သျှမ်းပြည်တောင်ပိုင်း၊ ဖယ်ခုံမြို့နယ် အနောက်ဘက် လအိကျေးရွာရှိ ကလေးငယ်များစာသင်ကြားနေသည့် ဘုန်းတော်ကြီးကျောင်း (ဘကကျောင်း) ကို စစ်ကောင်စီမှ ဒရုန်းဖြင့် ဗုံးကြဲပစ်ခတ်သောကြောင့် မူလတန်းမှ ကလေးငယ် (၂)ဦး ထိခိုက်ဒဏ် ရာရရှိသွားကြောင်း သိရှိရသည်။
ယနေ့ ဇွန်လ (၁၆) ရက်နေ့ နံနက်ပိုင်းတွင် စစ်ကောင်စီမှ ဘကကျောင်းအာ ဒရုန်းဖြင့် ဗုံးကြဲ တိုက်ခိုက်ခဲ့ပြီး စာသင်နေသည့် ကလေးငယ် (၂)ဦး ထိခိုက်ဒဏ်ရာ ရရှိခဲ့ကာ ဘုန်းကြီးကျောင်းမှ ပရဝဏ် အချို့ ပျက်စီးသွားခဲ့ပြီး စစ်ကောင်စီမှ ထိုးစစ်ဆင် တိုက်ခိုက်မှုများ ပြုလုပ်နေကြောင်း ဖယ်ခုံ ပြည်သူ့ လုံခြုံရေးတပ်ဖွဲ့က ထုတ်ပြန်လာသည်။
“ဒီတစ်ပတ်ထဲမှာ စစ်ကောင်စီက ခနခန စစ်ကြောင်းထိုးတယ်။နေ့တိုင်းလက်နက်ကြီးသံကြားနေရတယ်။မနေ့က လေယာဉ်နဲ့ လာဝဲသေးတယ်။ ဒီနေ့ မနက်မှာလည်း စစ်ကောင်စီက လအိရွာကိုဒရုန်းနဲ့ ဗုံးကြဲသွားတယ် ကြားလိုက်တယ်။ သေဆုံးတာ ဒဏ်ရာရတာတော့ မသိရသေးဘူး။”ဟု စစ်ရှောင်အမျိုးသား တစ်ဦးက ပြောသည်။
ယခုလက်ရှိ ဖယ်ခုံမြို့နယ် အနောက်ဘက်ခြမ်း၊ လွယ်ပေါင်းရွာ၊ လဟယ်ရွာနှင့် မိုးဗြဲဘက်ခြမ်းတွင် တိုက်ပွဲ ပြင်းထန်စွာဖြစ်ပွားနေပြီး အဆိုပါ ကျေးရွာအနီးနားရှိ ဒေသခံများမှာ တောတောင်ထဲ၌ စစ်ဘေးတိမ်းရှောင် နေရသည်ဟု ၎င်းက ဆက်ပြောသည်။
“ခြံရှိတဲ့ သူက ခြံထဲမှာ စစ်ရှောင်ကြတယ်။ မရှိတဲ့ သူက တောတောင်ထဲ ရှောင်ကြတာ။ မိုးတွင်းကာလဆိုတော့ မိုးကာတွေ စုတ်ပြဲနေပြီး နေစရာ အခက်ခဲရှိတယ်။မိုးရွာတော့ ရေတွေလည်း မသန့်ဘူး။စားသောက်ဖို့တွေ အခက်ခဲဖြစ်တယ်။ မိုးကာတို့ စားစရာတို့ လိုတယ်။” ဟု စစ်ရှောင်တစ်ဦးက ပြောသည်။
ပြီးခဲ့သည့် ဇွန်လ (၁၄)ရက်နေ့တွင်လည်း စစ်ကောင်စီက မိုးဗြဲအနောက်ဘက်ခြမ်းကို လက်နက်ကြီးဖြင့် ပစ်ခတ်သောကြောင့် လူနှစ်ဦး ထိခိုက်ဒဏ်ရာရရှိခဲ့ပြီး နေအိမ်များပျက်စီးခဲ့ရကြောင်း မိုးဗြဲပြည်သူ့ကာကွယ်ရေးတပ်ဖွဲ့(MBPDF) မှ ထုတ်ပြန်ထားသည်။
ပြီးခဲ့သည့် မေလ (၁၅)ရက်တွင်လည်း ဖယ်ခုံမြို့နယ် လအိကျေးရွာအနီးရှိ ဘန်ကောက်စစ်ရှောင်စခန်းကို စစ်ကောင်စီက တိုက်လေယာဉ်ဖြင့် ပေါင်(၅၀၀)ဗုံး (၂)လုံး ကြဲချခဲ့ခြင်းကြောင့် အဆောက်ဦးတစ်ချို့ ပျက်စီးဆုံးရှုံးခဲ့ရသည်။
Leave a Comments