သျှမ်းပြည်မြောက်ပိုင်း၊ နောင်ချိုမြို့နယ်ရှိ ကျေးရွာများတွင် စစ်ကောင်စီတပ်က ဝင်ရောက်စီးနင်းပြီး ရွာသားများကို ဖမ်းဆီးခေါ်ဆောင်သွားကြောင်း စုံစမ်းသိရသည်။

ပြီးခဲ့သည့် မေလ (၂၉)ရက်တွင် နောင်ချိုမြို့နယ် ရွှေမုဌောကျေးရွာသို့ စစ်ကောင်စီတပ်က ဝင်ရောက်ထိုးစစ်ဆင် သိမ်းပိုက်ပြီး ရွာသူရွာသား (၄၀)ကျော်ကို ဖမ်းဆီးခေါ်ဆောင်သွားပြီး ယနေ့အချိန်ထိ အဆက်အသွယ်နှင့် သတင်းအစအန မရရှိတော့ကြောင်း၊ ဖမ်းဆီးခံရသူများသည် အရွယ်ကောင်း အမျိုးသား၊ အမျိုးသမီးများ ပါဝင်သွားကြောင်း စစ်ရေးသတင်းရင်းမြစ်တစ်ဦးက သျှမ်းသံတော်ဆင့်ကို ပြောသည်။

“သူတို့က ကျေးရွာတွေကို ဝင်စီးပြီး အဲ့လိုဖမ်းခေါ်သွားတယ်။ မရှောင်တဲ့သူတွေကိုဆို
အကုန်ဖမ်းသွားတာ။ စစ်ကောင်စီဘက်က ရွာတွေကို ဝင်သိမ်းပြီး နောက်ရက်ဆို အဲ့လို ဖမ်းသွားတာ။ ရွှေမုဌောရွာကဆို ၄၀ ကျော် ဖမ်းသွားတာ။ သူတို့အတွက် အသုံးဝင်မယ့် သူတွေကို ဖမ်းခေါ်တာ၊ မိန်းကလေးရော ယောကျာ်းလေးရော ဖမ်းခေါ်သွားတာ” ဟု ရှေ့တန်း စစ်မြေပြင်မှ သတင်းရင်းမြစ်တစ်ဦးက ပြောသည်။

အလားတူ နောင်ချိုမြို့နယ်ရှိ ရွှေမုဌောကျေးရွာ၊ နောင်လင်ကျေးရွာနှင့် မဲပုတ်ကျေးရွာ တို့တွင်လည်း တအာင်း(ပလောင်) အမျိုးသားလွတ်မြောက်ရေးတပ်မတော် TNLA ကို စစ်ကောင်စီတပ်မှ ထိုးစစ်ဆင်ကာ ရွာခံများကို ဖမ်းဆီးခေါ်ဆောင်သွားကြောင်း ၎င်းက ဆက်ပြောသည်။

စစ်ကောင်စီတပ်သည် နောင်ချိုမြို့နယ် ပြန်လည်ရရှိရေး အပြင်းအထန် ထိုးစစ်ဆင်နေပြီး နောင်ချိုမြို့နယ်ရှိ TNLA နှင့် DPLA ပူးပေါင်းတပ်များထက် ဒရုန်းနှင့် လေကြောင်းတိုက်ခိုက်ရေး သာလွန်နေသောကြောင့် ကျေးရွာတစ်ချို့ကို သိမ်းပိုက်ရရှိသွားကြောင်း DPLA တပ်သား တစ်ဦးက ပြောသည်။

“သူတို့က အင်အားရော လက်နက်ရော၊ လေယာဉ်တို့ ဒရုန်းတို့တွေက အစစအရာရာ
သာလွန်နေတယ်။ ပြီးရင် အပစ်ရပ်ကာလကြောင့် ထိုးစစ်မဆင်တော့ ဒီဘက်က ဆုတ်ပေးလိုက်ရတယ်။ ရွာသားတွေကို သတ်ပြီးတော့လည်း TNLA ဝတ်စုံ ဝတ်ပေးပြီး သူတို့က
ဝါဒဖြန့်ထားတယ်၊ တကယ်တမ်းက အဲ့ဒါ ပြည်သူတွေ” ဟု DPLA တပ်သားတစ်ဦးက သျှမ်းသံတော်ဆင့်ကို ပြောသည်။

လက်ရှိတွင် စစ်ကောင်စီတပ်သည် နောင်ချိုမြို့နှင့် ၁၀ မိုင်ခန့် ကွာဝေးသည့် ရှောက်ချိုရွာအထိ နီးကပ်လာပြီး TNLA လက်လွှတ်လိုက်ရသည့် ရွှေမုဌော၊ နောင်လင်နှင့် မဲပုတ် အပြင် တခြားသော ကျေးရွာများမှ ပြည်သူများလည်း ကျောက်မဲမြို့နယ်နှင့် ဘေးလွတ်ရာ ဒေသများသို့ စစ်ဘေးတိမ်းရှောင် ထွက်ပြေးနေကြရသည်ဟု အဆိုပါ DPLA တပ်သားက
ပြောသည်။

တအာင်း (ပလောင်) အမျိုးသားလွတ်မြောက်ရေးတပ်မတော် (TNLA) ထိန်းချုပ်ထားသည့် နောင်ချို၊ မိုးကုတ်၊ကျောက်မဲ၊ မိုင်းလုံနှင့် မန်တုံမြို့နယ်တို့တွင် မေလ အတွင်း စစ်ကောင်စီတပ်မှ လေကြောင်းဖြင့် (၂၆)ကြိမ်၊ လက်နက်ကြီးဖြင့် (၇၇၆)ကြိမ် ၊ ဒရုန်းဖြင့် ဗုံး(၃၂၉)လုံးနှင့် အဆိပ်ငွေ့ဗုံး (၁၁၄)လုံးတို့ဖြင့် ပစ်ခတ်တိုက်ခိုက်ခဲ့သောကြောင့် ပြည်သူလူထု (၈)ဦးသေဆုံးပြီး (၁၈)ဦး ဒဏ်ရာရကာ နေအိမ်အများအပြား ထိခိုက်ပျက်စီးသွားကြောင်း TNLA ဘက်မှ ထုတ်ပြန်ထားသည်။