တုံကင်ပင်လယ်ကွေ့တွင် ဖြစ်ပေါ်နေသည့် အပူပိုင်းမုန်တိုင်း ဝီဖာ (WIPHA) မုန်တိုင်း၏ ရိုက်ခတ်မှုကြောင့် ထိုင်း-မြန်မာနယ်စပ် တာချီလိတ်မြို့တွင် မိုးကြီးလေပြင်းတိုက်ခဲ့ကြောင်း သိရသည်။
ယမန်နေ့ (ဇူလိုင် ၂၁) ရက်နေ့ ည (၇) နာရီတွင် ဝီဖာ (WIPHA) မုန်တိုင်း၏ ရိုက်ခတ်မှုကြောင့် ထိုင်း-မြန်မာနယ်စပ် တာချီလိတ်မြို့ပေါ်ရှိ ရပ်ကွက်များတွင် သစ်ပင်ကြီးများ ကျိုးကျ၊ ဓာတ်အားကြိုးများ ပြတ်ကျပြီး လျှပ်စစ်ဓာတ်အား ခေတ္တပြတ်တောက်ခဲ့ကြောင်း တာချီလိတ်မြို့ ဒေသခံများက ပြောသည်။
ထို့ပြင် တာချီလိတ်မြို့ ရန်အောင်မြေရပ်ကွက် လွှမ်းမိုးဘုန်းတော်ကြီးကျောင်းရှေ့ လမ်းမတွင် လေပြင်းတိုက်ခတ်မှုကြောင့် သစ်ပင်များကြိုကျကာ လျှပ်စစ်မီးကြိုးများ ပြတ်တောက်ပြီး အနီးပတ်ဝန်းကျင်ရှိ ဆိုင်ကယ်ပြင်ဆိုင်မှ အမျိုးသား ၂ ဦး ဓာတ်လိုက်မှုဖြစ်ပွားခဲ့ကြောင်း သိရသည်။
“မနေ့ညကတော့ လေတိုက်တာ တော်တော်လေးပြင်းတယ်၊ သစ်ပင်တွေရော၊ မီးကြိုးတွေရော ပြတ်ကျတာ။ ဒီနေ့လည်း မိုးတွေဆက်ရွာနေသေးတယ်၊ မုန်တိုင်းလည်း ဝင်မယ်ကြားတယ်” ဟု တာချီလိတ်မြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
ဝီဖာ (WIPHA) မုန်တိုင်း၏ ရိုက်ခတ်မှုများကြောင့် လာမည့်ရက်ပိုင်းအတွင်း ထိုင်းနိုင်ငံ ချင်းရိုင်၊ မယ်ဆိုင်၊ မြန်မာနိုင်ငံ သျှမ်းပြည်အရှေ့ပိုင်း တာချီလိတ်၊ တာလေ၊ မိုင်းဖြတ်၊ မိုင်းဆတ်၊ မိုင်းတုံနှင့် သျှမ်းပြည်တောင်ပိုင်း မိုင်းပန်၊ လင်းခေး၊ ကျိုင်းတောင်းတို့တွင်လည်း မိုးကြီးရေလျှံနိုင်ကြောင်း သိရသည်။
ထိုကြောင့် မြေနိမ့်ပိုင်းတွင် နေထိုင်ကြသော ပြည်သူများအနေဖြင့် ကြိုတင်ပြောင်းရွှေ့နေထိုင်ကြရန် မိုးလေဝသနှင့် ဇလဗေဒ က အသိပေးထားသည်။
လက်ရှိ တုံကင်ပင်လယ်ကွေ့တွင် ဖြစ်ပေါ်နေသည့် အပူပိုင်းမုန်တိုင်း ဝီဖာ (WIPHA) သည် အားကောင်းသော အပူပိုင်းမုန်တိုင်းဖြင့် ဗီယက်နမ်နိုင်ငံ မြောက်ပိုင်းကမ်းခြေကို စတင်ဖြတ်ကျော်နေသည်။
အဆိုပါမုန်တိုင်းသည် လာမည့် ဇူလိုင် ၂၃ ရက်တွင် လာအိုနိုင်ငံကို ကုန်းတွင်းမုန်တိုင်းငယ်အဖြစ် ဝင်ရောက်ပြီး အားလျှော့သွားမည်ဟု မိုးလေဝသနှင့် ဇလဗေဒ က ခန့်မှန်းထားသည်။
အလားတူ ဇူလိုင် ၂၄ ရက်အထိ နေပြည်တော်၊ ရန်ကုန်၊ မန္တလေး၊ ပဲခူး၊ မကွေး၊ ဧရာဝတီ၊ တနင်္သာရီ၊ ကယား၊ ကရင်၊ မွန်နှင့် သျှမ်းတို့တွင်လည်း မိုးထစ်ချုန်းဆက်ရွာပြီး ဒေသအလိုက် မိုးဆက်ကြီးမည်ဟု မိုးလေဝသနှင့် ဇလဗေဒက ထုတ်ပြန်ချက်ထဲတွင် ဖော်ပြထားသည်။
Leave a Comments