သျှမ်းပြည် တောင်ကြီး-လွိုင်လင်လမ်းပိုင်းတွင် မိုးရွာသွန်းမှုကြောင့် မြေပြိုမှုများ ဖြစ်ပေါ်လျက်ရှိရာ ယနေ့ မေလ (၂၀)ရက်မှ ဇွန်လ (၃)ရက်နေ့အထိ (၁၅)ရက်ကြာ ညပိုင်း ကားဖြတ်သန်း သွားလာခွင့် ယာယီပိတ်မည်ဟု စုံစမ်းသိရှိရသည်။

တောင်ကြီး-လွိုင်လင် ပြည်ထောင်စုလမ်းမပေါ် ဟိုပုံးနှင့် မိုင်းပွန်ကြား နောင်ခါးကျေးရွာ၊ ထမ်စမ်းဂူ၊ လွယ်ဝိုးတုတ်ကျေးရွာ ကြား (၆)မိုင်ရှိသည့် လမ်းပိုင်းကို ပြန်လည်ပြုပြင်နေသောကြောင့် ည(၁၀)နာရီမှ နံနက် (၄)နာရီအထိ မော်တော်ယာဉ်များ ဖြတ်သန်းသွားလာခွင့် ပိတ်ထားမည် ဖြစ်ကြောင်း အသိပေးထုတ်ပြန်ထားသည်။

“နှစ်တိုင်း မိုးရွာပြီဆို လမ်းပိတ်တယ်၊ ကားတွေ ချောက်ထဲကျတယ်။ လမ်းကတည်း ကျဉ်းတယ်၊ ကားကြီးတွေကလည်း များတာပါ။ အရင်တစ်နှစ်ကဆို ဒီလိုမိုးရာသီဆို မြေပြိုလို့ ခရီးသည်တွေ လမ်းမှာ အိပ်လိုက်ရတာ ၂ ညလောက်။ အဲကြောင့် အရမ်း အန္တရာယ်များတယ်။ နွေပိုင်းလောက်ပဲ အဲ့လမ်းက သွားရလာရ အဆင်ပြေတာ”ဟု ခရီးသွားအမျိုးသမီးတစ်ဦးက သျှမ်းသံတော်ဆင့်ကို ပြောသည်။

မိုးရွာသီအတွင်း ၎င်းလမ်းပိုင်းကို အသုံးပြုသွားလာမည်ဆိုလျှင် အထူးသတိထားရန် လိုအပ်ကြောင်း ၎င်းအမျိုးသမီးက ဆိုသည်။

ထို့အပြင် မိုးရာသီ ကာလအတွင်း မြေပြိုမှု၊ လမ်းပိတ်မှုများ ဖြစ်ပွားသဖြင့် ကုန်ပစ္စည်းများ အချိန်မီ မပို့ဆောင်နိုင်ခြင်း၊ အရေးပေါ်ခရီးသည်များအတွက် နှောင့်နှေးမှုများ ဖြစ်နိုင်ခြင်းနှင့် ကျန်းမာရေး မကောင်းသည့် လူနာများအတွက်လည်း အခက်အခဲ ဖြစ်နိုင်ကြောင်း ၎င်းလမ်းကို အသုံးပြုနေသည့် ကားသမားတစ်ဉီးက သျှမ်းသံတော်ဆင့်ကို ပြောသည်။

“ကားတွေပိတ် လမ်းတွေပိတ်ရင် ပစ္စည်းတွေ မှာထားတဲ့လူလည်း အချိန်မမှီလို့ ဒုက္ခရောက်၊ ကုန်စိမ်းဆိုလည်း တချို့ဆို ရှုံးတာပေါ့။ လမ်းမှာ ရှေ့တိုးမရ နောက်ဆုတ်မရတဲ့ အခြေအနေတွေလည်း ရှိတော့ ဆုံးရှုံးမှုတွေ များတာပေါ့။ တစ်ချို့ခရီးသည်ဆို အရေးပေါ် ကိစ္စနဲ့ သွားရမယ့်ဟာဆို မမှီတော့တာမျိုးတွေ ကြန့်ကြာတာမျိုးတွေ ကြုံရတာပေါ့”ဟု ယာဉ်မောင်း အမျိုးသားတစ်ဦးက ပြောသည်။

အဆိုပါ လမ်းပိုင်းတါင် မြေပြိုမှုဖြစ်ကာ လမ်းပိတ်ထားခြင်းကြောင့် ကျောက်တန်း – ပင်လုံ ဘက်မှ တစ်ဆင့် ခရီးသွားမည့်သူများလည်း လမ်းမတ်စောက်ခြင်းကြောင့် မောင်းနှင်ဖူးသည့် အတွေ့အကြုံရှိ ကားသမားများနှင့်သာလျှင် လိုက်ပါစီးနင်းစေလိုကြောင်း၊ မမောင်းနှင်ဖူးဘဲ လမ်းကြောအကြောင်း မသိရှိသူများ မကြာခဏ ယာဉ်တိမ်းမှောက်မှု ဖြစ်၍ အန္တရာယ်များသည်ဟု ၎င်းက ဆက်ပြောသည်။

တောင်ကြီး-လွိုင်လင်လမ်းပိုင်းသည် နှစ်စဉ်နှစ်တိုင်း မြေပြိုမှုကြောင့် လမ်းပိတ်ဆို့မှု၊ ကားတိမ်းမှောက်မှုများ မကြာခဏ တွေ့ကြုံနေရသည်ဟု သိရသည်။