ထိုင်း-မြန်မာနယ်စပ် တာချီလိတ်မြို့ အမှတ် (၁) ချစ်ကြည်ရေး တံတားအောက်ရှိ နှစ်နိုင်ငံ ကမ်းကူးစာအုပ်များ ပြုလုပ်ပေးသည့် နေရာများရေဝင်ပြီး စာအုပ်လုပ်သည့် စက်ပျက်စီးသွားသဖြင့် တစ်နှစ် နယ်စပ်ဖြတ်သန်း သွားလာခွင့် (BP) စာအုပ် ပြုလုပ်ခြင်း၊ အသစ်လှဲလှယ်ခြင်း ရပ်နားထားကြောင်း သတင်းရရှိသည်။

ပြီးခဲ့သည့် ဇူလိုင်လတွင် တာချီလိတ်မြို့တွင် ရေကြီးရေလျှံမှုများ ဖြစ်ပေါ်ခဲ့ခြင်းကြောင့် နှစ်နိုင်ငံ ကမ်းကူးစာအုပ်များ ပြုလုပ်ပေးသည့် နေရာမှ TBP/BP အရောင်းကောင်တာ ရေနစ်မြုပ်ပြီး ဆာဗာလိုင်းများ ပျက်စီးသွားခဲ့ကြောင်း ကြော်ငြာထားသည်။

“အခုလောလောတယ်တော့ ယာယီ နယ်စပ်ဖြတ်သန်းခွင့်လက်မှတ်တော့ ထုတ်ပေးတယ်။ ဒါပေမယ့် တစ်နှစ် နယ်စပ်ဖြတ်သန်းခွင့် (BP)လက်မှတ်ကတော့ မလုပ်ပေးဘူး၊ သက်တမ်းလည်း မတိုးပေးတော့ဘူး။ ပြီးခဲ့တဲ့ရက်ပိုင်းက ကျနော်သွားလုပ်တာ သက်ကြီးရွယ်အိုတွေလောက်ပဲ လုပ်ပေးမယ်၊ စာအုပ်က ကုန်နေတယ်လို့ ပြောတယ်” ဟု တာချီလိတ်မြို့ဒေသခံ အသက် ၃၀ ကျော် အမျိုးသားတစ်ဦးက ပြောသည်။

တစ်နှစ် နယ်စပ်ဖြတ်သန်းသွားလာခွင့်စာအုပ် (BP) သက်တမ်းတိုးလိုသူများ အနေဖြင့် လတ်တလောမှာ ၇ ရက်သက်တမ်းရှိ ယာယီနယ်စပ်ဖြတ်သန်းသွားလာခွင့် (TBP) စာအုပ်ဖြင့်သာ ဖြတ်သန်းသွားလာနေကြကြောင်း ၎င်းက ပြောသည်။

အမှတ် (၁) ချစ်ကြည်ရေးတံတားပေါ်တွင် နေစဉ်ကူးလူးဖြတ်သန်းမှု လူဦးရေသည် သုံးထောင်နှင့် ငါးထောင်ကြား ရှိကြောင်း သိရသည်။

ယခင်က နှစ်နိုင်ငံ ကမ်းကူးစာအုပ်များ ပြုလုပ်ပေးသည့် နေရာတွင် TBP/ BP စာအုပ်ကို စက် (၅) လုံးဖြင့် တပြိုင်နက် လုပ်ဆောင်ပေးခဲ့ရာ ယခုနှစ် ၂၀၂၅ ဇွန်လပိုင်းတွင် ရေနစ်မြုပ်ပြီးနောက် စက် (၃) လုံးဖြင့် လုပ်ဆောင်နေရကြောင်း နိုင်ငံကူး လက်မှတ်သွားလုပ်သည့် တာချီလိတ်မြို့ ဒေသခံတစ်ဦးက ဆက်ပြောသည်။

“အခု စာအုပ်သွားလုပ်ရင် တန်းစီရတယ်၊ တချို့ဆိုရင် ၁ နာရီလောက် တန်းစီမှ ရတာ။ တချို့ဆိုလည်း နှစ်နာရီလောက် တန်းစီမှ ရတာ။ အခု စက်က (၃) လုံးပဲ ရှိတော့ လုပ်ရတာ နှေးတယ်။ တကယ်လို့ စာအုပ်ရှိရင်တော့ တန်းစီစရာမလိုတော့ဘူး၊ စာအုပ်ကို ထိုးပေးလိုက်ရုံပဲ” ဟု ၎င်းက ပြောသည်။

ယင်းကဲ့သို့ လုပ်ဆောင်မှု ကြန့်ကြာခြင်းကြောင့် အချိန်ကြာမြင့်စွာ တန်းစီရခြင်း၊ စောင့်ဆိုင်းရခြင်းကြောင့် ဒေသခံများအတွက် အခက်အခဲဖြစ်စေကြောင်း ပြောသည်။

“နေပူပူ၊ မိုးရွာရွာ တန်းစီးရတယ်၊ တချို့ဆိုရင် တန်စီးရင်းနဲ့ မူးလဲသွားတဲ့သူလည်း ရှိတယ်။ အခုမှ စာအုပ်အသစ်လုပ်တဲ့သူဆိုရင် စာရင်းသွင်းရင် ၁၀၀ဘတ် ပေးရတယ်၊ နောက်ပြီး အပေါ်မှာ ၁၀၀ ထပ်ပေးရတယ်။ တကယ်လို့ စမတ်ကတ်မရှိတဲ့သူဆိုရင် ၂၀၀ဘတ် ထပ်ပေးရတယ်” ဟု ၎င်းက ထပ်လောင်းပြောသည်။

ပင်လယ်ရေ မျက်နှာပြင် အမြင့်ပေ ၁,၂၀၀ ကျော်တွင်ရှိသော တာချီလိတ်မြို့တွင် မိုးအဆက်မပြတ် ရွာသွန်းမှုကြောင့် နှစ်စဉ်နှစ်တိုင်း ရေလွှမ်းမိုးခံရလေ့ရှိသော်လည်း ယခုနောက်ပိုင်းတွင် မယ်ဆိုင်မြစ်အထက်ပိုင်း ရွှေတူးဖော်မှုများကြောင့် ပိုဆိုးရွာလာကြောင်း ဒေသခံများက ပြောသည်။

ပြီးခဲ့သည့် ၂၀၂၄ စက်တင်ဘာလတွင်လည်း ယာဂီမုန်တိုင်း၏ အရှိန်ကြောင့် ထိုင်း-မြန်မာနယ်စပ် တာချီလိတ်မြို့တွင် မကြုံစဖူး ရေကြီးရေလျှံမှု ဖြစ်ပေါ်ခဲ့ပြီး နေအိမ်အများအပြား ရေလွှမ်းမိုးပျက်စီးခဲ့ရသည်