သျှမ်းပြည်တောင်ပိုင်း၊ ရွာငံမြို့တွင် စစ်ကောင်စီခန့်အပ်ထားသည် အထွေထွေအုပ်ချုပ်ရေးမှူး ဝန်ခမ်း (၃)ဦးကို အမည်မသိ လက်နက်ကိုင်အဖွဲ့မှ ဖမ်းဆီးသွားပြီး ယနေ့အထိ ထုတ်ပြန်ချက်တစ်စုံတရာ မထုတ်ပြန်လာကြသေးကြောင်း စုံစမ်းသိရှိရသည်။
ပြီးခဲ့သည့် ဇွန်လ (၁၁)ရက် နံနက်ပိုင်းတွင် တောင်ကြီး-ရွာငံလမ်းပိုင်း တစ်နေရာ၌ ထွေအုပ်ဝန်ထမ်း (၃)ဦးကို လက်နက်ကိုင်အဖွဲ့တစ်ခုမှ ဖမ်းဆီးခေါ်ဆောင်သွားခဲ့ပြီး မည်သည့် အဖွဲ့မှ ခေါ်ဆောင်သွားသည်ကို ယနေ့အထိ ထုတ်ပြန်ချက်တစ်စုံတရာ ထုတ်ပြန်လာခြင်းမရှိသေးကြောင်း သတင်းရင်းမြစ်များထံမှ သိရသည်။
“ဟုတ်တယ် ထွေအုပ်က ဝန်ထမ်း (၃)ဦးကို ဖမ်းသွားတာတဲ့။PDFအဖွဲ့ ကပဲဖမ်းသွားတာ ဘယ်အဖွဲ့က ဖမ်းသွားတာလဲတော့ မသိဘူး။ စစ်မှုထမ်းကိစ္စကြောင့် ပဲထင်တယ်။ ဝန်ထမ်းက ယောကျာ်း လား မိန်းမလားမသိဘူး။”ဟု သတင်းရင်းမြစ်တစ်ဦးက ပြောသည်။
ထိုသို့ ထွေအုပ်ဝန်ထမ်းများကို ဖမ်းဆီးခံရပြီးနောက် ရွာငံအရှေ့ဘက် မြစေတီနှင့်မြသိန်းတန် ကျေးရွာဘက်သို့ စစ်ကောင်စီတပ် အင်အား (၁၀၀) ဝန်းကျင်နှင့် ပြီးခဲ့သည့် ဇန်နဝါရီလ (၁၂)ရက်တွင် စစ်ကြောင်းထိုးနေပြီး ဒေသခံနေအိမ်များကို ဝင်ရောက်ရှာဖွေခြင်း တပ်စွဲခြင်းများ ပြုလုပ်နေသည်ဟု ဒေသခံများက ပြောသည်။
“အခုမြစေတီဘက်မှာ စစ်တပ်က တပ်စွဲထားတယ်။အင်အား (၁၀၀)လောက်လို့ သိရတယ်။ဒေသခံ နေအိမ်တွေထဲ ဝင်ပြီး မွှေနှောက်ရှာဖွေတာများ လုပ်တယ်။မြစေတီဖက်ကတော့ ပြည်သူတွေတော့ အနေကြပ် အစားကြပ်ဖြစ်တာပေါ့။မြသိန်းတန် ရွာကိုလည်း စစ်တပ်ဝင်တယ်။ တခြားပြည်သူတွေ ကိုရိုက်နှက်တာမျိုး ဖမ်းဆီးတာမျိုးတော့ မသိရသေးဘူး။” ဟု ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
အဆိုပါ စစ်ကောင်စီတပ်သားများသည် ယနေ့အထိ ရွာငံမြို့အရှေ့ဖက် ကျေးရွာများကို စစ်ကြောင်းထိုးနေပြီး ဒေသခံနေအိမ်များတွင်လည်း တပ်စွဲနေထိုင်လျှက်ရှိသည်ဟု ၎င်းက ဆက်ပြောသည်။
အကြမ်းဖက်အာဏာဖီဆန်ရေး (CDM)လှုပ်ရှားမှုတွင် ပါဝင်မှုမရှိသည့် ဝန်ထမ်းများကို အရေးယူဆောင်ရွက်သွားမည်ဆိုသည့် ဥပဒေတစ်ရပ်ကို ပြည်ထောင်စုလွှတ်တော်ကိုယ်စားပြုကော်မတီ(CRPH)က ဇွန်လ (၁၃)ရက်တွင် ပြဌာန်းလိုက်သည်။
ထိုဥပဒေပြဌာန်းပြီးနောက် ဇွန်လ (၁၅)ရက် မနက် (၉)နာရီဝန်းကျင်တွင် မန္တလေးတိုင်း၊ ညောင်ဦးမြို့နယ်တွင် ကျောင်းအုပ်ဆရာမနှင့် ၎င်း၏ ခင်ပွန်းဖြစ်သူတို့ သေနတ်ဖြင့်ပစ်ခံရပြီး သေဆုံးသွားခဲ့ရသည်။
Leave a Comments