စစ်ကောင်စီသည် ထိုင်းနိုင်ငံထုတ် ကုန်ပစ္စည်းများ တင်သွင်းခွင့်ကို ပိတ်ပင်ထားသည့်အတွက် သျှမ်းပြည်အတွင်း ကုန်ပစ္စည်းစျေးနှုန်းများ မြင့်တက်လာကြောင်း သတင်းရရှိသည်။

ဇွန် ၁ ရက်မှစတင်ပြီး စစ်ကောင်စီသည် ထိုင်းထုတ်ကုန်ကို တင်သွင်းခွင့် ပိတ်ပင်လိုက်သည့်အတွက် ထိုင်းကုန်ပစ္စည်းများ အားကိုးနေရသော သျှမ်းပြည် အရှေ့ပိုင်းနှင့် သျှမ်းပြည် တောင်ပိုင်းတွင် ကုန်းစျေးနှုန်း မြင့်တက်မှု ကြုံနေရကြောင်း လွိုင်လင်မြို့ အသက် ၃၀ အရွယ်ရှိ ကုန်သည်အမျိုးသမီးတစ်ဦးက သျှမ်းသံတော်ဆင့်ကိုပြောသည်။

“ထိုင်းထုတ်ပစ္စည်းတွေက တာချီလိတ်ကနေ လာလို့ မရတော့ ရှိတာကို ထိန်းပြီးရောင်းနေရတာ။ ကျမတို့တောင် ဘယ်လိုလုပ်မလဲမသိဘူး နည်းလမ်းတွေ မရှိတော့ဘူး။ ကားသမားတွေလည်း မတင်ရဲဘူး၊ ကုန်ဈေးတွေကလည်း ဒီလကစပြီး တက်နေတယ်။စားသောက်ကုန်က အဓိကတက်တာ။ ဘယ်လို အရောင်းအဝယ် လုပ်ရမလဲတောင် မသိဘူး”ဟု ၎င်းကပြောသည်။

လက်ရှိ ထိုင်းနိုင်ငံထုတ် မားမား (မျက်လုံးတံဆိပ်) ခေါက်ဆွဲသည် ယခင် ၄၀၀ကျပ်မှ လက်ရှိ ၁၀၀၀ ကျပ်၊ အမျိုးသားခေါင်းလျှော်ရည် ကျပ်တစ်သောင်းမှ လက်ရှိတွင် ကျပ်တစ်သောင်းခွဲအထိ ပေးဝယ်ရကြောင်း၊ ကြက်သားမှုန့် ကျပ် ၃၀၀ တန်သည် လက်ရှိ ကျပ် ၈၀၀ ထိ စျေးမြင့်တက်သွားကြောင်း သိရသည်။

သျှမ်းပြည် စားသောက်ကုန်ပစ္စည်းများ ဈေးနှုန်းမြင့်တက်လာခြင်းကြောင့် ကုန်သည်များအတွက် ရေရှည်စိုးရိမ်မှုများ ရှိသကဲ့သို့ စားသုံးသူများအတွက်လည်း ပူပင်စရာဖြစ်နေကြောင်း အသက် ၃၀ ဝန်းကျင် ကုန်သည် အမျိုးသမီးတစ်ဦးက ဆက်ပြောသည်။

“တောင်ကြီးဘက်ကနေ ဝယ်ရောင်းနေရတာ။ အခုက ထိုင်းကပစ္စည်းတွေက အရမ်းကြပ်သွားပြီ။ အရင်လိုလည်း ဝယ်ရောင်းဖို့ မလွယ်တော့ဘူး၊ အခြေအနေ တော်တော်ဆိုးနေတာလေ။အခုက မြန်မာ ကုမ္ပဏီက လာရောင်းတဲ့ဟာကနေတဆင့် ပြန်ရောင်းနေတာ။ ပြည်သူရဲ့ အခြေအနေက သိတဲ့ အတိုင်းပဲ ဘယ်သူမှ အဆင်မပြေကြဘူးလေ။ ဈေးတွေထဲတောင်ဝယ်တဲ့လူကိုမရှိဘူး၊ ဆိုင်တောင် ပိတ်ချင်တယ်” ဟု ၎င်းအမျိုးသမီးက ပြောသည်။

လက်ရှိ‌ဈေးရောင်းနေသည့် ကုန်စုံဆိုင်ကြီး၊ ကုန်သည်ကြီးများအတွက်လည်း ဈေးနှုန်းတင်ရောင်းလျှင် ဝယ်သူမရှိ၊ ဈေးနှုန်းလျော့ရောင်းပါက အရှုံးပေါ်နိုင်ခြင်းကြောင့် အခက်အခဲများဖြစ်နေကြောင်း ကာလိမြို့ ကုန်သည်အမျိုးသားက ဆက်ပြောသည်။

“အရင်လိုလည်း ဈေးလည်းအရမ်းမတင်ရဲဘူး ဝယ်တဲ့လူက အရင်လိုလည်း မရှိဘူးလေ။ ဈေးတင်ရောင်းရင်တောင် ဝယ်တဲ့လူသိပ်မရှိရင် ကိုယ်ပဲရှုံးတာလေ။ တချို့တွေက ထားလို့ မခံတဲ့ဟာတွေလေ၊ ရောင်းမထွက်ရင်လည်း အဆင်မပြေပြန်ဘူး။ အခုတလော ဝယ်တဲ့လူမရှိဘူး အရင်နဲ့မတူတော့ဘူး”ဟု ၎င်းကုန်သည် အမျိုးသားက ပြောသည်။

တာချီလိတ်မြို့မှ အခြားမြို့သို့ တင်ပို့မည့် ထိုင်းနိုင်ငံထုတ် ကုန်ပစ္စည်းများကို ကွန်ဟိန်းမြို့နယ်အတွင်း သံလွင်မြစ်ကူး တာကော်တံတားရှိ စစ်ကောင်စီ စစ်ဆေးရေးဂိတ်တွင် စစ်ဆေးမှုတင်းကြပ်ပြီး ဖမ်းဆီးမှုများ ပြုလုပ်နေသည်။

လက်ရှိတွင် ကားသမားများမှာ ထိုင်းထုတ်ကုန်ပစ္စည်းများကို ယခင်ကဲ့သို့ လွတ်လပ်စွာ သယ်ဆောင်ခွင့် မရှိခြင်းကြောင့် စားဝတ်နေရေးအတွက် စိုးရိမ်နေရသည့်အပြင် ကားခများပါ ဈေးနှုန်းများ မြင့်တက်သွားကြောင်း သိရသည်။