သျှမ်းပြည် ဟိုပုံးမြို့တွင် စည်ပင်သာယာရေးအဖွဲ့မှ လစဉ် အမှိုက်ခွန်များ ကောက်ခံနေသော်လည်း အမှိုက်သိမ်းသည့်ကားများ ပုံမှန်မရောက်လာပဲ အမှိုက်ရှင်းလင်းမှု အားနည်းနေကြောင်း စုံစမ်းသိရသည်။
ဟိုပုံးမြို့ပေါ်ရှိ ရပ်ကွက်များတွင် စစ်ကောင်စီလက်အောက်ခံ စည်ပင်သာယာရေးအဖွဲ့က ပြည်သူများထံ လစဉ် အမှိုက်ခွန်များ ကောက်ခံထားသော်လည်း အမှိုက်သိမ်းဆည်းသည့် ကားများမှာ ပုံမှန် လာရောက်သိမ်းဆည်းမှု မလုပ်သည့်အတွက်ကြောင့် ပြည်သူများ အခက်တွေ့နေကြောင်း ဟိုပုံးမြို့ ဒေသခံ အမျိုးသမီးတစ်ဦးက ပြောသည်။
“ဈေးထဲမှာ ရှုပ်ပွနေတဲ့ အမှိုက်တွေကိုတော့ လာသိမ်းသွားပါပြီ။ လှိုင်းပေါ်တွေမှာ တက်လာလို့ ထင်တယ်၊ ဒီနေ့မှ လာသိမ်းသွားတယ်။ ဒါပေမယ့် မြို့ထဲက ရပ်ကွက်ထဲမှာ အမှိုက်ကားတွေ မလာတာတော့ ကြာပြီ။ အမှိုက်တွေက အိမ်မှာ ရှိနေတာလည်း ကြာတော့ အဆင်မပြေဘူး၊ ပုပ်ပွကုန်ပြီ။ ပိုက်ဆံလည်း လတိုင်းကောက်နေတာကို” ဟု ဟိုပုံးမြို့ ဒေသခံ အမျိုးသမီးတစ်ဦးက ပြောသည်။
ထို့ပြင် ဟိုပုံးမြို့မဈေးတွင်လည်း အမှိုက်စွန့်ပစ်မှုများ ပြုလုပ်နေသည့်အတွက်ကြောင့် ဈေးရောင်းနေသည့် ပျံကျဈေးသည်များအတွက် အနံ့အသက်နှင့် ခြင်ယင်မှတဆင့် ကူးစက်နိုင်သည့် ရောဂါများဖြစ်စေကြောင်း ဟိုပုံးမြို့မဈေးအတွင်း ဈေးရောင်းနေသည့် ဒေသခံအမျိုးသမီးတစ်ဦးက ထပ်လောင်းပြောသည်။
“လမ်းဘေးစျေးသည်လေးတွေက ဆိုင်ခန်းမငှားနိုင်လို့ လမ်းဘေးရောင်းနေရတယ်လေ။ လမ်းဘေးစျေးသည်ကို မသနားကြဘူး၊ လူတွေက မလိုက်နာကြဘူး။ တချို့မြို့ထဲက လာပစ်တာ၊ တချို့ဈေးထဲကနေလည်း ပစ်တာပေါ့။ အဲ့လိုကြတော့ ဈေးလာရောင်းတဲ့ လူတွေအတွက် အခက်အခဲ ဖြစ်စေတာပေါ့။ ဘယ်သူကိုမှ အပြစ်မပြောပါဘူး။ အမှိုတ်ကို ဝေးဝေးမှာ ပစ်စေချင်တာပါ”ဟု ၎င်းဈေးသည် အမျိုးသမီးက ပြောသည်။
စစ်ကောင်စီလက်အောက်ခံ ဟိုပုံးမြို့ စည်ပင်သာယာရေးအဖွဲ့မှ ရပ်ကွက်အတွင်း နေအိမ်များတွင် တစ်လ ၂ သောင်းနှုန်းဖြင့် အမှိုက်ခွန်များ ကောက်ခံပြီး၊ ပျံကျဈေးသည်များထံ နေ့စဉ် တစ်ရက် ၂ ထောင် ကောက်ခံနေသော်လည်း မြို့အတွင်း စည်ပင်သာယာရေး သန့်ရှင်းရေးအပိုင်းတွင် အားနည်းမှု ရှိနေကြောင်း ဒေသခံများကပြောသည်။
Leave a Comments