မေ(၆)ရက် ညပိုင်းတွင် ထပ်မံလှုပ်ခတ်ခဲ့သော အင်အားအသင့်အတင့် နောက်ဆက်တွဲ ငလျင်ကြောင့် သျှမ်းပြည်မြောက်ပိုင်း၊ နောင်ချိုမြို့နယ် အပါအဝင် ရန်ကုန်မြို့နှင့် မန္တလေးမြို့နေ ပြည်သူများ စိုးရိမ်ထိတ်လန့်ခဲ့ကြကြောင်း စုံစမ်းသိရသည်။

လူအိမ်မောကျချိန်တွင် မန္တလေးတိုင်း ကျောက်ဆည်မြို့အနီး ဗဟိုပြု၍ ပြင်းအား ၄ ဒဿမ ၄ အဆင့်ရှိ ငလျင်လှုပ်ခတ်ခဲ့ကြောင်း သိရသည်။

ယနေ့ (မေလ ၇ ရက်) နံနက် ၁ နာရီခွဲဝန်းကျင်တွင် မန္တလေးတိုင်း၊ ကျောက်ဆည်မြို့ အရှေ့မြောက်ဘက် ၂၅ ကီလိုမီတာအကွာ၊ မြေအောက် အနက် ၁၀ ကီလိုမီတာတွင် ဗဟိုပြု၍ ရစ်ခ်တာစကေး ၄ ဒဿမ ၄ အဆင့်ပြင်းအားရှိ ငလျင်လှုပ်ခတ်ခဲ့ကြောင်း မန္တလေးမြို့ဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

“ဒီမနက် အိပ်လို့ကောင်းတဲ့ အချိန်ကြီးမှာကို ဖြစ်သွားတာ။ မနက် ၁ နာရီ ခွဲဝန်းကျင်လောက်က ဖြစ်သွားတာ။ တော်သေးတယ် အိမ်အပြင်မှာအိပ်လို့၊ အိမ်ထဲမှာ အိပ်တဲ့လူတွေကတော့ တော်တော်လှုပ်သွားတယ်လို့ ပြောတယ်။ ပြင်းအားကလည်း ၄ ဒဿမ ၄ လောက် ရှိတယ်လေ”ဟု ၎င်းအမျိုးသားက ပြောသည်။

ထို့အပြင် ရန်ကုန်မြို့တွင်လည်း ပြင်းအားမဂ္ဂနီကျု ၂ ဒဿမ ၂ ဖြင့် ပထမတစ်ကြိမ် လှုပ်ခတ်ခဲ့ပြီး ဒုတိယအကြိမ်တွင် ပြင်းအား ၃ ဒဿမ ၇ အဆင့်ရှိ နောက်ဆက်တွဲငလျင် ထပ်မံလှုပ်ခတ်ခဲ့ခြင်းကြောင့် မြို့နေပြည်သူများ ထိတ်လန့်နေကြပြီး တိုက်အောက်သို့ ပြေးဆင်းကြရသည်ဟု ရန်ကုန်မြို့နေ ပြည်သူများက ပြောသည်။

“ညကအိပ်နေတာ၊ ပထမ တစ်ခါလှုပ်တော့ အဲ လှုပ်နေတယ်ပေါ့။ ဒုတိယတစ်ခါက အရမ်းသိသာတော့ အောက်ပြေးဆင်းတာ။ ဖုန်းတစ်လုံးယူပြီး တစ်ဆောင်လုံး ပြေးဆင်းကြတာ တန်းနေတာပဲ။ ကြောက်တာပေါ့၊ တိုက်အမြင့်မှာ နေရတာ။ ငါက အလုပ်လာလုပ်တာ ငါသာ တိုက်ပိသွားရင် မိသားစုတွေတောင် သိလိုက်မှာ မဟုတ်ဘူး။ ငလျင်ကလည်း စိတ်ဒဏ်ရာ ပေးလွန်းတယ်၊ ညဆို အိပ်မပျော်ရဲဘူး”ဟု ရန်ကုန်မြို့တွင် အလုပ်လုပ်ကိုင်နေသည့် အသက်(၂၀)ကျော်အရွယ် အမျိုးသမီးတစ်ဦးက ပြောသည်။

