ထိုင်းနိုင်ငံမြောက်ပိုင်း ချင်းရိုင်းခရိုင် မဲ့ယောင်းကျေးရွာ (Mae Yao) ရှိ ကရင်ဆင်စခန်းမှ ဆင်များသည် နမ့်ခုတ်မြစ်ထဲသို့ ရေကစားပြီးသည့်နောက် အဖုအထစ် အနာများဖြစ်ပွားနေကြောင်း ထိုင်းသတင်း၌ ဖော်ပြသည်။

ဆင်များ အဖုအထစ်အနာများဖြစ်ပွားမှုကြောင့် ကရင်ဆင်စခန်းမှ ခရီးသွားဧည့်သည်များ ၈၀ ရာခိုင်နှုန်း လျှော့ကျသွားကြောင်း ဆင်စခန်းမှ မန်နေဂျာအားကိုးကားပြီး Transborder News တွင် ဖော်ပြထားသည်။

ထိုကြောင့် မေလ ၁၇ ရက်နေ့တွင် ကရင်စခန်းတွင် Nakha Studio မှ အနုပညာရှင်များအဖွဲ့သည် နမ့်ခုတ်မြစ်အကြောင်း ရေးစပ်ထားသည့် သီးချင်းတစ်ပုဒ်ကို မှတ်တမ်းတင်ခဲ့ကြသည်ဟု သိရသည်။

လက်ရှိ နမ့်ခုတ်မြစ်အထက်ပိုင်း သျှမ်းပြည်အရှေ့ပိုင်း မိုးဆတ်မြို့နယ်တွင် သတ္တုတူးဖော်မှုများကြောင့် မြစ်ရေများအဆိပ်သင့်နေကြောင်း သိရသည်။

သတ္တုတွင်းက ထွက်သည့် ဓာတုစွန့်ပစ်ပစ္စည်းများသည် မိုးဆတ်ဒေသမှ ချင်းမိုင်ခရိုင် မဲ့အိုင်းမြို့နယ်ထဲသို့ ဖြတ်သန်းစီးဆင်းသော နမ့်ခုတ်မြစ်အတွင်းသို့ စီးဝင်ကာ ရေအရင်းအမြစ်များကို ညစ်ညမ်းစေသည်ဟု ရှမ်းလူ့အခွင့်အရေးမဏ္ဍိုင် SHRF က ထောက်ပြထားသည်။

ရေများအဆိပ်သင့်နေကြောင်း သတင်းများထွက်ပေါ်လာချိန်မှစ၍ ယနေ့ထိ မဲ့ယောင်းကျေးရွာ (Mae Yao) ရှိ ကရင်ဆင်စခန်းတွင် အဖုအထက်အနားများ ဖြစ်ပွားနေသည့် ဆင်အကောင်ရေ ၉ ကောင်ရှိပြီ ဖြစ်ကြောင်း Transborder News ၌ ဖော်ပြထားသည်။

ပြီးခဲ့သည့် မေလဆန်းအတွင်း နမ့်ခုတ်မြစ်အတွင်း ဖမ်းမိသောငါးများတွင်လည်း အနာပဆုတ်များ ဖြစ်ပွားနေကြောင်း သိရသည်။

ထိုင်း-မြန်မာနယ်စပ် သတ္တုတွင်း လုပ်ငန်းများကြောင့် သဘာဝပတ်ဝန်းကျင်ကို ပြင်းထန်စွာထိခိုက်စေပြီး ဒေသခံ ပြည်သူတစ်သန်းကျော် ကျန်းမာရေးဆိုးရွာစွာထိခိုက်လာနိုင်ကြောင်း ရှမ်းလူ့အခွင့်အရေးမဏ္ဍိုင် SHRF က မေလ ၁၅ ရက်နေ့တွင် ထုတ်ပြန်ထားသည်။