အရွယ်ရှိယောင်္ကျားလေးတစ်ဉီး သတ်ဖြတ်ခံရကြောင်း သတင်းရရှိသည်။

ဖြစ်စဉ်မှာ သြဂုတ် ၉ ရက် ညနေပိုင်းတွင် အသက် (၆) နှစ်အရွယ် ကလေးငယ်တစ်ဦးကို အိမ်နီးနားချင်းမှ အမျိုးသားတစ်ဦးက ခေါ်ဆောင်သွားပြီး ရုတ်တရက် ပျောက်ဆုံးသွားခဲ့ကြောင်း ဒေသခံများက ပြောသည်။

ထိုသို့ ရုတ်တရက် ပျောက်ဆုံးသွားပြီးနောက် သြဂုတ် ၁၀ ရက် နံနက်ပိုင်းတွင် ကလေးငယ်၏ ရုပ်အလောင်းကို နေအိမ်နှင့် ၁၀ မိနစ်ခန့် လမ်းလျှောက်သွားရသော အင်ကြင်းတောင် နတ်စဉ်အနီးရှိ ခြုံပုတ်တစ်ခုထဲတွင် ပြန်လည်တွေ့ရှိခဲ့ကြောင်း အလောင်းကို သွားရောက်သယ်ယူခဲ့သည့် နမ့်ခုံးရှမ်းများ ပရဟိတအသင်းမှ တာဝန်ရှိသူတစ်ဦး သျှမ်းသံတော်ဆင့်ကို ပြောသည်။

“ကလေးအဖေက အပြင်မှာ အလုပ်သွားလုပ်တဲ့အချိန်၊ အမေနဲ့ပဲ အိမ်မှာကျန်ခဲ့တာ။ ဒေသခံတွေပြောပြ တာကတော့ အိမ်နီးနားချင်းတစ်ယောက်က ခေါ်သွားတယ်။ ကလေးခေါ်သွားပြီး ရုတ်တရက် ပျောက်သွားတာ၊ နောက်နေ့နံနက်မှ အလောင်း ပြန်တွေ့တာ” ဟု နမ့်ခုံးရှမ်းများ ပရဟိတအသင်းမှ တာဝန်ရှိသူတစ်ဦး ပြောသည်။

စစ်ဆေးတွေ့ရှိချက်များအရ ကလေးငယ်၏ လည်ပင်းတွင် လက်ဖြင့်ညစ်ထားသော ဒဏ်ရာဒဏ်ချက်များ တွေ့ရှိရသဖြင့် ကလေးငယ်ကို လက်ပင်းညစ်ပြီး သတ်ထားခြင်း ဖြစ်နိုင်ကြောင်း ၎င်းက ပြောသည်။

လက်ရှိတွင် ကလေးငယ်ကို ခေါ်ဆောင်ပြီး သတ်ဖြတ်ခဲ့သည့် တရာခံဟု ယူဆသူသည် မူးယစ်ဆေးဝါးသု့းစွဲပြီး ဆေးကြောင့်နေသူတစ်ဦး ဖြစ်ပြီး ကျောက်မဲမြို့နယ် ခဲမွန်ရွာဘက်သို့ ထွက်ပြေးတိမ်းရှောင်သွားသဖြင့် လွတ်မြောက်နေဆဲဖြစ်ကြောင်း သိရသည်။

“အခုနောက်ပိုင်း ကျောက်မဲမှာ ဆေးကြောင်တဲ့သူတွေ အရမ်းများလာတယ်။ တရားဥပဒေစိုးမိုးမှုလည်း မရှိဘူး၊ လူ့အခွင့်အရေးလည်း မရှိဘူး၊ ဖြစ်နိုင်ရင်တော့ သတိထား သွားလာနေချင်ပါတယ်။ အခုအခြေအနေမှာ ဥပဒေအရ အကာအကွယ် မရှိတဲ့အတွက် ကိုယ်ဖြစ်ရင်ကိုယ်ခံရမှာမို့ သတိကြီးကြီးထားပြီး သွားလာစေချင်တယ်” ဟု နမ့်ခုံးရှမ်းများ ပရဟိတအသင်းမှ တာဝန်ရှိသူတစ်ဦးက ထပ်လောင်းပြောသည်။

ပြီးခဲ့သည့် ဇူလိုင် ၁၀ ရက်တွင်လည်း တာချီလိတ်မြို့ ဝမ်ဟောင်ရွပ်ကွက်မှ အသက် (၈) နှစ်အရွယ် မိန်းကလေးငယ်တစ်ဦးကို အိမ်နီးနားချင်းဖြစ်သူ သူရိန်ထွန်းက မုန့်ဝယ်ကျွေးမည်ဟုဆိုကာ သွေးဆောင်ဖြားယောင်း ခေါ်ဆောင်သွားပြီး အဓမ္မ ဒုဒိမ်းကျင့်ခဲ့ပြီး သတ်ဖြတ်ခဲ့သည်။

အဆိုပါ မိန်းကလေးငယ်၏ အလောင်းကို သြဂုတ် ၄ ရက်နေ့တွင် တာချီလိတ်မြို့ မိုင်းဖုန်း (ခ) ကျေးရွာအုပ်စု မမ့်လွတ်အာခါကျေးရွာအနီးရှိ မယ်ဟုတ်ချောင်းထဲတွင် ပြန်လည်တွေ့ရှိခဲ့ခြင်း ဖြစ်သည်။