ထိုင်း-မြန်မာနယ်စပ်ဒေသ တာချီလိတ်မြို့တွင် မိုးသည်းထန်စွာ ရွာသွန်းမှုကြောင့် မယ်ဆိုင်ချောင်းရေလျှံပြီး ရေကြီးရေလျှံမှု ဖြစ်ပွားနေကြောင်း ဒေသခံများထံမှ သိရသည်။
ယနေ့ (ဧပြီလ ၂၉ ရက်) နံနက်ပိုင်း ၁၀ နာရီအထိ မိုးသည်ထန်စွာ ရွာသွန်းမှုကြောင့် မယ်ဆိုင်ချောင်းရေလျှံကာ တာချီလိတ်နှင့် မယ်ဆိုင်မြို့ပေါ်ရှိ ရပ်ကွက် အချို့တွင် ရေးကြီးရေလျှံမှုဖြစ်ပွားခဲ့ကြောင်း တာချီလိတ်မြို့ဒေသခံ အမျိုးသမီးတစ်ဦးက သျှမ်းသံတော်ဆင့်ကို ပြောသည်။
“ဒီနေ့မိုးရွာတာ တမနက်လုံးပဲ။ နံနက်ပိုင်း ၁၀ လောက်မှ မိုးတိတ်သွားတာ။ မယ်ဆိုင်ချောင်းရေလျှံပြီးတော့ ရေဝင်တာ။ နေအိမ်ထဲထိတော့ ရေမဝင်ဘူး၊ ဒါပေမယ့် တာလော့ဈေးထဲတော့ အကုန်လုံးဝင်ပြီ” ဟု တာချီလိတ်မြိုဒေသခံ အမျိုးသမီးတစ်ဦးက ပြောသည်။
ပင်လယ်ရေ မျက်နှာပြင် အမြင့်ပေ ၁,၂၀၀ ကျော်တွင်ရှိသော တာချီလိတ်မြို့တွင် ရွာသွန်းမှုကြောင့် နှစ်စဉ်နှစ်တိုင်း ရေလွှမ်းမိုး ခံရလေ့ရှိသော်လည်း ယခုနောက်ပိုင်းတွင် မြစ်အထက်ပိုင်း ရွှေတူးဖော်မှုများကြောင့် ပိုဆိုးရွားလာကြောင်း ဒေသခံများက ပြောသည်။
မိုးသဲကြီးမဲကြီး နှစ် နာရီခန့်ရွာချလိုက်လျှင် မယ်ဆိုင်ချောင်းရေ ရုတ်တရက်မြင့်တက်လာပြီး ရေလျှံကာ ရေလွှမ်းမိုးမှု ဖြစ်ပွားလေ့ရှိသည်။
ထိုင်းနိုင်ငံ သဘာဝအရင်းအမြစ်ဌာန၏ လေ့လာတွေ့ရှိချက်များအရ ထိုင်း-မြန်မာနယ်စပ်တစ်လျှောက် ဖြစ်ပေါ်ခဲ့သည့် ရေကြီးမှုအတွင်း မကြုံစဖူးနှုန်းမြေများ တင်ကျန်မှုသည် သျှမ်းပြည်အရှေ့ပိုင်း (မယ်ဆိုင်အထက်ပိုင်း) ရှိ အကြီးစား ရွှေတူးဖော်မှုများကြောင့် ဖြစ်ကြောင်း ဖော်ပြသည်။
“ဝ” တပ် UWSA နှင့် လာဟူးလက်နက်ကိုင် တပ်ထိန်းချုပ်ရာ သျှမ်းပြည်အရှေ့ပိုင်း မိုးဆတ်မြို့ အရှေ့ဘက် မယ်ဆိုင်မြစ်အထက်ပိုင်းတွင် စစ်တပ်အာဏာသိမ်းသည့် ၂၀၂၁ နှစ်ကုန်ပိုင်းမှစတင်၍ ရွှေတူးဖော်မှုများ အကြီးအကျယ်တိုးချဲ့လာနေကြောင်း ရှမ်းလူအခွင့်အရေးမဏ္ဍိုင် (SHRF) က ၂၀၂၄ နိုဝင်ဘာလ ၂၇ ရက်တွင် ထုတ်ပြန်သည်။
၂၀၂၄ စက်တင်ဘာလလဆန်းပိုင်းက ယာဂီမုန်းတိုင်း၏ အရှိန်ကြောင့် ထိုင်း-မြန်မာနယ်စပ် တာချီလိတ်မြို့တွင် ရေကြီးရေလျှံမှု ဖြစ်ပေါ်ခဲ့ပြီး နေအိမ်အများအပြား ရေလွှမ်းမိုးခံ့ခဲ့ရသည်။
လက်ရှိအချိန်ထိ နေအိမ်တချို့မှာ ပြန်လည်ထူထောင်နိုင်ခြင်းမရှိသေးသဖြင့် နောင်လာမည့် မိုးရာသီရာအတွင်း ရေကြီးရေလျှံထပ်မံဖြစ်ပွားမည်ကို စိုးရိမ်နေကြကြောင်း ဒေသခံများကပြောသည်။
Leave a Comments