ပြည်သူသားများအဖွဲ့ (PSF) တာဝန်ခံ ဗိုလ်မီးခဲ လုပ်ကြံခံရ၍ သေဆုံးသွားခဲ့ရကြောင်းနှင့် များစွာစိတ်မကောင်းဖြစ်ရကြောင့် ဓနုပြည်နယ် အမျိုးသားကာကွယ်ရေးတပ်တော် (DSNDA)က ပြီးခဲ့သည့် ဇွန်လ (၈)ရက်နေ့တွင် ထုတ်ပြန်လာသည်။

ပြီးခဲ့သည့် ဇွန်လ (၇)ရက်နေ့တွင် ရွာငံမြို့နယ် တစ်နေရာ၌ နေမကောင်းဖြစ်နေသော ရဲဘော်တစ်ဦးကို ဗိုလ်မီးခဲမှ သွားကြိုစဉ် လမ်းတစ်နေရာတွင် ဓားနှင့်ထိုးကာ လုပ်ကြံခံခဲ့ရကြောင်း ဖြစ်စဉ်သိရှိသူ ရဲဘော်တစ်ဦးက သျှမ်းသံတော်ဆင့်ကို ပြောသည်။

“သူက နေမကောင်းတဲ့ ရဲဘော်တစ်ယောက်ကို သွားကြိုရင်း လုပ်ကြံခံရတာ။ဘယ်သူလုပ်ကြံတယ်ဆိုတာတော့ မသိသေးဘူး။” ဟု အဆိုပါ ရဲဘော်တစ်ဦးက ပြောသည်။

ထိုကဲ့သို့ ဗိုလ်မီးခဲ လုပ်ကြံခံရသောကြောင့် များစွာ စိတ်မကောင်း ဖြစ်ရပြီး နှမြောမိကြောင်း နှင့် လုပ်ကြံသည့် တရားခံကို အမြန်ဆုံး ရှာဖွေဖော်ထုတ်ပေးစေ လိုကြောင်း ၎င်းက ပြောသည်။

“ကျနော်ကတော့ နှမြောမိတယ်။ သူ့လိုခေါင်းဆောင်က ရှားတယ်။ ဘယ်သူလုပ်ကြံလဲ ဆိုတာ အဖွဲ့တွေက ရှာဖွေ ဖော်ထုတ်ပေးစေချင်တယ်။”ဟု ဆိုသည်။

ဗိုလ်မီးခဲသည် PSF ၏တာဝန်ခံတစ်ဦးဖြစ်ပြီး ရွာငံမြို့နယ်အတွင်း PSFအဖွဲ့သားများနှင့် အတူ တိုက်ပွဲဖော်ဆောင်နေသူ ဖြစ်သည်ဟု သိရသည်။

PSFအဖွဲ့သည် DSNDAမှ အမှတ် စဉ် (၁) သင်တန်းဆင်း ပြီး စစ်ရေးလှုပ်ရှားမှုများ လုပ်ဆောင်နေသည်ဟု လည်း သိရသည်။