စစ်ခေါင်းဆောင် မင်းအောင်လှိုင်ထံ ယာယီသမ္မတရာထူး လွှဲပြောင်းပေးခဲ့သည့် ဦးမြင့်ဆွေသည် ယနေ့ (ဩဂုတ်လ ၆ ရက်) နံနက်အစောပိုင်းတွင် နေပြည်တော်ရှိ အမှတ်(၂) ကုတင် ၁၀၀၀ စစ်ဆေးရုံကြီးတွင် သေဆုံးသွားကြောင်း သတင်းထွက်ပေါ်နေသည်။
၂၀၂၁ ခုနှစ် ဖေဖော်ဝါရီ ၁ ရက်တွင် စစ်တပ်အာဏာသိမ်းစဉ်က ယာယီသမ္မတအဖြစ် ဆောင်ရွက်ခဲ့သည့် ဦးမြင့်ဆွေသည် အာရုံကြော နှေးကွေးတုန့်ဆိုင်းသည့် ရောဂါကို ခံစားနေရပြီး ဇူလိုင်လ (၂၄) ရက်၌ ဆေးကုသမှု ထပ်မံခံယူခဲ့ချိန်တွင် အသက် (၇၄) နှစ်အရွယ် ရှိပြီဖြစ်ကြောင်း သိရသည်။
ယာယီသမ္မတ ဦးမြင့်ဆွေ၏ ကျန်းမာရေးအခြေအနေနှင့် ပတ်သက်၍ ၂၀၂၃ နှစ်ဆန်းပိုင်းမှ စတင်ပြီး လှုပ်ရှားမှု တုန့်နှေးခြင်းနှင့် အစာ အာဟာရ စားသုံးနိုင်မှု အားနည်းလာပြီး ၂၀၂၄ ခုနှစ်တွင် စင်ကာပူနိုင်ငံ၌လည်းကောင်း၊ ၂၀၂၅ မေလတွင် နေပြည်တော် အမှတ်(၂) စစ်ဆေးရုံ၌လည်းကောင်း ဆေးကုသမှု ခံယူခဲ့သော်လည်း သက်သာလာခြင်း မရှိကြောင်း စစ်ကောင်စီ၏ ယမန်နေ့ (ဩဂုတ် ၅ ရက်) ထုတ်ပြန်ချက်တွင် ဖော်ပြထားသည်။
အဆိုပါ ယာယီသမ္မတ ဦးမြင့်ဆွေ သေဆုံးမှုနှင့် ပတ်သက်၍ ယနေ့ နေ့လယ်ပိုင်း၌ စစ်ကောင်စီ၏ ပြောရေးဆိုခွင့်ရှိသူ ဗိုလ်ချုပ်ဇော်မင်းထွန်းက ယာယီသမ္မတ ဦးမြင့်ဆွေ ကွယ်လွန်သည်ဆိုသော သတင်းမှာ မှန်ကန်မှုမရှိဘဲ အမှတ်(၂) စစ်ဆေးရုံတွင် ဆေးကုသမှု ခံယူနေကြောင်း ငြင်းဆိုထားသည်။
စစ်ခေါင်းဆောင် မင်းအောင်လှိုင်သည် ၎င်းတို့ တင်မြှောက်ခဲ့သည့် ယာယီသမ္မတ ဦးမြင့်ဆွေကို ယမန်နှစ် ၂၀၂၄ ဇူလိုင်လအတွင်း ကျန်းမာရေး အကြောင်းပြကာ အနားပေးခဲ့ပြီး NLD အစိုးရလက်ထက် ဒုသမ္မတဖြစ်သူ ဦးဟင်နရီဗန်ထီးယူကိုလည်း အလားတူ အနားပေးခဲ့ကာ ယာယီသမ္မတ ရာထူးအား သူ့ကိုယ်သူ ပြန်လည်ပေးအပ်ခဲ့သည်။
ပြီးခဲ့သည့် ဇူလိုင်လ ၃၁ ရက်တွင် ကုန်ဆုံးမည့် အရေးပေါ်ကာလကို သက်တမ်းမတိုးဘဲ ယာယီသမ္မတ ဦးမြင့်ဆွေ က တပ်မတော်ကာကွယ်ရေးဦးစီးချုပ်ထံ အာဏာလွှဲအပ်ထားသည့် အမိန့်ကို အမျိုးသားကာကွယ်ရေးနှင့် လုံခြုံရေးကောင်စီတွင် ယာယီသမ္မတ ရာထူး လွှဲယူထားသည့် စစ်ခေါင်းဆောင် မင်းအောင်လှိုင် ကိုယ်တိုင်က ပယ်ဖျက်ပေးလိုက်သည်။
ပုံစာ – ယာယီသမ္မတ ဦးမြင့်ဆွေ
Leave a Comments