သျှမ်းပြည်တောင်ပိုင်း၊ ရွာငံမြို့နယ် တပင်ပျော်ကျေးရွာ အုပ်စု တပင်ပျော်ကျေးရွာတွင် ကျောင်းထိုင်သည့် ဘုန်းကြီးတစ်ပါး ပျောက်ဆုံးနေပြီး ယနေ့ အချိန်ထိ အစ အန ရှာမရသေးကြောင်း သတင်းရရှိသည်။

အဆိုပါ ပျောက်ဆုံးနေသော ဘုန်းကြီးသည် အသက် (၆၀) ဝန်းကျင် ရှိ၍ စစ်သားဟောင်း တစ်ဉီးဖြစ်ပြီး တပင်ပျော်ကျေးရွာတွင် ဘုန်းကြီးဝတ်ဖြင့် လာရောက်နေထိုင်သည်မှာ (၆)နှစ်ဝန်းကျင်ရှိကာ ရွာသူ/ရွာသား များနှင့်လည်း အဆင်ပြေမှုမရှိသည့်အပြင် ကျေးရွာများက အဆိုပါ ဘုန်းကြီးကို မကြိုက်ကြကြောင်း သိရသည်။

“အဲဘုန်းကြီးက ဗမာစစ်သားဟောင်းတဲ့။ စစ်သားတွေနဲ့လည်း အဆက်သွယ်လုပ်တယ် သတင်းပေးတာတွေလည်း ရှိမှာပေါ့။ ရွာကလူတွေနဲ့လည်း မတည့်ဘူး။ ဘုန်းကြီးကျောင်းထဲထိ လာဖမ်းသွားတယ် ကြားတယ်။ဘုန်းကြီးကားလည်း လမ်းဘေးမှာ ပျက်စီးနေဟာလည်း တွေ့တယ်ကြားတယ်။” ဟု သတင်းရင်းမြစ်က သျှမ်းသံတော်ဆင့်ကို ပြောသည်။

ပြီးခဲ့သည့် ဇွန်လ နောက်ဆုံးပတ်မှ စ၍ အဆိုပါ ဘုန်းကြီးပျောက်ဆုံးသွားခဲ့ပြီး ယနေ့အထိ သတင်း မရသေးပေ။

သို့သော် စစ်ကောင်စီ တပ်သားများကလည်း တပင်ပျော်ကျေးရွာ၊ သဖန်းပင်ကျေးရွာနှင့် ငွေတောင်ကျေးရွာဘက်သို စစ်အင်အား (၅၀)ဝန်းကျင် ဖြင့် နေ့စဉ်နီးပါး လာရောက်စစ်ကြောင်းထိုးနေ ကြောင်း ၎င်းကဆက်ပြောသည်။

ဆက်လက်ပြီး စစ်ကောင်စီ တပ်သားများသည် ရွာငံမြို့၏ မြောက်ဘက်သို့ စစ်ကြောင်းထိုးချိန်၌ အနီးနားကျေးရွာများမှ ကားများချောဆွဲ ယူဆောင်ခြင်း၊ လမ်းဘေးမုန့်ဆိုင်များထဲမှ စားစရာများနှင့် အရက်ဘီယာ များကိုလည်း သယ်ဆောင်သွားကြကြောင်း ရွာခံများထံမှ သိရသည်။

“သူတို့ စစ်ကြောင်းနဲ့ တွေ့ရင် ယောကျာ်းလေးတွေဆို စစ်ဆေးမေးမြန်းတာတွေ ဖမ်းခေါ်သွားတာတွေလုပ်တယ်။ လမ်းဘေးက ဆိုင်တွေမှာလည်း သူတို့လိုချင်တာ အကုန်ယူတယ်။ အသိတစ်ယောက်ရဲ့ကား ကို ဆီအပြည့်ဖြည့်ခိုင်းပြီး ယူသွားတာ ခုထိ ပြန်မပေးသေးဘူး။ စစ်တပ်က ရက်ခြားပြီး ရွာထဲတွေဝင်နေတာ သူတို့က တောက်လျှောက် စစ်ကြောင်းထိုးနေတာ။” ဟု ရွာခံ အမျိုးသားတစ်ဦးက ပြောသည်။

ယခုလက်ရှိ ရွာငံမြို့နယ်တွင် စစ်ကောင်စီတပ်သားများမှ နယ်စိုးမိုးထားပြီး ၎င်းတို့၏ စစ်ဆေးရေးဂိတ်တွင်လည်း အစစ်ဆေးတင်းကြပ်နေကြောင်း သိရသည်။

ပြီးခဲ့သည့် ဇူလိုင်လ (၂)ရက်ည ၈ နာရီဝန်းကျင်တွင် ရွာငံမြို့မြောက်ဘက် ကျေးရွာသို့ ဈေးဝယ်ရန် ထွက်လာသော ကျောင်းသားနှစ်ဦးသည် စစ်ကြောင်းထိုးသည့် စစ်ကောင်စီတပ်နှင့် ထိပ်တိုက်တွေ့ကာ ၎င်းကျောင်းသား နှစ်ဦးကို မသင်္ကာဟုဆို၍ ဖမ်းဆီးခေါ်ဆောင်သွားရာ ပြီးခဲ့သည့် ဇူလိုင်လ (၃)ရက်နေ့ မနက်တွင် ပြန်လွှတ်ပေးခဲ့ကြောင်း သိရသည်။