စစ်ကောင်စီ ပြန်လည်ထိန်းချုပ်နေသော သျှမ်းပြည်မြောက်ပိုင်း လားရှိုးမြို့တွင် စာသင်ကျောင်းများ ပြန်လည်ဖွင့်လှစ်ရန် ပြင်ဆင်နေသော်လည်း စီးပွားရေး ကျဆင်းနေသောကြောင့် ကလေးများ ကျောင်းအပ်နှံရေးအတွက် ဒေသခံများ အခက်အခဲ ကြုံတွေ့နေရကြောင်း စုံစမ်းသိရသည်။
လားရှိုးမြို့ပေါ်ရှိ စစ်ကောင်စီလက်အောက်ခံ အခြေခံပညာရေး စာသင်ကျောင်းများ ပြန်လည်ဖွင့်လှစ်ပြီး ကျောင်းအပ်နှံရန် ကြေညာထားသော်လည်း စီးပွားရေးကျဆင်း နေသောကြောင့် ဒေသခံများမှာ ၎င်းတို့၏ ကလေးများအတွက် ကျောင်းအသုံးစရိတ် မတတ်နိုင်ဘဲ ကျောင်းအပ်နှံရန် အခက်အခဲများ ကြုံတွေ့နေရကြောင်း အမည်မဖေါ်လိုသည့် လားရှိုးဒေသခံ တစ်ဦးက သျှမ်းသံတော်ဆင့်သို့ ပြောသည်။
“လားရှိုးမှာ ဘာမှ မသေချာ မရေရာတာမို့ ကျောင်းအပ်ဖို့ ခက်နေတယ်၊ ကျောင်းအပ်ခ မပေးရပေမယ့် ဗလာစာအုပ်ခ၊ ယူနီဖောင်း၊ လွယ်အိတ်ခနဲ့ အတန်းထဲ ရောက်သွားရင် အတန်းပိုင်တွေက တံမြက်စည်းဖိုး၊ ရေသန့်ဖိုးဆိုပြီး ကောက်ဦးမှာနဲ့။ စီးပွားရေးက မဖြစ်ဘူး၊ ယူနီဖောင်းဆို တစ်စုံ ငါးသောင်းလောက်ရှိနေပြီ တစ်စုံထဲနဲ့ မရဘူးလေ” ဟု ထိုဒေသခံ အမျိုးသားက ပြောသည်။
ထို့ပြင် “၁၀၂၇ စစ်ဆင်ရေး”ကြောင့် စစ်ဘေးရှောင်ခဲ့ကြသော ကလေးငယ်များမှာ စစ်မဖြစ်မှီ ၎င်းတို့တက်ရောက်နေသည့် အတန်းတွင် ပြန်စတက်ရမည်ဖြစ်ကြောင်း၊ အတန်းကျော်၍ တက်ရောက်လိုလျှင် ကျောင်းသားတစ်ဦး ကျပ် ၁၀ သိန်းအထိ ပေးဆောင်ရမည်ဟု ထိုဒေသခံက ဆက်ပြောသည်။
“သူတို့ အတန်းပေးမကျော်ဘူး၊ ကလေးတွေက နားထားရလို့ အသက်တွေလည်း ကြီးလာတော့ မတက်ချင်တော့ဘူး။ အတန်းကျော်တက်ချင်ရင် ၁၀ သိန်းပေးပြီး လက်မှတ်ထုတ်ပေးမယ်လို့ ကျောင်းအုပ်က ပြောတယ်၊ ပေးရအောင်လည်း လားရှိုးမှာ ဘာမှမသေချာတာ” ဟု ၎င်းဒေသခံက ဆက်ပြောသည်။
လားရှိုးမြို့တွင် ပြီးခဲ့သည့် မေလ ၂၂ ရက်မှစ၍ ကျောင်းများပြန်လည်အပ်နှံနိုင်သည်ဟု ကြေညာထားသော်လည်း စစ်ကောင်စီထိန်းချုပ်ထားသည့် မြို့ပေါ် ရပ်ကွက် ၁၂ ခုတွင်သာ စာသင်ကျောင်းများ ပြန်လည်ဖွင့်လှစ်ရန် ပြင်ဆင်ထားရှိသည်။
အခြားတစ်ဘက်တွင် လားရှိုးမြို့ပတ်လည်ရှိ ကိုးကန့်တပ်ဖွဲ့ MNDAA ထိန်းချုပ်ထားသည့် အီနိုင်း၊ ဟိုပိတ်၊ မယ်ဟန် စသည့် ကျေးရွာများတွင် CDM ဆရာ/မများ သင်ကြားပေးနေသည့် ကြားကာလ အွန်လိုင်းစာသင်ကျောင်းများ ရှိနေသောကြောင့် မည်သည့်ကျောင်းသို့ ရွေးချယ်တက်ရောက်မည်ကို ဝေခွဲမရ ဖြစ်နေကြောင်း ဒေသခံများ ပြောကြားချက်အရ သိရသည်။
အလုပ်သင် သတင်းထောက် စိုင်းဟန်မော(ဝ်) ရေးသားသည်။
Leave a Comments