သျှမ်းပြည် ရွာငံမြို့နယ် ရွာငံ-အောင်ပန်းလမ်းမကြီးပေါ်တွင် ဓနု ပြည်သူ့ကာကွယ်ရေးတပ်မတော် က စစ်ကောင်စီ ထုတ်ကုန် ရောင်းချမှု ရှိ၊ မရှိကို ရှောင်တခွင် ဝင်ရောက်စစ်ဆေးနေကြောင်း သတင်းရရှိသည်။

ယမန်နေ့ (သြဂုတ် ၃)ရက် တွင် ဓနုပြည်သူ့ကာကွယ်ရေးတပ် ၁၀၀၃တပ်ရင်း က ရွာငံ-အောင်ပန်းလမ်းမကြီးပေါ်တွင် စစ်ကောင်စီထုတ်ကုန်များဖြစ်သည့် မြန်မာဘီယာ၊ မြဘုရင် နို့ဆီ၊ ရွှေဖီဦး ကော်ဖီထုတ်၊မန္တလေးဘီယာ၊ MPT ဆင်းကဒ်များ၊ မိုင်တဲလ်ဆင်းကဒ်များ၊ Red Ruby စီးကရက်၊ Premium gold စီးကရက်၊ BlackShield ဘီယာ၊ မန္တလေးရမ်၊ အာမီရမ် ရောင်းချ၊ သုံးစွဲမှု ရှိ၊မရှိ ဝင်ရောက်စစ်ဆေးနေကြောင် ယနေ့ (သြဂုတ် ၄)ရက်စွဲဖြင့် ဓနု PDF ကထုတ်ပြန်ခဲ့သည်။

ထို့အပြင် စစ်ကောင်စီထုတ်ကုန်များကို ရောင်းချခြင်း၊ သုံးစွဲခြင်း ကို တွေ့ရှိလျှင်လည်း ပစ္စည်းများကို ထိန်းသိမ်းသွားမည်ဟုလည်း ၎င်းထုတ်ပြန်ချက်တွင်ရေးသားထားသည်။

ရွာငံသည် စစ်ကောင်စီတပ် စိုးမိုးနယ်မြေဖြစ်သောကြောင့် စစ်တပ်ထုတ်ကုန်နှင့် လွတ်ကင်းသူများ မရှိသလောက် နည်းပါးကြောင်း အသက် ၂၀ကျော်အရွယ်ရှိ အမျိုသမီးတစ်ဉီးက သျှမ်းသံတော်ဆင့်ကို ပြောသည်။

“စစ်တပ်ထုတ်ကုန် မရောင်းတဲ့ဆိုင်လို့တော့ ခပ်ရှားရှားပဲ။ ဒီနယ်က စကစ စိုးမိုးနယ်မြေလေ။ပြီးတော့ ပြည်သူတွေက ဘယ်ဟာက စကစ ထုတ်ကုန်ဆိုတာ မသိတာများတယ်။ သူတို့ဆီ ရောင်းကောင်းတဲ့ ဟာပဲ ကုန်ဝယ်ထားကြတာ။”ဟု ၎င်းအမျိုးသမီးက ဆိုသည်။

အလားတူ ယမန်နေ့ (သြဂုတ် ၃)ရက် တွင်လည်း ဓနု PDF တပ်သည် ရွာငံ-အောင်ပန်း လမ်းကြီးပေါ်ရှိ ရေပြာအိုင်အနီးတွင် ယာဉ်အသွား အလာများကို စစ်ဆေးခြင်း၊ မူးယစ်ဆေးအန္တရာယ်များ ကာကွယ်ရန်စစ်ဆေးခြင်းများ ပြုလုပ်ခဲ့ကြောင်း ထုတ်ပြန်ချက်တွင် ဖော်ပြထားသည်။

လက်ရှိအခြေအနေသည် ရွာငံမြို့နယ်အတွင်းနေထိုင်သည့် ပြည်သူများသည် တော်လှန်ရေးတပ်ဖွဲ့နှင့် စစ်ကောင်စီတပ်ဖွဲ့ကြား နေထိုင်ရသည်မှာ အလွန်ပင်ခက်ခဲကြောင်း၊ အပြိုင်အဆိုင် ထုတ်ပြန်ချက်ထုတ်မှုကြောင့် လူထုများလည်း သတိဝိရိယဖြင့် နေထိုင်နေရကြောင်း ဒေသခံများက ပြောဆိုသည်။

အဆိုပါ ဓနု PDF တပ်သည် ရွာငံတွင် အခြေစိုက်ပြီး ဒေသတွင်း ကာကွယ်ရန်နှင့် စစ်ကောင်စီတပ်များကို တွန်းလှန်တိုက်ခိုက်ရန် ရည်ရွယ်ဖွဲ့စည်းခဲ့ကာ ပြီးခဲ့သည် ၂၀၂၂ ခုနှစ် ဇွန်လ ၁၄ ရက်နေ့တွင် စတင်ဖွဲ့စည်းခဲ့ခြင်း ဖြစ်ကြောင်း သိရသည်။