ထိုင်းနိုင်ငံ၊ ချင်းရိုင်ခရိုင်အတွင်း မိုးသည်းထန်စွာရွာသွန်းမှုကြောင့် ရုတ်တရက်ရေကြီးမှုများဖြစ်ပေါ်နေပြီး Wiang Chiang Dung ဆေးရုံအပါအဝင် လူနေအိမ်များ၊ လယ်စိုက်ခင်းများနှင့် အများပြည်သူအဆောက်အအုံများစွာ ထိခိုက်မှုများရှိခဲ့ကြောင်း The Nation Thailand သတင်းဌာနတွင်ဖော်ပြထားသည်။

ယမန်နေ့ (ဇွန်လ ၁၆ ရက်) ညပိုင်းအချိန်မှ စတင်၍ ယနေ့ (ဇွန်လ ၂၇ က်) မနက်ခင်းအထိ မိုးသည်းထန်စွာရွာသွန်းမှုကြောင့် ချင်းရိုင်းခရိုင်အတွင်းရှိ နေရာအများအပြား ရုတ်တရက်ရေမြင့်တက်မှုများဖြစ်ပေါ်လာပြီး အချို့နေရာများတွင် ခါးတဝက်မြှုပ်သည်အထိမြင့်တက်နေကြောင်းသိရသည်။

လက်ရှိအချိန်တွင် Wiang Chiang Dung ဆေးရုံနှင့် အနီးတဝိုက်တွင် ရေလွှမ်းမိုးမှုများဖြစ်ပေါ်နေပြီး ယနေ့တရက်တာအတွင်း ရေပြန်လည်ကျဆင်းခြင်းမရှိပါက ဆေးရုံဝန်ဆောင်မှုလုပ်ငန်းများအားရပ်နားထားပြီး အရေးပေါ်နှင့် မတော်တဆ ထိခိုက်မှုများအတွက်သာ ဖွင့်လှစ်ထားမည်ဟု ထုတ်ပြန်ထားသည်။

ထိုသို့ ရုတ်တရက်ရေကြီးမှုကြောင့် ဒေသခံများစိုက်ပျိုးရေးလုပ်သည့် လယ်ယာများစွာ ရေအောက်နှစ်မြှုပ်သွားခဲ့ပြီး ပျက်စီးဆုံးရှုံးမှုကြီးမားနိုင်ကြောင်းသိရသည်။

ရေကြီးမှုဆိုးဝါးစွာခံစားရသော ဒေသများမှ သက်ကြီးရွယ်အိုနှင့် အထိအခိုက်များနိုင်သော အုပ်စုများကို ဒေသအာဏာပိုင်များမှ အလျင်အမြန်ရွေ့ပြောင်းပေးနိုင်ရန်စီစဉ်နေပြီး အကူအညီလိုအပ်ပါက Line application မှတဆင့် Line ID @1784DDPM သို့မဟုတ် Hot Line နံပါတ် 1784 သို့ အချိန်မရွေးဆက်သွယ်နိုင်ကြောင်းလည်း ထုတ်ပြန်ထားသည်။