ထိုင်း-မြန်မာနယ်စပ် တာချီလိတ်မြို့ပေါ်ရှိ နေအိမ်၊ ရပ်ကွက်နှင့် လမ်းများပေါ်တွင် ရေများကျဆင်း သွားပြီးနောက် ရွှံ့နွံများအား ကိုယ်တိုင်ရှင်းထုတ်နေရကြောင်း သိရသည်။

ပြီးခဲ့သည့် မေလ ၂၃ ရက် ညပိုင်းတွင် မိုးသည်းထန်စွာရွာသွန်းပြီး မယ်ဆိုင်ချောင်းရေလျှံမှုကြောင့် တာချီလိတ်မြို့ပေါ်ရှိ နေအိမ်၊ ရပ်ကွက်နှင့် လမ်းများအတွင်း ရေများဝင်ရောက်ကာ ရေကြီးရေလျှံမှု ဖြစ်ပေါ်ခဲ့သည်။

ယနေ့ နံနက်ပိုင်းအထိ တာချီလိတ်မြို့ပေါ်ရှိ နေအိမ်၊ ရပ်ကွက်နှင့် လမ်းများပေါ်တွင် ရေများကျဆင်း လျက်ရှိကြောင်း တွေ့ရှိရသော်လည်း မိုးဆက်လက်ရွာသွန်းမည်ဟု မိုးလေဝသနှင့် ဇလဗေဒ ပညာရှင်များမှ ခန့်မှန်းထားသည့်အတွက် စောင့်ကြည့်ရမည့် အနေအထားတွင် ရှိနေဆဲဖြစ်ကြောင်း တာချီလိတ်မြို့ ဒေသခံအမျိုးသမီးတစ်ဦးက ပြောသည်။

“အခုရေကတော့ ပြန်ကျပြီ၊ ရွှံ့နွံတွေ ပြန်ရှင်းဖို့ပဲကျန်တယ်။ သုံးရက်အတွင်း ဒီထပ်ပိုရွာမယ်တဲ့။ ပြင်ဆင်စရာရှိရင် ပြင်ဆင်ကြပါ” ဟု ၎င်းကပြောသည်။

ယခုနှစ်အတွင်း မိုးပိုများမည်ဟု ကြိုတင်သတင်းရရှိထားသည့်အတွက် ဒေသခံများနှင့် စည်ပင်သာယာရေးမှ ကြိုတင်ပြင်ဆင်ထားသင့်ကြောင်း ၎င်းကဆိုသည်။

သို့သော် မိုးရာသီမတိုင်ခင်ကတည်းက စည်ပင်သာယာရေးဌာနမှ ရေမြောင်းဖော်ပေးခြင်းမရှိသလို ဈေးသည်များလည်း အမှိုက်များအား ရေမြောင်းအတွင်းသို့ စည်းကမ်းမဲ့စွန့်ပစ်မှုကြောင့် ရေမြောင်းပိတ်ဆို့လျက်ရှိကြောင်း တာချီလိတ်မြို့ဒေသခံ အမျိုးသမီးတစ်ဦးက ဆက်ပြောသည်။

“ဒီနှစ်က မိုးပိုများမယ်ဆိုတာ အားလုံးက ကြိုသတင်းရထားတော့ ကြိုတင်ပြင်ဆင်ပြီး မိုးရာသီမရောက်မီ အပြီးလုပ်ပေးသင့်တယ်။ ရေလာမြောင်းဖော်တာတွေ၊ တမြို့လုံးရဲ့ အိမ်ရှေ့က မြောင်းတွေကို ကိုယ်တိုင်မြောင်း ပေါက်အောင် ဖော်တာတွေ လုပ်သင့်တယ်။ ကိုယ့်အိမ်မြောင်းကနေ မြောင်းကြီးကို ပေါက်တဲ့အထိ စုပေါင်းပြီး အားတွန်ခွန်စိုက် လုပ်ကြရင် တမြို့လုံးသက်သာမှာပါ။ အခုကအပြီးမလုပ်ကြဘူး၊ တဝက်တပျက်စီနဲ့ လုပ်ပြပြီး တစ်ရက်တစ်ရက် ပြီးသွားတယ်။ ဈေးထဲက ဈေးသည်တွေလည်း မြောင်းထဲမှာ အမှိုက်တွေပစ်တာ ဖွေးလို့ပေါ့” ဟု အဆိုပါအမျိုးသမီးတစ်ဦးက ထပ်လောင်းပြောသည်။

တာချီလိတ်မြို့ကဲ့သို့ ရေကြီးရေလျှံမှု ကြုံတွေ့ခဲ့ရသော ထိုင်း-မြန်မာနယ်စပ် မယ်ဆိုင်မြို့အတွင်းရှိ ရပ်ကွက်နှင့် လမ်းများပေါ်တွင် ရေများကျပြီးနောက် ရွှံ့နွံများကို ထိုင်းတော်ဝင် ရဲတပ်ဖွဲ့များက လာရောက်ရှင်းထုတ်ပေးနေကြောင်း သိရသည်။

ထိုင်း-မြန်မာနယ်စပ် တာချီလိတ်မြို့နှင့် မယ်ဆိုင်မြို့တွင် မိုးအဆက်မပြတ် ရွာသွန်းလျှင် ယမန်နှစ်ကဲ့သို့ စံချိန်တင် ရေကြီးရေလျှံမှု ထပ်မံဖြစ်ပေါ်မည်ကို ဒေသခံများက စိုးရိမ်နေလျက်ရှိသည်။

၂၀၂၄ ခုနှစ် စက်တင်ဘာလအတွင်း စံချိန်တင်ရေကြီးရေလျှံမှု ဖြစ်ပေါ်ခဲ့ခြင်းကြောင့် ထိုင်း-မြန်မာနယ်စပ် တာချီလိတ်နှင့် မယ်ဆိုင်တွင် ရေလွှမ်းခဲ့ပြီးနောက် နေအိမ်၊ အဆောက်အဦနှင့် ဈေးများ ပျက်စီးဆုံးရှုံးခဲ့ရသည်။