သျှမ်းပြည်ရှေ့ပိုင်း ကျိုင်းတုံဘက်မှ သယ်ဆောင်လာသည့် ကုန်ပစ္စည်းများ၊ ပါဆယ်ထုတ်များကို မိုင်းပွန်မြို့ရှိ စစ်ကောင်စီ၏ စစ်ဆင်ရေးဂိတ်တွင် သိမ်းဆည်းခံနေရကြောင်း သတင်းရရှိသည်။

ပြီးခဲ့သည့် ဇွန်လ မှစ၍ ကျိုင်းတုံ-တောင်ကြီး ၊ကျိုင်းတုံ -ရန်ကုန်စသည့် ခရီးသည်တင်သည့် လိုင်းကာများပေါ်တွင် ကုန်ပစ္စည်းများ ပါဆယ်များ တင်ဆောင်သွားခွင့်မပြုဘဲ ခရီးသည်သီးသန့်သာ တင်ဆောင်သွားရမည်ဟု စစ်ကောင်စီက ထုတ်ပြန်ခဲ့သည်။

ထိုထုတ်ပြန်ခဲ့ပြီးနောက် ၎င်း ကားပေါ်တွင် သယ်ဆောင်လာသည့်ကုန်ပစ္စည်း ပါဆယ်များကို သျှမ်းပြည်တောင်ပိုင်း မိုင်းပွန်မြို့ရှိ စစ်ကောင်စီ၏ စစ်ဆေးရေးဂိတ်တွင် သိမ်းဆည်းမှုပြုလုပ်ခဲ့ကြောင်း ကိုယ်တိုင်ကြုံတွေ့သည့် ကားသမားများက ပြောသည်။

“ကုန်သွယ်ရေးကတော့ တာချီလိတ် ၊ကျိုင်းတုံက ပါဆယ်ပစ္စည်းတွေကို တောင်ကြီးတို့ ရန်ကုန်တို့ကို ပို့လို့မရတော့ဘူး။ လမ်းက စစ်ရေးဂိတ်တွေက ဖမ်းတယ်၊ သိမ်းတယ်။ မိုင်းပွန်တံတားထိပ် အဖွဲ့က အဆိုးဆုံးပဲ။ လိုင်းကားတွေကို ပစ္စည်းမတင်ရဘူး ၊လူသီးသန့်ပဲ တင်ရမှာတဲ့။ကျိုင်းတုံကားကြီးဝင်းက ဂိတ်တွေ ပါဆယ်ပစ္စည်းတွေ လက်မခံတာ ကြာပြီ။” ဟု ကျိုင်းတုံ- တောင်ကြီး ပြေးဆွဲနေသည့် ကားသမား တစ်ဦးက ပြောသည်။

ထို့အပြင် ယခင်က ပစ္စည်းများ ပါဆယ်များကို လိုင်းကားများမှ ပို့လို့ရသော်လည်း ဂိတ်ရောက်သည့်အခါ ဖောက်ကြည့် စစ်ဆေးပြီးမှထည့်လို့ရသော်လည်း လက်ရှိအခြေအနေတွင် ပါဆယ်ပစ္စည်း များကို တင်ဆောင်ခွင့် မရတော့ကြောင်း ၎င်းက ဆက်ပြောသည်။

စစ်ကောင်စီ စစ်ဆေးရေးဂိတ်များမှ စစ်ဆေးရေးတင်းကြပ်မှုကြောင့် ခရီးသွားများအနေဖြင့်လည်း စိတ်အနှောက်အယှက် ဖြစ်နေကြာင်းနှင့် ကုန်ပစ္စည်း ပါဆယ်များကို ယခင်ကဲ့သို့ အလွယ်တကူပို့ဆောင်ခွင့် မရသောကြောင့် အွန်လိုင်းဈေးရောင်းသူ များမှာလည်း အခက်တွေ့ကြုံနေကြသည်။

“အခုက အရမ်းစစ်နေတာ ခရီးသည်တွေကို၊ သူတို့ဂိတ်နားရောက်ရင် လမ်းဆင်းလျှောက်ခိုင်းတာ သူမင်္ကာရင် ရစ်တာ လေသံမာမာနဲ့ ဆူတာတွေပါလုပ်တယ်။ သူတို့ကို ပိုက်ဆံမပေးရင်လည်း ကားက တော်တော်နဲ့ ဆက်သွားလို့မရဘူး။ ဟိုရှာဒီရှာ ဟိုတောင်းဒီတောင်းလုပ်တာ။ အွန်လိုင်းဈေးသည်တွေဆို သူတို့အတွက်ခက်သွားတာပေါ့။ ခရီးသွားရတာ အရင်လို စိတ်ချမ်းသာစရာ မကောင်းတော့ဘူး။ အကုန်ကြောက်နေရတာ။” ဟု ခရီးသွား အမျိုးသားတစ်ဦးက ပြောသည်။

ထိုကဲ့သို့ စစ်ကောင်စီမှ ကုန်ပစ္စည်းများနှင့် ပါဆယ်များကို လိုင်းကားပေါ်တွင် တင်ခွင့်မပြုသောကြောင့် တွဲကားများနှင့် ကားကြုံများမှသာလျှင် ထည့်နေရကြောင်း၎င်းကဆက်ပြောသည်။

ပြီးခဲ့သည့် ဇွန် ၁ ရက်နေ့မှ စပြီး ထိုင်း-မြန်မာနယ်စပ်မှ တရားဝင်အခွန်မဆောင်ဘဲ တင်သွင်းသည့် ကုန်ပစ္စည်းများကို သျှမ်းပြည်အတွင်း ဖမ်းဆီးနေပြီး ကုန်ဈေးနူန်းမြင့်တက်နေကြောင်း သိရသည်။

လက်ရှိ ထိုင်းနိုင်ငံထုတ် မားမား(မျက်လုံးတံဆိပ်) ခေါက်ဆွဲသည် ယခင် ၄၀၀ ကျပ်မှ လက်ရှိ ၁၀၀၀ကျပ် ၊ အမျိုးသားခေါင်းလျှော်ရည် ကျပ်တစ်သောင်းမှ လက်ရှိတွင် ကျပ်တစ်သောင်းခွဲအထိ ပေးဝယ်နေရပြီး ကြက်သားမှုန့် ကျပ် ၃၀၀ တန်သည် လက်ရှိ ကျပ် ၈၀၀ အထိ ဈေးမြင့်တက်နေကြောင်း သိရသည်