သျှမ်းပြည် လားရှိုးမြို့ပေါ်သို့ စစ်ကောင်စီ၏ အုပ်ချုပ်ရေးယန္တရားများ ပြန်လည်ပတ်ပါက စစ်မှုထမ်းခေါ်ယူခံရမည်ကို ဒေသခံများ စိုးရိမ်နေကြောင်း စုံစမ်းသိရသည်။
မေလ (၁) ရက်မှစတင်ပြီး စစ်ကောင်စီတပ် ပြန်လည်အခြေစိုက်ထားသည့် လားရှိုးမြို့ပေါ်တွင် အုပ်ချုပ်ရေးယန္တရားများ ပြန်လည်ပတ်နိုင်ရန် စစ်ကောင်စီလက်အောက်ခံ ဌာနပေါင်းစုံမှ ဝန်ထမ်းအများအပြား ထပ်မံရောက်ရှိနေကြောင်း ဒေသခံများက ပြောသည်။
ပြီးခဲ့သည့် ဧပြီလ ၂၂ ရက်တွင် တရုတ်အကူအညီဖြင့် စစ်ကောင်စီတပ်၏ အရှေ့မြောက် တိုင်းစစ်ဌာနချုပ် (ရမခ) မှ စစ်ကား ၂၀၀ ကျော် လားရှိုးမြို့ပေါ်သို့ ဝင်ရောက်လာခဲ့ပြီး မြို့ပေါ်ရပ်ကွက် (၁၂) ခုကို အုပ်ချုပ်ခွင့်ရမည်ဖြစ်ကြောင်း ဒေသခံများက ပြောဆိုသည်။
“လားရှိုးမှာ ရုံးအားလုံး ပြန်ဖွင့်မယ်လို့ ဝန်ထမ်းအသိုင်းအဝိုင်းက ပြောနေကြတယ်။ စစ်ကောင်စီက သိန္နီ၊ ကွမ်းလုံဘက်အထိ ရုံးပြန်ဖွင့်နိုင်ဖို့ လုပ်နေတယ်လို့ ကြားတယ်။ လားရှိုးပြန်ဝင်ချင်လား၊ သိန္နီပြန်ဝင်ချင်လား စာရင်းပေးဖို့ ပြောနေတာ။ ဒီပုံစံနဲ့ဆိုရင် သိန္နီနဲ့ လားရှိုး အနီးတဝိုက်တောင် ကိုးကန့်အတွက် သိပ်မသေချာဘူး”ဟု လားရှိုးဒေသခံ အမျိုးသားတစ်ဦးက သျှမ်းသံတော်ဆင့်ကို ပြောသည်။
တောင်ကြီးမြို့ရောက် သျှမ်းပြည်မြောက်ပိုင်းမှ ဌာနဆိုင်ရာ ဝန်ထမ်းများနှင့် နေရပ်စွန့်ခွာခဲ့သည့် ဝန်ထမ်းများကို နယ်မြေအခြေအနေ ပြန်လည်အေးချမ်းလာခြင်းကြောင့် တာဝန်ပေးအပ်သည့် အချိန်တွင် မူလတာဝန်ကျရာ ဒေသများသို့ သွားရောက်နိုင်ရန်အတွက် စနစ်တကျ စုဖွဲ့ထားရန် စစ်ကောင်စီလက်အောက်ခံ သျှမ်းပြည်နယ်အစိုးရမှ ဧပြီလ (၁၉) ရက်စွဲဖြင့် ညွှန်ကြားချက် ထုတ်ပြန်ခဲ့သည်။
“ရုံးကတော့ အားလုံးပြန်ဖွင့်မှာပါ၊ ပြန်မဖွင့်နိုင်မှာက စာသင်ကျောင်းတွေပဲ ကျန်မယ်။ ဒါပေမယ့် ပညာရေးမှူးရုံးကတော့ ပြန်ဖွင့်မယ်။ စစ်ကောင်စီအတွက် အရေးကြီးတာက လဝက နဲ့ ထွေအုပ်ပဲ၊ နောက် ဆေးရုံရယ်။ စိုးရိမ်ရတာက သူတို့ပြန်ဝင်လာပြီးတော့ စစ်မှုထမ်းကောက်မှာ ကြောက်တာ၊ အခုတောင် ကိုးကန့်နဲ့ တွဲလုပ်ခဲ့တဲ့ အုပ်ချုပ်ရေးမှူး အကုန်လုံးကို ပြန်အနားပေးထားတာ”ဟု လားရှိုးမြို့မှ ၎င်းဒေသခံ အမျိုးသားက သျှမ်းသံတော်ဆင့်ကို ဆက်ပြောသည်။
လားရှိုးမြို့ကို ကိုးကန့်တပ်ဖွဲ့ MNDAA ထိန်းချုပ်စဉ်က မြို့ပေါ်ရပ်ကွက်များတွင် ခန့်ထားခဲ့သည့် အုပ်ချုပ်ရေးမှူးများကိုလည်း စစ်ကောင်စီ ဝင်ရောက်လာပြီးနောက် တာဝန်မှ ရပ်နားခိုင်းထားပြီး မကြာမီ ရပ်ကွက်အုပ်ချုပ်ရေးမှူး အသစ်များကို ရွေးချယ်ခန့်အပ်သွားမည်ဟု ဆိုသည်။
အလားတူ လားရှိုးမြို့ပေါ်သို့ စစ်ကောင်စီတပ် ပြန်လည်တပ်စွဲခဲ့သည့် ဧပြီလ ၂၂ ရက် နောက်ပိုင်းမှ စတင်ပြီး လားရှိုးမြို့ အဝင်အထွက် (၄) နေရာတွင် စစ်ဆေးရေးဂိတ်များ ဖွင့်လှစ်ကာ ဖြတ်သန်းသွားသည့် ခရီးသည်တင်ကားနှင့် ကုန်တင်ကားများကို ငွေတောင်းခံနေကြောင်း ဒေသခံများက ပြောသည်။
စစ်ကောင်စီဘက်မှ လားရှိုးမြို့အဝင် စစ်ဆေးရေးဂိတ်များကို မယ်ဟန်ကျေးရွာရှိ အဲဗားရှိုင်း စက်ပစ္စည်းဆိုင်တွင် တစ်နေရာ၊ နမ္မတူအထွက်လမ်းဘက် တစ်နေရာ၊ သိန္နီမြို့အထွက် အေတီတံတားထိပ် တစ်နေရာနှင့် အထက်မန်အိုင် ကျေးရွာဘက် တစ်နေရာ၊ စုစုပေါင်း (၄) နေရာတွင် စစ်ဆေးရေးဂိတ် ဖွင့်လှစ်ကာ ငွေတောင်းခံနေကြောင်း သိရသည်။
ထို့အပြင် စစ်ကောင်စီနှင့် ကိုးကန့်တပ်အကြား လားရှိုးမြို့ပေါ်တွင် အုပ်ချုပ်ရေးယန္တရားခွဲဝေမှု တိတိကျကျ မသိရှိရဘဲ ကြားကာလအုပ်ချုပ်ရေး ဖြစ်နေသည့်အတွက် သူခိုး၊ ဓားပြများလည်း အခွင့်အရေးယူကာ သောင်းကျန်းနေကြောင်း ဒေသခံများက ပြောသည်။
Leave a Comments