သျှမ်းပြည်တောင်ပိုင်း ကွန်ဟိန်းမြို့နယ် ကာလိမြို့ရှိ ကေတီဗွီ (KTV) တစ်ခုတွင် အသက် ၂၅ အရွယ်ရှိ အမျိုးသမီးတစ်ဉီး Happy Water သောက်သုံးပြီး သေဆုံးမှု ဖြစ်ပွားခဲ့ကြောင်း သတင်းရရှိသည်။

ဖြစ်စဉ်မှာ ဇူလိုင်လ ၁၅ ရက်တွင် ကွန်ဟိန်းမြို့နယ် ကာလိမြို့၌ အသက် ၂၅ နှစ်အရွယ်ရှိ နန်းဆိုင်ခမ်းသည် ၎င်း၏ သူငယ်ချင်းများနှင့် အတူ KTV သွားပြီး မူးယစ်ဆေးရည် တစ်မျိုးဖြစ်သော Happy Water ကို အလွန်အကျွံ သောက်သုံးခဲ့သည်ဟု ဖြစ်စဉ်သိရှိသူများက ပြောဆိုသည်။

ထိုသို့ Happy Water အလွန်အကျွံ သောက်သုံးလိုက်မှုကြောင့် စိတ်ဂယောင်ခြောက်ခြားဖြစ်ပြီး ၎င်း၏ သူငယ်ချင်းများက ဇူလိုင်လ ၁၆ ရက်တွင် ဆေးရုံသို့ ခေါ်ဆောင်သွားသော်လည်း အဆိုပါနေ့ရက် နေ့လယ် ၂ နာရီတွင် သေဆုံးသွားခဲ့ကြောင်း ဖြစ်စဉ်ကို သိရှိသည့် အမျိုးသမီးတစ်ဉီးက သျှမ်းသံတော်ဆင့်ကို ပြောသည်။

“ကျမ သိရသလောက်ကတော့ Happy Water ကို အလွန်အကျွံသောက်ပြီး ကာလိဆေးရုံ ရောက်တော့ အသက်မမီတော့ဘူး၊ ဆုံးသွားတယ်” ဟု ဖြစ်စဉ်ကို သိထားသည့် အမျိုးသမီးတစ်ဉီးက ပြောသည်။

ကာလိမြို့ရှိ KTV ဆိုင်များတွင် မူးယစ်ဆေး တစ်မျိုးဖြစ်သည့် Happy Water ကို အလွယ်တကူ ရရှိနိုင်ပြီး၊ ဆယ်ကျော်သက် လူငယ်များကအစ စမ်းသပ်သောက်သုံးကာ လက်ရှိတွင် Happy Water သောက်သုံးသူ အများအပြား ရှိကြောင်းလည်း ၎င်းအမျိုးသမီးက ပြောသည်။

“ဒီမှာက အသက် ၁၄ နှစ်က စသုံးနေကြပြီ၊ အဲ့Happy Water က အလွယ်တကူ ဝယ်လို့ရတယ်။ KTV ဆိုင်တိုင်းမှာ ရောင်းနေတာပဲ” ဟု အထက်ပါ အမျိုးသမီးက ပြောဆိုသည်။

ကာလိမြို့ရှိ KTV ဆိုင်ထဲ တစ်ကြိမ်ဝင်လျှင် ကျပ်သိန်း ၂၀ မှ သိန်း ၃၀ ထိ ကုန်ကျကြောင်း၊ ထိုအထဲတွင် K ဟုခေါ်သည့် Ketamine မူးယစ်ဆေးတစ်မျိုးနှင့် Happy Water ကိုပါ ရောင်းချနေပြီး၊ Happy Water တစ်ထုတ်လျှင် အရက်ခွက် အသေးစား (၆)ခွက်ရရှိကြောင်း၊ ၂ ခွက်ထက် ကျော်လွန်ပြီး သောက်သုံးလျှင် ဆိုးကျိုးဖြစ်နိုင်ကြောင်း သောက်သုံးသူများက ပြောသည်။

ကာလိမြို့တွင် ယမန်နှစ် ၂၀၂၄ ခုနှစ်မှ စပြီး KTV ဆိုင်များ ပိုမိုပေါများလာပြီး Happy Water မူးယစ်ဆေး သောက်သုံးပြီး သေဆုံးမှုလည်း များလာကြောင်း ကာလိဒေသခံ အမျိုးသားတစ်ဉီးက ပြောသည်။

“ကာလိမှာ Happy Water သောက်ပြီး သေဆုံးတာ မဆန်းတော့ဘူး။ မေလတုန်းက အသက် ၁၆ နှစ် အမျိုးသမီးတစ်ဦး သေတယ်။ Happy Water သောက်ပြီး ကာလိဆေးရုံရောက်တာ သေဆုံးတာ အမျိုးသမီးတွေက ပုံမှန်လို ဖြစ်နေပြီ” ဟု ၎င်းဒေသခံ အမျိုးသားတစ်ဉီးက ဆိုပြန်သည်။

ကွန်ဟိန်းမြို့နယ် ကာလိဒေသသည် ကာလိပြည်သူ့စစ် တပ်မဟာ အမှတ် (၇) ထိန်းချုပ်ရာဒေသ ဖြစ်သည်။

အလားတူ ဇွန်လ ၂၁ ရက်တွင်လည်း မိုင်းပန်မြို့နယ်တွင် နေထိုင်သည့် အသက် ၁၆ နှစ်အရွယ် G-12 ကျောင်းသူ နန်းဟျိုးငင်းသည် KTVတစ်ခုတွင် Happy Water ငါးခွက်သောက်ပြီး ၎င်း KTV တွင် ရုတ်တရက် သေဆုံးသွားခဲ့သည်။

Happy Water ဆိုသည်မှာ MDMA (အက်တစီ)၊ မက်သာဖက်တမင်း၊ ဒိုင်ယာဇီပင်နှင့် ကက်တမင်းတို့ အပါအဝင် ဓာတုဆေးဝါးများဖြင့် အမှုန့်ကြိတ် အရည်ဖျော်စပ်ထားသည့် စိတ်ကြွဆေးရည်ဖြစ်သည်။

ထိုစိတ်ကြွဆေးရည်ကို ကော့တေးလ်ခွက်ဖြင့် ရေ၊ အချိုရည်၊ အရက် စသည့်ဖြင့် ရောကာ သောက်သုံးပြီးလျှင် လူကိုမပင်ပန်းစေဘဲ ပျော်ရွှင်မြူးတူး ကခုန်စေနိုင်သည့်အပြင် လူကို တက်ကြွစေသည့် အရည်တစ်မျိုးဖြစ်သည်။

သို့သော် ထိုစိတ်ကြွဆေးရည်ကို သောက်ပြီး ကခုန်ခြင်းမပြုပါက အရိုးအဆစ်များ အေးခဲလာပြီး ကြွက်သား၊ အကြောများ တောင့်တင်းလာကာ နောက်ဆုံးတွင် အသက်ဆုံးရှုံးရသည်အထိ ဖြစ်နိုင်သည်ဟု သုံးစွဲသူများထံမှ သိရသည်။