ရုရှားသမ္မတ ဗလာဒီမာ ပူတင်၏ ဖိတ်ကြားချက်အရ နှစ် (၈၀) ပြည့် ရင်ပြင်နီ ချီတက်ပွဲ အထိမ်းအမှတ် အခမ်းအနားသို့ တက်ရောက်ရန်အတွက် စစ်ခေါင်းဆောင် ဗိုလ်ချုပ်မှူးကြီး မင်းအောင်လှိုင် ရုရှားနိုင်ငံသို့ ထပ်မံသွားရောက်မည်ဖြစ်ကြောင်း စစ်ကောင်စီ၏ သတင်းစာများက ဖော်ပြသည်။

မေလ ၉ ရက်နေ့တွင် ရုရှားနိုင်ငံ မော်စကိုမြို့တွင် ပြုလုပ်မည့် နှစ် (၈၀) ပြည့် ရင်ပြင်နီ ချီတက်ပွဲ အထိမ်းအမှတ် အခမ်းအနားသို့ စစ်ခေါင်းဆောင် မင်းအောင်လှိုင်နှင့်အတူ ဇနီးဖြစ်သူ ဒေါ်ကြူကြူလှလည်း တက်ရောက်မည် ဖြစ်ကြောင်း သိရသည်။

ဒုတိယကမ္ဘာစစ်အတွင်း ဆိုဗီယက်တို့က ကျူးကျော်သူ နာဇီဂျာမနီအပေါ် အောင်နိုင်သည့် အထိမ်းအမှတ်အဖြစ် နှစ်စဉ်ပြုလုပ်သည့် စစ်ရေးပြပွဲကို ယခုနှစ်တွင် စစ်ကောင်စီတပ်မှ တပ်ဖွဲ့ဝင်အချို့ ပါဝင်စစ်ရေးပြမည် ဖြစ်ကြောင်း သိရသည်။

ထိုစစ်ရေးပြပွဲကို တရုတ်သမ္မတ ရှီကျင့်ဖျင်လည်း တက်ရောက်မည်ဖြစ်ပြီး အခမ်းအနားသို့ တက်ရောက်လာသည့် အခြားသော နိုင်ငံ့ခေါင်းဆောင်များနှင့်လည်း စစ်ခေါင်းဆောင်က သီးခြားတွေ့ဆုံ ဆွေးနွေးမှုများ ပြုလုပ်သွားမည်ဟု စစ်ကောင်စီထုတ် သတင်းစာ၌ ဖော်ပြသည်။

ထို့ပြင် နှစ်နိုင်ငံအစိုးရနှင့် ပြည်သူများအကြား ချစ်ကြည်ရေး၊ စီးပွားရေး၊ လုံခြုံရေးဆိုင်ရာများနှင့် ကဏ္ဍပေါင်းစုံတွင် ပူးပေါင်းဆောင်ရွက်သွားမည်ဖြစ်ကြောင်း သိရသည်။

သို့သော် နှစ် (၈၀) ပြည့် အထိမ်းအမှတ်အတွက် မေလ ၈ ရက်နေ့မှ မေလ ၁၀ ရက်နေ့အထိ သုံးရက်ကြာ အပစ်အခတ် ရပ်စဲရန် ရုရှား၏ ကမ်းလှမ်းချက်ကို မေလ ၃ ရက်နေ့တွင် ယူကရိန်းသမ္မတ ဇီလန်စကီးက ပယ်ချခဲ့သည့်အပြင် ရုရှားက ဖိတ်ကြားထားသော နိုင်ငံတချို့မှ ခေါင်းဆောင်များ၏ လုံခြုံရေးကို အာမခံချက် မပေးနိုင်ကြောင်း ထုတ်ဖော်ပြောဆိုခဲ့သည်။

ပြီးခဲ့သည့် မတ်လဆန်းက သွားရောက်ခဲ့သည့် ဗိုလ်ချုပ်မှူးကြီး မင်းအောင်လှိုင်၏ ရုရှားခရီးစဉ်အတွင်း မြန်မာနိုင်ငံ၏ စီးပွားရေးလုပ်ငန်းနယ်ပယ် ၁၀ ခုကျော်တွင် ပူးပေါင်းဆောင်ရွက်ရန် စစ်ကောင်စီနှင့် ရုရှားအစိုးရတို့က ဆွေးနွေးသဘောတူခဲ့ကြသည်။

ယင်းမှာ ထားဝယ်အထူးစီးပွားရေးဇုန်၊ နျူကလီးယား ဓာတ်အားပေးစက်ရုံနှင့် စွမ်းအင်လုပ်ငန်း၊ နည်းပညာ၊ သတင်းအချက်အလက်နှင့် တယ်လီကွန် ဆက်သွယ်ရေး၊ သတ္ထုတူးဖော်ရေး၊ စိုက်ပျိုးရေး၊ အစားအသောက်၊ သယ်ပူပို့ဆောင်ရေး၊ အလုပ်သမားပို့ဆောင်ရေး၊ ကုန်သွယ်ရေး၊ ဘဏ်လုပ်ငန်း၊ ပညာရေးနှင့် ခရီးသွားလုပ်ငန်းတို့တွင် ပူးပေါင်းဆောင်ရွက်မှုတိုးမြှင့်ရန် ဆွေးနွေးသဘောတူခဲ့ကြကြောင်း စစ်ကောင်စီ၏ ထုတ်ပြန်ချက်များအရ သိရသည်။

စစ်ခေါင်းဆောင် ဗိုလ်ချုပ်မှူးကြီး အောင်လှိုင်သည် ၂၀၂၂ ခုနှစ် စက်တင်ဘာလတွင် ရုရှားနိုင်ငံ၌ ကျင်းပသည့် ၇ ကြိမ်မြောက် အရှေ့ဖျားစီးပွားရေးဖိုရမ်ကို တက်ရောက်ပြီး ရုရှားသမ္မတ ပူတင်နှင့် တွေ့ဆုံထားသည်။

ယခု ၂၀၂၅ ခရီးစဉ်အရ ဗိုလ်ချုပ်မှူးကြီး မင်းအောင်လှိုင်သည် ရုရှားသမ္မတနှင့် တတိယမြောက် တွေ့ဆုံနိုင်ရန် ဖြစ်လာခြင်း ဖြစ်သည်။

ထိုခရီးစဉ်သည် အာဏာသိမ်းပြီးနောက် စစ်ခေါင်းဆောင်၏ ၅ ကြိမ်မြောက် ရုရှားခရီးစဉ် ဖြစ်လာမည်ဖြစ်ပြီး တပ်ချုပ်ဖြစ်ပြီးကတည်းကဆိုလျှင် ၁၂ ကြိမ်မြောက် ခရီးစဉ်ဖြစ်လာမည် ဖြစ်သည်။

ပုံစာ – ၂၀၂၅ မတ်လ ၄ ရက်နေက ရုရှားသမ္မတ ပူတင် က စစ်ခေါင်းဆောင် မင်းအောင်လှိုင်ကို ကရင်မလင်နန်းတော်မှာ လက်ခံတွေ့ဆုံစဉ်။