သျှမ်းပြည်တောင်ပိုင်း ရွာငံမြို့နယ် မြောက်ဘက်နှင့် အရှေ့ဘက်ကျေးရွာများသို့ စစ်ကြောင်းထိုးလာသည့် စစ်ကောင်စီတပ်မှ တပ်သားများသည် ကျောင်းသားနှစ်ဉီးကို ဖမ်းဆီးခေါ်ဆောင်သွားကြောင်း သတင်းရရှိသည်။
ဇူလိုင် (၂) ရက် ည ၈ နာရီ ဝန်းကျင်တွင် ရွာငံမြို့နယ် မြောက်ဘက်ကျေးရွာသို့ ဈေးဝယ်ရန် ထွက်လာသော ကျောင်းသားနှစ်ဉီးသည် စစ်ကြောင်းထိုးလာသည့် စစ်ကောင်စီတပ်နှင့် ထိပ်တိုက်တွေ့ကာ ၎င်းကျောင်းသားနှစ်ဉီးကို မသင်္ကာဟုဆိုကာ ဖမ်းဆီးခေါ်ဆောင်သွားပြီး ယမန်နေ့ (ဇူလိုင် ၃ ရက်)တွင် ပြန်လွှတ်ပေးခဲ့ကြောင်း ဖြစ်စဉ်သိရှိသူ ဒေသခံ အမျိုးသမီးတစ်ဉီးက သျှမ်းသံတော်ဆင့်ကို ပြောသည်။
“အဲဒီကလေးနှစ်ယောက်က မုန့်သွားဝယ်တာ၊ စစ်ကြောင်းထိုးလာတဲ့ စစ်တပ်နဲ့ လမ်းမှာ တွေ့တော့ ဖမ်းခေါ်သွားတာ။ သူတို့ကို စစ်ကြောင်းထိုးတဲ့ တောထဲထိ ခေါ်သွားတာတဲ့၊ ပြီးမှ သူတို့က ကျောင်းသားတွေလို့ ပြောတော့ မနက်အစောပိုင်းမှ သူတို့ကို ပြန်လွှတ်ပေးတာ။ စစ်သား သုံးလေးယောက်လောက်က ပြန်လိုက်ပို့တယ်လို့ ပြောတယ်” ဟု ဖြစ်စဉ်သိရှိသူ ရွာငံဒေသခံ အမျိုးသမီးတစ်ဦးက ပြောသည်။
အဆိုပါ ဖမ်းဆီးခံရသည့် ကျောင်းသားနှစ်ဦးသည် G-10 ကျောင်းသားများ ဖြစ်ကြပြီး ဆယ်ကျော်သက်အရွယ်သာ ရှိသေးကြောင်း သိရသည်။
အလားတူ ရွာငံမြို့နယ် အရှေ့ဘက်ရှိ မြစေတီ၊ မြသိန်းတန်ကျေးရွာဘက်တွင်လည်း စစ်ကောင်စီတပ်များ စစ်ကြောင်းထိုး ဝင်ရောက်ကာ တပ်စွဲထားပြီး ဖုန်းလိုင်း၊ အင်တာနက်လိုင်းများ ဖြတ်ထားသည်ဟု ဒေသခံများထံမှ သိရသည်။
“မြစေတီဘက်တို့ မြသိန်းတန်ဘက်ကိုတော့ မကြာခဏ စစ်ကြောင်း ဝင်ရောက်နေတယ်။ စစ်တပ်က အဲ့ဘက်မှာ PDF တွေ ရှိတယ်ဆိုပြီး စစ်ကြောင်းထိုးတယ်ဖြစ်မယ်။ ရွာသားတွေလည်း သူတို့လာရင် တောထဲ ပြေးပုန်းရတာနဲ့၊ သူတို့ကလည်း ရွာထဲဝင်လာပြီဆို အိမ်တွေထဲ မွှေနှောက်ပြီး စစ်ဆေးမေးမြန်းတာတွေ လုပ်လို့ သူတို့ကို ကြောက်နေရတာ” ဟု ရွာငံဒေသခံ အမျိုးသားတစ်ဦးက ပြောသည်။
ထို့အပြင် စစ်ကောင်စီတပ် စစ်ကြောင်းထိုး ဝင်ရောက်နေသည့် ကျေးရွာများတွင် ည ၇ နာရီနောက်ပိုင်း အိမ်ပြင်မထွက်ရန် စစ်ကောင်စီတပ်မှ အမိန့်ထုတ်ထားကြောင်း ၎င်းက ဆက်ပြောသည်။
ပြီးခဲ့သည့် ဇွန်လဆန်းပိုင်းမှ စတင်ပြီး စစ်ကောင်စီလက်အောက်ခံ ပျူစောထီးများက ရွာငံမြို့နယ် ကျေးရွာတစ်ချို့တွင် လက်နက်ပြခြိမ်းခြောက်မှုများ လုပ်ဆောင်ကာ ပြည်သူ့စစ်မှုထမ်းသင်တန်း အမှတ်စဉ် (၁၅) အတွက် စစ်သားစုဆောင်းပေးနေပြီး ၎င်းပျူစောထီးများအတွက် ကျေးရွာများမှ တစ်လလျှင် ငွေကျပ်(၇)သိန်း ပေးဆောင်နေရကြောင်း ဒေသခံများက ပြောသည်။
Leave a Comments