သျှမ်းပြည် အရှေ့ပိုင်း တာလေမြို့ရှိ တံတားကို စစ်ကောင်စီက ညအချိန်ဖြတ်သန်းသွားလာခွင့် ကန့်သတ်လိုက်သဖြင့် ဒေသခံများအတွက် ကျန်းမာရေး အရေးပေါ်လူနာအတွက် အခက်အခဲဖြစ်ကြောင်း သတင်းရရှိသည်။

တာလေမြို့ရှိ တံတားကို စစ်ကောင်စီက ည ၁၀ နာရီအချိန်ကျော်လျှင် မည်သည့်ယာဉ်မျှ ဖြတ်သန်းသွားလာခွင့် မပြုသည့်အပြင် အရေးပေါ်လူနာတင်ကားများကိုလည်း ဖြတ်သန်းသွားလာခွင့် မပြုသည့်အတွက် ဒေသခံများ နှင့် အရေးပေါ်လူနာများအတွက် အခက်အခဲ ဖြစ်စေကြောင်း လူမှုကူညီရေးအသင်းတစ်ခု၏ တာဝန်ရှိသူတစ်ဦးက သျှမ်းသံတော်ဆင့်ကိုပြောသည်။

“ အခုက အကြောင်းစုံ ရှင်းပြနေလည်း သူတို့က လုံးဝ ပေးမဖြတ်ဘူး။ည ၁၀ဆိုရင်ပိတ်ပြီ၊ မနက်မိုးလင်းမှ ဖွင့်တာ၊ ဒီလိုအခြေအနေဆိုရင် အက်ဆီးဒင့်ဖြစ်ပြီး ဒဏ်ရာရတဲ့ လူနာတွေ၊ မွေးလူနာတွေ၊ဖျားနာတဲ့လူတွေကို ကူညီတာမျိုးတွေကို ယာယီရပ်နားထားရမယ့် အခြေအနေဖြစ်နေတာ။”ဟု ၎င်းကပြောသည်။

ပြီးခဲ့သည့် (ဇွန်လ ၂၉ ရက်) ည ၈ နာရီတွင် တာ‌လေမြို့ရှိ အရပ်သားတစ်ဦက ယာဉ်မတော်တဆမှုကြောင့် တာလေမြို့မှ တဆင့် မိုင်းဖြတ်မြို့ရှိ စစ်ဆေးရုံသို့ လူမှုကူညီရေးအဖွဲ့တစ်ခုက ပို့ဆောင်ခဲ့ကြောင်းသိရသည့်။

ထိုလူနာကိုဆေးရုံသို့ ပို့ဆောင်ပြီးအပြန် တာလေမြို့ တံတားပေါ်၌ ည ၁ဝ နာရီခွဲ အချိန်တွင် ရောက်ရှိခဲ့ခြင်းကြောင့် တံတားတွင်စောင့်သည့် တာဝန်ရှိသူများကို အကျိုးအကြောင်း ရှင်းပြသော်လည်း ဂိတ်ကိုမဖွင့်ပေးသည့် အတွက်အရေးပေါ်ကားကို တာလေတံတားပေါ်တွင် ထားပြီး ပြန်လာခဲ့ရကြောင်းသိရသည်။

အလားတူ သျှမ်းပြည် တောင်ပိုင်း၊ အရှေ့ပိုင်းရှိ မြို့များတွင် စစ်ကောင်စီက အထက်အမိန့်ဟုဆိုကာ အချို့မြို့တွင် ည (၉)မှ နံနက် (၅)၊ အချို့မြို့တွင် ည (၁၀)မှ နံနက် (၆)အချိန်ထိ မြို့အဝင်အထွက်များကို ပိတ်ထားပြီး မည့်သည့်ယာဉ်ကိုမျှ ဖြတ်သန်းသွားလာခြင်းမပြုခြင်းကြောင့် ဈေးသည်များ၊ ဒေသခံများအပြင် လူမှုကူညီရေးအသင်းများ ကားသမားများပါ အခက်အခဲများဖြစ်စေကြောင်း ကားသမားတစ်ဦးကပြောသည်။

တာလေမြို့သည် တာချီလိတ် – ကျိုင်းတုံ ပြည်ထောင်စုလမ်းမကြီးပေါ်တွင်းတည်ရှိပြီး တာလေတံတားကို စစ်ကောင်စီ ခမရ ၃၁၆ တပ်က တာဝန်ယူစောင့်ကြပ်ထားကြောင်းသိရသည်။