ယခုကဲ့သို့ နောက်ဆက်တွဲ ငလျင်ငယ်များ ဆက်တိုက်လှုပ်ခတ်နေသည်ကို မပေါ့ဆသင့်ကြောင်းနှင့် အမြဲသတိဝီရိယ ရှိထားသင့်ကြောင်း၊ ယခင်က မန္တလေးတွင် ငလျင်ကြီး မလှုပ်ခတ်မှီ ယခုကဲ့သို့ ငလျင်ငယ်များ လှုပ်ခတ်ခဲ့သောကြောင့် ငလျင်ကြီး ထပ်မံလှုပ်ခတ်မည်ကို စိုးရိမ်ကြောင်း ၎င်းက ထပ်လောင်းပြောသည်။

ဆက်လက်ပြီး သျှမ်းပြည်မြောက်ပိုင်း၊ နောင်ချိုမြို့တွင်လည်း ပြင်းအား ၃ ဒဿမ ၃ အဆင့်ရှိ မြေငလျင်လှုပ်ခတ်ခဲ့သောကြောင့် ဒေသခံများ ထိတ်လန့်ခဲ့ရကြောင်း သိရသည်။

“အရင်တစ်ခါလို အရမ်းကြီးမဟုတ်ပေမယ့် နည်းနည်းလှုပ်ရင်တောင် အရင်တစ်ခါလည်း လှုပ်ခဲ့ ဖူးတော့ သတိထားနေရတာ။ ခုကဘာလို့ ငလျင်ငယ်တွေ ခဏခဏ လှုပ်လည်း မသိဘူး။ နောက်ထပ် ငလျင်ကြီးများ ထပ်လှုပ်အုံးမလား စိတ်ပူနေရတယ်” ဟု နောင်ချိုဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။

ပြီးခဲ့သည့် မတ်လ (၂၈)ရက်နေ့ နေ့လည်ပိုင်းတွင် စစ်ကိုင်းမြို့အနီး ဗဟိုပြု၍ အင်အား ၇ ဒဿမ ၇ ရှိ ငလျင်ကြီး လှုပ်ခတ်ခဲ့သောကြောင့် မန္တလေး၊ စစ်ကိုင်းနှင့် သျှမ်းပြည်တောင်ပိုင်း အောင်ပန်း ၊ အင်းလေးဒေသတို့တွင် ငလျင်ဒဏ်ကြောင့် လူထိခိုက်သေဆုံးပြီး အဆောက်အဦများ ပျက်စီးဆုံးရှုံးခဲ့ရသည်။
အဆိုပါ ငလျင်ကြောင့် မြန်မာတစ်နိုင်ငံလုံးတွင် စုစုပေါင်း (၄၂၁၂)ဦး သေဆုံးခဲ့ပြီး (၆၅၈၈) ဦးကျော်ဒဏ်ရာ ရရှိခဲ့ကြောင်း သိရသည်။

ယခုလက်ရှိတွင် ငလျင်ဒဏ်သင့် စစ်ကိုင်း၊ မန္တလေးနှင့် အင်းလေးဒေသတို့တွင် ပြန်လည်ထူထောင်ရေးအတွက် အကူအညီ လိုအပ်နေဆဲဖြစ်ပြီး ပြည်သူများအနေဖြင့်လည်း အိုးမဲ့အိမ်မဲ့ ဖြစ်ကာ စားဝတ်နေရေးအတွက် ခက်ခဲမှုများ ကြုံတွေ့နေကြရသည်ဟု ငလျင်ဘေး ကူညီနေသူများထံမှ သိရသည်။

မတ် ၂၈ ရက်က လှုပ်ခတ်ခဲ့သည့် အင်အားအလွန်ကြီးမားသည့် ရစ်ချ်တာစကေး ၇ ဒသမ ၇ ရှိသည့် အင်အားပြင်းငလျင် လှုပ်ခတ်မှုအပြီးတွင် ရစ်ချ်တာစကေး ၃ အထက်ရှိ နောက်ဆက်တွဲငလျင် အကြိမ် (၂၀၀) နီးပါး လှုပ်ခတ်ခဲ့ကြောင်း မိုးလေဝသနှင့် ဇလဗေဒညွှန်ကြားမှုဦးစီးဌာနက ထုတ်ပြန်ထားသည်။