သျှမ်းပြည်အရှေ့ပိုင်း မိုင်းလားမြို့ရှိ တာလော့ဂိတ်မှတဆင့် ကျားဖြန့်လုပ်ကိုင်သူ တရုတ်နိုင်ငံသား (၂၀၇) ဦးကို စစ်ကောင်စီမှ တရုတ်နှင့် သက်ဆိုင်ရာနိုင်ငံများသို့ လွှဲပြောင်းပေးခဲ့ကြောင်း သတင်းသိရသည်။
ဇွန်လ (၂၄) ရက်တွင် မိုင်းလားတပ်ဖွဲ့ NDAA နှင့် စစ်ကောင်စီတို့ ပူးတွဲထိန်းချုပ်ထားသည့် မိုင်းလားမြို့ တာလော့နယ်စပ်ဂိတ်တွင် မြန်မာနိုင်ငံအတွင်း နယ်စပ်လမ်းကြောင်းများမှတဆင့် တရားမဝင် ဝင်ရောက်လာပြီး အွန်လိုင်းကျားဖြန့် ငွေလိမ်လုပ်ငန်းများ လုပ်ဆောင်ခဲ့သော တရုတ်နိုင်ငံသား (၂၀၇) ဦးတို့ကို ပြည်နှင်ဒဏ်ပေးကာ သက်ဆိုင်ရာနိုင်ငံသို့ လွှဲပြောင်းပေးခဲ့ကြောင်း ယမန်နေ့ (ဇွန်လ ၂၉ ရက်) တွင် စစ်ကောင်စီလက်အောက်ခံ ပြန်ကြားရေးဝန်ကြီးဌာနမှ သတင်းဖော်ပြသည်။
သို့သော် ၎င်းကျားဖြန့်လုပ်ကိုင်သူ တရုတ်နိုင်ငံသားများကို မည်သည့်ဒေသ၊ မည်သည့်အချိန်တွင် ဖမ်းဆီးရမိခဲ့ကြောင်း အသေးစိတ်အချက်အလက်များ ဖော်ပြထားခြင်း မရှိပေ။
အမျိုးသားဒီမိုကရက်တစ်မဟာမိတ်အဖွဲ့ ခေါ် မိုင်းလားတပ်ဖွဲ့မှ ၎င်းတို့ဒေသအတွင်း အခြားသော လက်နက်ကိုင်အဖွဲ့အစည်းနှင့် နိုင်ငံရေးအဖွဲ့အစည်းတို့ကို လက်ခံထားခြင်း မရှိကြောင်း စစ်ခေါင်းဆောင် မင်းအောင်လှိုင်နှင့် ပြီးခဲ့သည့် မေလ (၂၅) ရက်တွင် ကျိုင်းတုံမြို့၌ တွေ့ဆုံစဉ် NDAA ခေါင်းဆောင်များမှ ပြောကြားခဲ့သည်။
ဗမာပြည်ကွန်မြူနစ်ပါတီမှ ခွဲထွက်လာသည့် မိုင်းလားတပ်ဖွဲ့ NDAA သည် သျှမ်းပြည်အရှေ့ပိုင်း မြန်မာ-တရုတ်နယ်စပ်ရှိ မိုင်းလား၊ ဆီလူး၊ နမ့်ပန်းဒေသများကို ထိန်းချုပ်ထားပြီး ယခင်စစ်အစိုးရနှင့် ၁၉၈၉ ခုနှစ်တွင် အပစ်ရပ် လက်မှတ်ရေးထိုးခဲ့ရာ အထူးဒေသ (၄) အဖြစ် သတ်မှတ်ထားသည်။
ပြီးခဲ့သည့် ၂၀၂၃ ခုနှစ် အောက်တိုဘာလမှ ၂၀၂၅ ခုနှစ် ဇန်နဝါရီလ အထိ မြန်မာ-တရုတ် နယ်စပ်တလျှောက် အွန်လိုင်းကျားဖြန့် ငွေလိမ်လုပ်ငန်းများတွင် ပါဝင်ပတ်သက်နေသည့် နိုင်ငံခြားသား (၅၆၀၀၀) နီးပါးကို စစ်ကောင်စီက ဖမ်းဆီး၍ ပြည်နှင်ဒဏ်ပေးခဲ့ကာ ၎င်းတို့ထဲမှ (၅၃၀၀၀) ကျော်ကို တရုတ်နိုင်ငံသို့ ပို့ဆောင်ခဲ့ကြောင်း စစ်ကောင်စီဘက်မှ ထုတ်ပြန်ထားသည်။
Leave a Comments