စစ်ကောင်စီလက်အောက်ရှိ ပညာရေးဝန်ကြီးဌာနသည် ယခုနှစ် ၂၀၂၅-၂၀၂၆ ပညာသင်နှစ် အတွက် အခြေခံပညာသင်ကျောင်းများတွင် ဖြန့်ဝေသည့် ကျောင်းသုံးဖတ်စာအုပ်များကို စာသင်နှစ်အဆုံးတွင် ပြန်လည်အပ်နှံခိုင်းမည်ဖြစ်ကြောင်း ကျောင်းသားမိဘများထံမှ သတင်းရရှိသည်။
မေလ (၂၂) ရက်မှ စတင်ပြီး စစ်ကောင်စီလက်အောက်ခံ အခြေခံပညာ စာသင်ကျောင်းများတွင် ကျောင်းအပ်လက်ခံခဲ့ရာ ပုံနှိပ်ဖတ်စာအုပ်များကို စာသင်နှစ်အဆုံးတွင် ပြန်အပ်ရမည် ဖြစ်သောကြောင့် ရိုရိုသေသေ ကိုင်တွယ်ရန် မှာကြားလိုက်သည်ဟု သျှမ်းပြည်တောင်ပိုင်း ရွာငံမြို့တွင် နေထိုင်သည့် G-10 ကျောင်းသားတစ်ဦးက ပြောသည်။
“စာအုပ်ကို ပြန်အပ်ရမှာမလို့ သေချာကိုင်ပေးဖို့ မှာလိုက်တယ်။ တခြားကျောင်းတွေမှာတော့ ပုံနှိပ်စာအုပ် အသစ်တွေ မရဘဲ အဟောင်းတွေပဲ ရတယ်လို့ကြားတယ်။ ကျနော်တို့ ကျောင်းက လူနည်းတော့ ပုံနှိပ်စာအုပ် မလောက်ငှတာ မရှိဘူး။ ဒါပေမယ့် ပုံနှိပ်စာအုပ် ပြန်ပေးရမယ်ဆိုတော့ နှစ်ကုန်ရင် အကောင်းတိုင်းရှိဖို့ မသေချာဘူး။ ပြန်မပေးနိုင်ရင် အစားထိုး အပြင်မှာ ပြန်ဝယ်ပေးရမယ်ပြောတယ်” ဟု အဆိုပါ ကျောင်းသားက သျှမ်းသံတော်ဆင့်ကို ပြောသည်။
အခြေခံပညာ ကျောင်းအပ်နှံခြင်းကို မေလ (၂၂)ရက်မှ ဇွန်လ (၂)ရက်နေ့အထိ အပ်နှံနိုင်ပြီး ဇွန်လ (၃)ရက်နေ့တွင် ကျောင်းစတင် တက်ရောက်နိုင်၍ မည်သည့် ကျောင်းအပ်နှံခ ကျောင်းဝင်ကြေး စသည်တို့ ပေးဆောင်ရန် မလိုခဲ့ကြောင်း ၎င်းက ဆက်ပြောသည်။
ထို့အပြင် စာရေးကိရိယာများ ဈေးတက်လာသောကြောင့် စာရေးမှတ်ရန် စာအုပ်ကိုပင် ဈေးကြီးပေးဝယ်နေရသောကြောင့် အခြေခံလူတန်းစား မိဘများအနေဖြင့် ကျောင်းသားများအတွက် စာအုပ်ထောက်ပံ့ရန် ခက်ခဲကြောင်း ဆိုသည်။
“စာအုပ် တစ်ဒါဇင်ကို (၁၇၅၀၀)တဲ့ တစ်သက်နဲ့တစ်ကိုယ် တစ်ခါမကြားဖူးဘူး၊ ဈေးနှုန်းကလည်း ကြီးလိုက်တာ။ ဘောပင်တစ်ချောင်းကို ကျပ်(၁၅၀၀) အထိရှိတယ်။ နေ့စားအငှားလိုက်နေတာ တစ်ရက်မှ မနားရသေးဘူး။ စားဖို့လည်း ရှာရ ကျောင်းသားအတွက် စရိတ်လည်းရှာရနဲ့။ သူ့အတွက် တစ်သိန်းဖိုး ဈေးသုံးတာ ဘာမှ ထွေထူးမရလာဘူး” ဟု ကျောင်းသားမိခင်တစ်ဦးက ပြောသည်။
စစ်ကောင်စီမှ ကျောင်းသား၊ ကျောင်းသူများကို ကျောင်းဝတ်စုံများ တောက်ပံ့ပေးသော်လည်း အင်္ကျီများမှာ ကျောင်းသူများနှင့် ဆိုဒ်မတော်နေသောကြောင့် ဝတ်ရအဆင်ပြေမှု မရှိကြောင်း အဆိုပါ မိခင်က ထပ်လောင်းပြောသည်။
ထိုသို့ စစ်ကောင်စီ လက်အောက်ခံ ပညာရေးဝန်ကြီးဌာနမှ ပုံနှိပ်စာအုပ်များ ပြန်အပ်ရန် ညွှန်ကြားလိုက်သောကြောင့် တောင်ကြီးမြို့ပေါ်တွင်လည်း စာအုပ်များကို မဲနှိုက်စနစ်ဖြင့် အလုအယက် ဝယ်ယူနေရသည်ဟု မြို့ခံများထံမှ သိရသည်။
အလားတူ သျှမ်းပြည်မြောက်ပိုင်း လားရှိုးမြို့တွင်လည်း စစ်ကောင်စီဖွင့်လှစ်မည့် အခြေခံပညာကျောင်းများတွင် ကျောင်းလာအပ်သည့် ကျောင်းသားကျောင်းသူ ဦးရေမှာ ယခင်ထက် ၄ ပုံ ၁ ပုံသာလျှင် ရှိသေးကြောင့်နှင့် ကျောင်းပြန်ဖွင့်လျှင် ကျောင်းသန့်ရှင်းရေးလုပ်ရန် တံမြက်စည်းခ၊ ရေသန့်အတွက် ပိုက်ဆံပေးရမည်ဖြစ်ကြောင်း ကျောင်းသားမိဘများက ပြောဆိုသည်။
ယမန်နှစ် ၂၀၂၄ မေလ ၂၃ ရက်နေ့တွင် စစ်ကောင်စီလက်အောက်ခံ စာသင်ကျောင်း၊ ကိုယ်ပိုင်ကျောင်းနှင့် ဘုန်းတော်ကြီးသင် ပညာရေးကျောင်းများတွင် ကျောင်းလာရောက်အပ်နှံသူ ၁၇ သိန်း ၉ သောင်းအထိ ရှိခဲ့သည်ဟု ပညာရေးဝန်ကြီးဌာနက ထုတ်ပြန်ထားသည်။
မြန်မာနိုင်ငံတွင် စစ်အာဏာသိမ်းပြီးချိန်မှစ၍ လေးနှစ်ကျော်ကာလအတွင်း လက်နက်ကိုင် ပဋိပက္ခကြောင့် ကျောင်းနေအရွယ်ကလေးများ ၅ သန်းနီးပါး စာသင်ခန်းနှင့် ဝေးကွာပြီး ပညာသင်ယူခွင့် ဆုံးရှုံးခဲ့ရသည်ဟု ကုလသမဂ္ဂ ကလေးများရန်ပုံငွေအဖွဲ့ UNICEF က ၂၀၂၄ ခုနှစ်တွင် ထုတ်ပြန်ထားသည်။
Leave a Comments