သျှမ်းပြည်တောင်ပိုင်း၊ ရွာငံမြို့နယ်အတွင်းရှိ ကျေးရွာအချို့တွင် စစ်ကောင်စီမှ ဒေသခံပြည်သူများကို လစဉ် ကျပ်ငွေ တစ်သောင်း ကောက်ခံနေသောကြောင့် စားဝတ်နေရေးကြပ်တည်းနေကြကြောင်း စုံစမ်းသိရ သည်။
ရွာငံမြို့နယ် အတွင်းရှိ နွားဘန်းကြီး ကျေးရွာရှိ ဒေသခံများက စစ်ကောင်စီကို အကြောင်းရင်းမသိရဘဲ လစဉ် ကျပ်တစ်သောင်း ကို ခြောက်လနီးပါး ပေးဆောင်နေရသောကြောင့် ဒေသခံများ စားဝတ်နေရေး ကြပ်တည်းနေကြောင်း အမည်မဖေါ်လိုသူ ဒေသခံတစ်ဦးက သျှမ်းသံတော်ဆင့် သို့ပြော သည်။
“လွန်ခဲ့တဲ့ (၆) လ ကတည်းကစပြီး တစ်အိမ်ကိုတစ်သောင်းပေးနေရတယ်၊ ဘာကြောင့်ထည့်ရတာလဲ ဆိုတာလဲ မသိရဘူး၊ သူတို့လက်နက်ကိုင်ထားတော့ ဘယ်သူမှမမေးရဲဘူး၊ သူတို့ကိုကြောက်နေရတာ၊ စားဖို့ထက် သူတို့ကို တစ်လတစ်သောင်းပုံမှန်ထည့်နိုင်ဖို့ ကြိုးစားနေရတယ်” ဟု ၎င်းဒေသခံကပြောသည်။
ထို့ပြင် ဒေသခံများ မိုဘိုင်းဖုန်း ကိုလွတ်လွတ်လပ်လပ် အသုံးပြု၍ မရဘဲ စစ်ကောင်စီတွေ့ရှိလျှင် သိမ်း ဆည်းမှုများလုပ်နေကြောင်းကိုလည်း ၎င်းဒေသခံက ဆက်ပြောသည်။
“ဖုန်းက လွတ်လွတ်လပ်လပ်သုံးမရဘူး၊ ခိုးသုံးရတယ်၊ သူတို့ရှေ့သွားရင် ယူမသွားရဲဘူး ကြောက်နေရ တယ်၊ တွေ့ရင် စစ်ဆေးမေးမြန်းပြီး ဖုန်းသိမ်းတာတွေ၊ ဖမ်းဆီးတာတွေရှိတယ်” ဟု ၎င်းကဆက်ပြော သည်။
စစ်ကောင်စီ မတရားကောက်ခံ ရရှိသော ကျပ်သိန်းပေါင်း (၈၀) ကို နယ်ပြောင်းသွားသော စစ်ကြောင်း မှူးက သိမ်းယူသွားသဖြင့် ဤလ အတွင်း ငွေထပ်ထည့်ရန် တောင်းခံနေကြောင်း ဓနုပြည်နယ် အမျိုးသား ကာကွယ်ရေးတပ်မတော်မှ ထုတ်ပြန်ထားသည်။
ထို့ပြင် မျှားကလေးရွာ၊ အင်တောရွာ၊ လယ်ကိုင်းရွာ စသည့်ရွာများတွင်လည်း တစ်အိမ်လျှင် ကျပ် နှစ်သောင်းနှုန်းဖြင့် လစဉ်စစ်ကောင်စီကို ပေးဆောင်နေရကြောင်း ပါရှိသည်။ နွားဘန်းကြီးရွာတွင် အိမ်ခြေပေါင်း ထောင် ကျော်ရှိပြီး ပြီးခဲ့သည့် ၂၀၂၂ ခုမှစ စစ်ကောင်စီမှ ထိုရွာကို အကြောင်းမဲ့ စစ်ကြောင်းထိုးမှုများ ရှိကြောင်း ဒေသခံများပြောကြား ချက်အရ သိရသည်။
အလုပ်သင် သတင်းထောက် စိုင်းဟန်မော(ဝ်) ရေးသားသည်။
Leave a Comments