သျှမ်းပြည်တောင်ပိုင်း ဆီဆိုင်မြို့ နယ် ဘုရားဖြူကျေးရွာဘက်တွင် စစ်ကောင်စီပြုလုပ်ပေးသည့် စမတ်ကတ်များကို ကျပ်ငွေတစ်သောင်းခွဲ ပေးပြီး ပြုလုပ်နေရကြောင်း ဒေသခံများထံမှ စုံစမ်းသိရသည်။
ဆီဆိုင်မြို့တွင် စမတ်ကတ်များ ပြုလုပ်ရန် စစ်ကောင်စီလက်အောက်ခံ ဌာနဆိုင်ရာများမှ ညွှန်ကြားထားသော်လည်း စစ်ရှောင်နေသည့် ပြည်သူများမှာ မပြုလုပ်ရသေးသောကြောင့် ယခု ဇွန်လမှ စ၍ မဖြစ်မနေ လုပ်ဆောင်ရမည်ဖြစ်ပြီး စမတ်ကတ်ပြုလုပ်ရာတွင် အချိန်အခါပေါ် မူတည်၍ ငွေပေးဆောင်ခဲ့ရသည်ဟု ဒေသခံများက ပြောသည်။
“ဒီလထဲမှာပဲ ပထမ တစ်သုတ်က ကျပ်(၅၀၀၀)ပဲ၊ ဘုရားဖြူကျေးရွာမှာ တစ်သောင်းခွဲနဲ့ ပေးပြီးမှ လုပ်ရတယ်။ စမတ်ကတ်က လိုတယ်၊ ခရီးသွားရင် စမတ်ကတ်ကို အဓိက စစ်တော့ လိုအပ်တယ်။ ကလေးက မလိုဘူး၊ အသက် ၁၈ နှစ်ပြည့်ပြီးတဲ့သူတွေ လုပ်ရတာ။ စစ်ရှောင်ပြေးတုန်းက စမတ်ကတ်လုပ်တာဆို ၃သောင်း ၄ သောင်း တောင်းတယ်။ မှတ်ပုံတင်နဲ့ အိမ်ထောင်စုဇယားနဲ့ နာမည်မတူရင် ပြန်လဲခိုင်းတယ်” ဟု ဆီဆိုင်ဒေသခံ အမျိုးသမီးတစ်ဦးက ပြောသည်။
စစ်ကောင်စီမှ ပြုလုပ်ပေးသည့် စမတ်ကတ်သည် ပြည်သူများ၏ ကိုယ်ရေးအချက်အလက်များကို သိမ်းဆည်းကာ နေ့စဉ်လှုပ်ရှားမှုများကို လေ့လာစောင့်ကြည့်ပြီး စစ်ဆေးရေးဂိတ်နှင့် နယ်စပ်ဂိတ်များတွင် စမတ်ကတ်ရှိမှ ခရီးသွားလာ၍ ရကြောင်း ၎င်းက ဆက်ပြောသည်။
“စမတ်ကတ်မရှိရင် နိုင်ငံခြားထွက်လို့လည်း မရဘူး။ စစ်ဆေးရေးဂိတ်တွေမှာဆိုလည်း စမတ်ကတ် အရင် စစ်တာ။ စမတ်ကတ်မပါရင် အရမ်းရစ်တာ၊ တခါတလေဆို ငွေပေးခဲ့ရတာ” ဟု နမ့်စန်မြို့ခံ အမျိုးသမီးငယ်တစ်ဦးကလည်း သျှမ်းသံတော်ဆင့်ကို ပြောသည်။
၂၀၂၃ ခုနှစ်မှ စတင်ပြီး UID ခေါ် စမတ်ကတ်များကို မြန်မာနိုင်ငံသားတိုင်း လုပ်ဆောင်ရမည်ဟု စစ်ကောင်စီက ထုတ်ပြန်ပြီး ရွာငံမြို့၊ နမ့်စန်မြို့နှင့် ပင်လုံမြို့ဘက်တွင် စမတ်ကတ်များကို အခမဲ့နီးပါး လုပ်ဆောင်ပေးသော်လည်း တောင်ကြီးမြို့နှင့် ဆီဆိုင်မြို့တို့တွင် ငွေကျပ်သောင်းချီပေးမှ စမတ်ကတ်လုပ်ပေးကြောင်း မြို့ခံများထံမှ သိရသည်။
ထို့အပြင် ရွာငံတွင်လည်း ဒေတာအချက်အလက်ပြည့်စုံသည့် စမတ်ကတ် လုပ်ထားသူများအား ပျူစောထီးများက စစ်မှုထမ်းခေါ်ရန် အစည်းအဝေး ခေါ်ဆောင်နေသည်ဟု ဒေသခံများကပြောသည်။
စမတ်ကတ်များကို NLD အစိုးရလက်ထက်တွင် နိုင်ငံသားမှတ်ပုံတင်စနစ်ကို တိကျစွာ အချက်အလက် သိမ်းဆည်းနိုင်ရန်၊ လူ့အခွင့်အရေးနှင့် နိုင်ငံသား တရားဝင်မှုအား စံပြဖြစ်ရန် ကြိုးပမ်းခဲ့ဖူးသော်လည်း စီမံကိန်း မစခဲ့ရပေ။
၂၀၂၁ ခုနှစ်တွင် တိုင်းပြည်အာဏာကို ရွေးကောက်ခံ အရပ်သားအစိုးရလက်ထဲမှ စစ်ကောင်စီ သိမ်းပိုက်လိုက်သည့်နောက်ပိုင်း နိုင်ငံသားများ၏ ကိုယ်ရေး အချက်အလက်နှင့် သတင်းအချက်အလက်များကို ပိုမိုထိန်းချုပ်သည့်အပြင် ပြည်သူ့ စစ်မှုထမ်းရန်အတွက်လည်း စစ်ကောင်စီက စမတ်ကတ်ပါ ဒေတာများအား အသုံးပြုနေသည်ဟု သုံးသပ်ပြောဆိုမှုများလည်း ရှိသည်။
Leave a Comments