သျှမ်းပြည်တောင်ပိုင်း ဖယ်ခုံမြို့နယ် လအိကျေးရွာရှိ ဘန်ကောက်စစ်ရှောင်စခန်းကို စစ်ကောင်စီက ပေါင် (၅၀၀) ဗုံးဖြင့် ထပ်မံကြဲချခဲ့ကြောင်း စုံစမ်းသိရသည်။

ယမန်နေ့ (မေလ ၁၅ ရက်) ည ၉ နာရီဝန်းကျင်တွင် ဖယ်ခုံမြို့နယ် လအိကျေးရွာရှိ ဘန်ကောက်စစ်ရှောင်စခန်းကို စစ်ကောင်စီက ပေါင် (၅၀၀) ဗုံးဖြင့် ၂ လုံးကြဲချခဲ့ပြီး အဆောက်အဦအချို့ ပျက်စီးကာ လူထိခိုက်သေဆုံးမှု မရှိကြောင်း ရှမ်းတောင်အမျိုးသားများ ကာကွယ်ရေးတပ် SSNDF/KNDF မှ စစ်ထောက် စိုင်းဆိုင်ဖက သျှမ်းသံတော်ဆင့်ကို ပြောသည်။

“မနေ့ညက လအိကျေးရွာရဲ့ ဘန်ကောင်စစ်ရှောင်စခန်းကို ပေါင် (၅၀၀) ဗုံးနဲ့ ၂ လုံးကြဲသွားတယ်။ စစ်ရှောင်စခန်းမှန်း သိရက်နဲ့ကြဲတာ” ဟု စိုင်းဆိုင်ဖက ပြောသည်။

စစ်ဘေးဒုက္ခသည်များ ခှိုလှုံနေသည့် ဘန်ကောင်စစ်ရှောင်စခန်းကို စစ်ကောင်စီ လေကြောင်းဖြင့် မကြာခဏ ဆိုသလို ဗုံးကြဲတိုက်ခိုက်လျက်ရှိပြီး၊ ယခုအခါသည် တတိယအကြိမ်မြောက်အပြင်းအထန်း တိုက်ခိုက်ခဲ့ကြောင်း သိရသည်။

သျှမ်း-ကရင်နီ (ကယား) နယ်စပ် လအိကျေးရွာတွင် တည်ရှိသည် ဘန်ကောက်စစ်ရှောင်စခန်းကို ပြီးခဲ့သည့် ၂၀၂၄ စက်တင်ဘာ ၅ ရက်နေ့တွင် ပထမဆုံးအကြိမ် လေကြောင်းတိုက်ခိုက်ခံခဲ့ရသည့် ဖြစ်စဉ်တွင် ကလေးငယ် ၇ ဦး အပါအဝင် ပြည်သူ ၉ ဦးသေဆုံးခဲ့ပြီး နေအိမ်အလုံး ၂၀ ကျော် ထိခိုက်ပျက်စီးခဲ့သည်။

ထို့အပြင် ၂၀၂၄ နိုဝင်ဘာလ ၁၈ ရက်တွင် ဘန်ကောင်စစ်ရှောင်စခန်းကို စစ်ကောင်စီက ဒုတိယအကြိမ် လေကြောင်းတိုက်ခိုက်မှုတွင် အမျိုးသမီး ၁ ဦးသေဆုံးပြီး ဒေသခံ ၂ ဦး ဒဏ်ရာရရှိခဲ့ကြောင်း သိရသည်။

ကရင်နီပြည်နယ်အတွင်း ထောက်ပို့ဆက်သွယ်ရေး လမ်းကြောင်းအတွက် အဓိကအရေးပါသော မြို့တော် လွိုင်ကော်-မိုးဗြဲ-ဖယ်ခုံ-ပင်လောင်း လမ်းပိုင်းကို စစ်ကောင်စီက ပြန်လည်ထိန်းချုပ်ရန် တော်လှန်ရေးအင်အားစုများ ထိန်းချုပ်ထားသော မိုးဗြဲကို ထိုးစစ်ဆင်လာ၍ ယခုရက်ပိုင်း၌ တိုက်ပွဲများ ပြင်းထန်နေကြောင်း SSNDF/KNDF မှ စစ်ထောက် စိုင်းဆိုင်ဖ ထပ်လောင်းပြောသည်။

“အဓိကတော့ သူတို့ရဲ့ နယ်မြေစိုးမိုးမှုနဲ့ သူတို့ ဗျူဟာအရ ပင်လောင်း၊ ဖယ်ခုံ၊ မိုးဗြဲ၊ လွိုင်ကော် လမ်းမကြီးကို ရချင်တာပေါ့။ ပြီးတော့ စစ်ကောင်စီ ရွှေးကောက်ပွဲအတွက် ကရင်နီလွိုင်ကော်က အရေးကြီးတဲ့ အစိတ်အပိုင်းမှာ ပါနေတာ” ဟု စိုင်းဆိုင်ဖက ပြောသည်။

စစ်ကောင်စီသည် ပအိုဝ်းပြည်သူ့စစ် PNO အင်အားနှင့် ယခုမေလဆန်းမှစ၍ ညောင်ရွှေ-စန့်စွဲ-စန့်လိတ်-ထီရီး လမ်းပိုင်းတွင် စစ်ကြောင်း ၆ ကြောင်းဖြင့် ထိုးစစ်ဆင်လာာနေကြောင်း ၎င်းကဆက်ပြောသည်။

ကရင်နီတော်လှန်ရေး ပူးပေါင်းတပ်များသည် ၂၀၂၃ ခုနှစ် နိုဝင်ဘာလအတွင်း မိုးဗြဲမြို့ကို သိမ်းပိုက်နိုင်ခဲ့သော်လည်း မြို့ပြင်ရှိ ခမ၇ (၄၂၂) တပ် မသိမ်းနိုင်ခဲ့ပေ။ ထို့ကြောင့် စစ်ကောင်စီတပ်သည် ထိုစစ်တပ်ကို အခြေပြုကာ စစ်သည်အင်အား၊ လက်နက်ခဲယမ်းများ ဖြည့်တင်းပြီး မိုးဗြဲမြို့ကို စစ်ကြောင်းထိုး၍ ပြန်သိမ်းနိုင်ရန် ကြိုးပမ်းနေခြင်း ဖြစ်သည်။