မြန်မာ-တရုတ်နယ်စပ် ဖြတ်သန်းခွင့်စာအုပ်ကို တစ်ရက်လျှင် လူဦးရေ ၃၀၀ အတွက်သာ ပြုလုပ်ပေးကြောင်း သတင်းရရှိသည်။

ယခုနှစ် ၂၀၂၅ နှစ်ဆန်းပိုင်းမှစပြီး မူဆယ်မြို့ ခရိုင် လူဝင်မှုကြီးကြပ်ရေး (လဝက) သည် မြန်မာ – တရုတ်နယ်စပ် ဖြတ်သန်းခွင့်စာအုပ်ကို တစ်ရက်လျှင် လူဦးရေ ၃၀၀ အတွက်သာ လုပ်ပေးနေသည့် အပြင် စာအုပ်များရရှိရန် အတွက်လည်း ၅ လကျော်ကြာ စောင့်ဆိုင်းရကြောင်း မူဆယ်မြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“အရင်တုန်းက စာအုပ်လုပ်ပေးတာ မြန်တယ်၊ အခုက အဲ့လိုမဟုတ်ဘူး လုပ်ပေးတာက နှေးတယ်။ အရင်က သက်တမ်းတိုးရင် ၃ ရက်လောက်ပဲ ကြာတာ၊ ခုက လနဲ့ချီ စောင့်နေရတယ်။ အရင်က တစ်ရက်ကို အယောက် (၁၀၀၀)ကနေ (၅၀၀) လောက်လုပ်ပေးတယ်။ ဒီနှစ်မှာ တစ်ရက်ကို အယောက် ၃၀၀ ထိပဲလုပ်ပေးတော့တယ်”ဟု မူဆယ်မြို့ဒေသခံ အမျိုးသားတစ်ဦးက ပြောသည်။

လက်ရှိတွင် နယ်စပ်ဖြတ်သန်းခွင့်စာအုပ်လုပ်ရန် တုံကင်ယူလျှင် ၃ လမှ ၄ လကြာ စောင့်ရပြီး လျှောက်လွှာတင်ရန်အတွက် ၁ လ ကျော်ကြာ ထပ်မံစောင့်ဆိုင်းရသည်။

အာဏာမသိမ်းခင်ကာလတွင် မြန်မာ – တရုတ်နယ်စပ်ဖြတ်သန်းခွင့် စာအုပ်ကို တစ်ရက်လျှင် အယောက် ၁၀၀၀ နှုန်းဖြင့် လုပ်ပေးခဲ့ကြောင်း သိရသည်။

ဆက်လက်ပြီး ပွဲစားမှတဆင့် မြန်မာ-တရုတ်နယ်စပ် ဖြတ်သန်းခွင့် စာအုပ်ကို တရုတ်ယွမ်ငွေ ၁၈၀၀ ( မြန်မာငွေ – ၁၀သိန်း မှ ၁၅ သိန်းကြား) လာဘ်ထိုးပေးလျှင် မည်သည့်ခရိုင်တွင် နေသူမဆို အမြန်ရကြောင်းလည်း ၎င်းက ဆက်ပြောသည်။

“ပွဲစားနဲ့ဆိုရင် တုံကင်ယူစရာမလိုဘူး၊ လူကိုယ်တိုင်လိုက်သွားပြီး စာရင်းဖြည့်တာနဲ့ ၁၀ ရက် ၁၅ရက်လောက် စောင့်ရင် စာအုပ်နီရပြီ။ လဝကတွေနဲ့က ဘယ်လောက် ပြန်ခွဲယူကြလည်း မသိဘူး။ အဲ့လိုကြတော့ ကျနော်တို့ ရိုးရိုးလုပ်တဲ့ လူတွေအတွက် အခက်အခဲတွေ ဖြစ်ကုန်တာပေါ့။ လုပ်ပေးတာ အချိန်ကြာတဲ့ အပြင်အခုက တစ်ရက်ကို လူနည်းနည်းပဲ လုပ်ပေးတော့ ပိုခက်ခဲကုန်တာပေါ့”ဟု မူဆယ်မြို့ဒေသခံ အမျိုးသားတစ်ဦးက ဆက်ပြောသည်။

မူဆယ်မြို့ လူဝင်မှုကြီးကြပ်ရေး (လဝက) တာဝန်ရှိသူများက နယ်စပ်ဖြတ်သန်းခွင့်လက်မှတ် စာအုပ်ကို ပွဲစားများဖြင့် လုပ်သည့် လူများကိုသာ ဦးစားပေးနေကြောင်းသိရသည်။

ထို့ကြောင့် အခြား‌ဒေသနေ ပြည်သူများအတွက် တရုတ်နိုင်ငံသို့ သွားရောက်ပြီး ကုန်ပစ္စည်းဝယ်ယူ တင်သွင်းနေသည့် ဒေသခံများမှာ အခက်အခဲဖြစ်စေ ကြောင်း၊ ဒေသခံများက ခရိုင်လဝက အရာရှိများ၏ လုပ်ဆောင်ချက်များကို ပြန်လည်ပြင်ဆင်ရန် တောင်းဆိုနေကြောင်း သိရသည်။

မြန်မာ-တရုတ်နယ်စပ် ဖြတ်သန်းခွင့်စာအုပ်ကို မူဆယ်ခရိုင်အတွင်း မူဆယ်၊ နမ့်ခမ်း၊ မန်ဟျိုး(မန်ဟီးရိုး) နှင့် ပန်ဆိုင်း(ကြူကုတ်)မြို့တို့မှ အိမ်ထောင်စုစာရင်း ရှိသူများကိုသာ လုပ်ပေးနေခြင်းဖြစ်သည်။