စစ်ကောင်စီပြုလုပ်မည့် ရွေးကောက်ပွဲကျင်းပရန်အတွက် အမျိုးသားကာကွယ်ရေးနှင့် လုံခြုံရေးကောင်စီ၏ အဆုံးအဖြတ်ဖြင့် ဆောင်ရွက်နိုင်ကြောင်း စစ်ခေါင်းဆောင် မင်းအောင်လှိုင်က ပြောကြားလိုက်သည်။

ယမန်နေ့ (မေလ ၁၉ ရက်)တွင် နေပြည်တော်၌ ပြုလုပ်ခဲ့သည့် စစ်ကောင်စီအစည်းအဝေးတွင် စစ်ခေါင်းဆောင် မင်းအောင်လှိုင်က ယင်းကဲ့သို့ ပြောဆိုခဲ့ခြင်းဖြစ်ပြီး မူလရည်ရွယ်ချက်အတိုင်း ရွေးကောက်ပွဲ ကျင်းပပြုလုပ်ရမည်ဖြစ်ကြောင်း ဆက်လက်ပြောဆိုသည်။

ရွေးကောက်ပွဲပြုလုပ်ရာတွင် တစ်နိုင်ငံလုံး အတိုင်းအတာဖြင့် ဆောင်ရွက်နိုင်ပါက အကောင်းဆုံးဖြစ်သော်လည်း ၂၀၁၀၊ ၂၀၁၅ နှင့် ၂၀၂၀ အထွေထွေရွေးကောက်ပွဲများတွင်လည်း ရာနှုန်းပြည့် ဆောင်ရွက်နိုင်ခြင်း မရှိခဲ့ကြောင်း၊ ၂၀၀၈ ဖွဲ့စည်းပုံအခြေခံဥပဒေတွင် ပုဒ်မ ၈၅၊ ပုဒ်မ ၁၂၈၊ ပုဒ်မ ၁၅၅ တို့တွင် လွှတ်တော်ခေါ်ရာ၌ အထမြောက်သည့် အပိုင်းများကို ထည့်သွင်းရေးသားထားကြောင်း စစ်ခေါင်းဆောင်က ပြောသည်။

စစ်ခေါင်းဆောင် မင်းအောင်လှိုင်သည် ကာကွယ်ရေးနှင့် လုံခြုံရေးကောင်စီတွင်လည်း ယာယီသမ္မတ တာဝန်ယူထားပြီး ပြီးခဲသည့် ဇန်နဝါရီလ ၃၁ ရက်တွင် အထွေထွေရွေးကောက်ပွဲ ကျင်းပရန် တည်ငြိမ်အေးချမ်းမှု လိုအပ်နေသည်ဟု အကြောင်းပြကာ နိုင်ငံတော်အရေးပေါ် အခြေအနေကို (၇) ကြိမ်မြောက် သက်တမ်းတိုးခဲ့သည်။

၂၀၁၅ ခုနှစ်တွင် ရွေးကောက်ပွဲအနိုင်ရခဲ့သည့် NLD အစိုးရသက်တမ်းတွင် စစ်ကောင်စီတပ်မှ အတတ်နိုင်ဆုံး ပူးပေါင်းဆောင်ရွက်ပေးခဲ့လည်း နိုင်ငံတော်အတွက် အရေးကြီးသည့် ကာလများ၌ ကာကွယ်ရေးနှင့်လုံခြုံရေးကောင်စီ အစည်းအဝေးအား ပြုလုပ်ခဲ့ခြင်း မရှိသည့်အပြင် ဥပဒေနှင့် မညီသော ပြဋ္ဌာန်းချက်များကို အတည်ပြုခဲ့ကြောင်း ထပ်လောင်းပြောဆိုသည်။

၂၀၂၀ ပြည့်နှစ် အထွေထွေရွေးကောက်ပွဲတွင် မဲမသမာမှု ဖြစ်ပွားခဲ့ကြောင်း၊ ၁၉၈၈ ခုနှစ်ကတည်းက ဖြတ်သန်းခဲ့ရသည့် သမိုင်းကြောင်းများအရ “ဒီမိုကရေစီကနုနု မုန်တိုင်းက ထန်ထန်” ဖြစ်ပေါ်နေသည့် ကာလဖြစ်ကြောင်း စစ်ခေါင်းဆောင် မင်းအောင်လှိုင်က ခိုင်းနှိုင်းပြောဆိုသည်။

ယခုနှစ် ၂၀၂၅ ဒီဇင်ဘာလကုန်ပိုင်း သို့မဟုတ် လာမည့်နှစ် ၂၀၂၆ ဇန်နဝါရီ လဆန်းပိုင်းတွင် ရွေးကောက်ပွဲ ကျင်းပရန် စစ်ကောင်စီဘက်က ပြင်ဆင်နေပြီး နိုင်ငံရေးပါတီ ၅၀ ကို မှတ်ပုံတင်ခွင့်ပြု၍ ပါတီသစ်တည်ထောင်ခွင့် လျှောက်ထားသည့်ပါတီ ၂၁ ခုရှိသည်ဟု စစ်ကောင်စီလက်အောက်ခံ UEC က ထုတ်ပြန်ထားသည်။

သို့သော် ရွေးကောက်ပွဲကျင်းပမည့်ရက်ကို တိတိကျကျ သတ်မှတ်ထုတ်ပြန်ခြင်း မရှိသေးဘဲ လာမည့် ဇူလိုင်လ ၃၁ ရက်တွင် အရေးပေါ်ကာလ သက်တမ်းကုန်ဆုံးချိန် ပြုလုပ်မည့် အမျိုးသားကာကွယ်ရေးနှင့် လုံခြုံရေးကောင်စီ အစည်းအဝေး နောက်ပိုင်းတွင် ထုတ်ပြန်ကြေညာနိုင်ကြောင်း နိုင်ငံရေးလေ့လာသုံးသူများက ပြောဆိုသည်။

၂၀၂၅ အတွင်း စစ်ကောင်စီ ကျင်းပမည့် ရွေးကောက်ပွဲကို အမျိုးသားညီညွတ်ရေးအစိုးရ (NUG) နှင့် တိုင်းရင်းသားလက်နက်ကိုင်တပ်ဖွဲ့များလည်း ဆန့်ကျင်ကန့်ကွက်ထားပြီး အာဆီယံ အဖွဲ့ဝင်နိုင်ငံများမှ စစ်ကောင်စီအနေဖြင့် ရွေးကောက်ပွဲကို ဦးစားမပေးဘဲ အပစ်အခတ် ရပ်စဲပြီး တွေ့ဆုံဆွေးနွေးပွဲ စတင်နိုင်ရန် ဇန်နဝါရီလတွင် တိုက်တွန်းထားသည်။