တိုက်ပွဲပြင်းထန်နေသည့် သျှမ်း-ကရင်နီနယ်စပ် သျှမ်းပြည်တောင်ပိုင်း မိုးဗြဲမြို့အနီးပတ်ဝန်းကျင်တွင် နေထိုင်သည့် စစ်ဘေးရှောင် တစ်ထောင်ကျော်အတွက် အမိုးအကာများ အရေးပေါ်လိုအပ်နေကြောင်း စုံစမ်းသိရသည်။

အဆိုပါ စစ်ဘေးရှောင် တစ်ထောင်ကျော်သည် ကရင်နီပြည် တွင် စစ်ကောင်စီနှင့် တော်လှန်ရေ အင်အားစုတို့ ကြား လွန်ခဲ့သည့် ၂၀၂၃ခုနစ် ၁၁ရက် ၁၁လ ပိုင်း “၁၁.၁၁” စစ်ဆင်ရေးကြောင့် မိုးဗြဲမြို့ အနီးပတ်ဝန်းကျင် တောထဲ ထွက်ပြေးတိမ်းရှောင်လာကြသူများဖြစ်သည်။

လက်ရှိစစ်ဘေးရှောင်လာခဲ့သည်မှာ တစ်နှစ်ကျော် ကာလဖြစ်လာပြီး၊ ၎င်းနေထိုင်သည့် အနီးဝန်းကျင်တွင် တိုက်ပွဲများထပ်မံပြင်းထန်လာကြောင်း တော်လှန်ရေး အင်အားစု များက သျှမ်းသံတော်ဆင့်ကိုပြောသည်။

“ အခုရက်ပိုင်း က မိုးဗြဲမြို့မှာ နေ့တိုင်းတိုက်ပွဲပြင်းထန်နေတယ်။ စစ်ကောင်စီဘက်ကလည်း လက်နက်ကြီးနဲ့ ဒရုန်းတွေနဲ့တိုက်ခိုက်နေတယ်။ တဘက်မှာလည်း စစ်ဘေးရှောင်တွေကရှိတော့ သူတို့အတွက်လည်း မိုးကာတွေက လိုအပ်နေတယ်” ဟု မိုးဗြဲပြည်သူ့ကာကွယ်ရေးတပ် PDF တပ်သားတစ်ဉီးက ပြောသည်။

အဆိုပါ စစ်ဘေးရှောင်များသည် မိုးဗြဲမြို့နှင့်တစ်နာရီခန့်သွားရသည့် တောထဲတွင် နေထိုင်ကြသည်မှာ တစ်နှစ်ကျော်ရှိလာပြီး၊ အလှူရှင်များလည်း မရှိကြောင်း လည်း ၎င်းက ဆိုသည်။

“စစ်ရှောင်တွေကလည်း နှစ်ရှည်ရှောင်ရတော့ သူတို့လည်း အဆင်မပြေဘူး။ အခုဒီမိုးဗြဲမြို့အနီးနား တောတို့ ရွာတို့မှ စစ်ရှောင်နေတဲ့သူဆို မိုးရာသီရောက်တော့မှာဆိုတော့ မိုးကာတို့၊ စားနပ်ရိက္ခာတို့လိုတယ်။” ဟု ၎င်းက ထပ်လောင်းပြောသည်။

စစ်ကောင်စီသည် မိုးဗြဲမြို့နှင့် ပြည်ထောင်စုလမ်းမကြီးကို ပြန်လည်ရရှိရန် အပြင်းအထန် ထိုးစစ်ဆင် နေကြောင်းနှင့် မိုးဗြဲမြို့ပေါ်ရှိ ကာကင်းစခန်းအချို့ကို တော်လှန်ရေးအင်အားစုများ လက်လွှတ်လိုက် ရကြောင်းသိရသည်။

မိုးဗြဲမြို့သိမ်းတိုက်ပွဲအတွင်း စစ်ကောင်စီတပ်နှင့် သျှမ်းတောင်စစ်ဒေသခွဲ၊ PDF ဗျူဟာအမှတ် (၁) လက်အောက်ရှိ တပ်ရင်းတပ်ဖွဲ့၊ ကရင်နီအမျိုးသား ကာကွယ်ရေးတပ် KNDFအပြင် အခြားမဟာမိတ်တပ်ပေါင်းစုတို့ ပါဝင်တိုက်ခိုက်နေကြောင်းသိရသည်။

မိုးဗြဲမြို့သည် နေပြည်တော်နှင့် မိုင် ၁၀၀ ဝန်းကျင်သာကွာဝေးပြီး မိုးဗြဲမြို့၏ မြောက်ဘက်တွင် ပင်လောင်း၊ညောင်ရွှေ နှင့်ဆီဆိုင်မြို့တို့ရှိပြီး တောင်ဘက်တွင် ဖရူဆိုနှင့် သံတောင်ကြီး၊အရှေ့ဘက်တွင် လွိုင်ကော်နှင့် ဒီးမော့ဆို၊အနောက်ဘက်တွင် ပျဉ်းမနားမြို့တို့နှင့် နယ်နိမတ်ချင်း ထိစပ်နေသည့်အတွက် နှစ်ဖက်တပ်တို့၏ စစ်ရေးအရ အရေးပါသည့် နေရာဖြစ်သည်။