သျှမ်းပြည်တောင်ပိုင်း၊ ရွာငံမြို့နယ် လင်းဝေးကျေးရွာအုပ်စုတွင် စစ်ကောင်စီတပ်မှ စစ်ကြောင်းထိုးနေပြီး ဒေသခံပြည်သူများကို ဖုန်းလိုင်းဖြတ်တောက်ပြီး ဖုန်းအသုံးပြုခွင့် ပိတ်ပင်ထားကြောင်း စုံစမ်းသိရသည်။
ပြီးခဲ့သည့် ဧပြီလ (၁၅) ရက်မှစပြီး ရွာငံမြို့နယ် လင်းဝေးကျေးရွာအုပ်စု ပါယ်ကင်း၊ သဖန်းပင်နှင့် ကျောက်တော ကျေးရွာဘက်သို့ စစ်ကောင်စီတပ် အင်အား (၁၀၀)ကျော်ဖြင့် စစ်ကြောင်း ထိုးနေကာ ကျေးရွာအတွင်းရှိ ဒေသခံပြည်သူများကို ဖုန်းပြောခြင်း၊ အင်တာနက်လိုင်းများ အသုံးပြုခြင်း စသည်တို့ကို ကန့်သတ်ထားသည်ဟု ဒေသခံများက ပြောသည်။
“ရွာနားက တောတောင်ဘက်တွေမှာ စစ်သားတွေ စစ်ကြောင်းထိုးနေတယ်။ လက်ဖက်ခူးလည်း သွားလို့မရဘူး။ သူတို့ တစ်ရွာဝင်ပြီဆို အဲ့ရွာကို ဖုန်းလိုင်း ဖြတ်တယ်၊ ဖုန်းသုံးလို့ မရဘူး။ စစ်သားတွေ နောက်တစ်ရွာပြောင်းမှ ဖုန်းသုံးလို့ရတယ်။ တောထူတဲ့ ဘက်တွေကို လက်နက်ကြီးတွေ၊ သေနတ်တွေနဲ့ ပစ်နေတာပဲ” ဟု ရွာငံဒေသခံ အမျိုးသမီး တစ်ဦးက သျှမ်းသံတော်ဆင့်ကို ပြောသည်။
ထို့အပြင် စစ်ကြောင်းထိုးလာသည့် စစ်ကောင်စီတပ်သားများ ချောဆွဲလာသည့် ကားများကို မူလပိုင်ရှင်ထံ ပြန်မပေးပဲ ရောက်သည့်နေရာတွင် ပစ်ထားခဲ့ကြသည်ဟု အသက် (၅၀)ကျော်အရွယ် အမျိုးသားတစ်ဦးက ပြောသည်။
“ကျနော်တို့ ရွာက စာသင်ကျောင်းမှာလည်း စစ်သားတွေ တပ်လာစွဲသွားတယ်။ သူတို့တပ်စွဲပြီး နောက်ရက်ကို အရှေ့ရွာဘက်ကို စစ်သားတွေ အုပ်လိုက် သွားခဲ့ကြတယ်။ ဘယ်က ချောဆွဲလာတဲ့ ကားတွေလည်းတော့ မသိဘူး၊ ကားသုံးစီးလောက် ကျနော်တို့ရွာမှာ ပစ်ထားခဲ့တယ်။ အရင်က ကျနော်တို့ ရွာက ကားတွေလည်း ယူသွားတာ ခုထိပြန်မရသေးဘူး” ဟု အဆိုပါ အမျိုးသား တစ်ဦးက ပြောသည်။
ဆက်လက်ပြီး ရွာငံမြို့နယ် သဖန်းပင်ကျေးရွာရှိ ဒေသခံ (၄)ဦးကို အမည်မသိ လက်နက်ကိုင် အဖွဲ့မှ လာရောက် ပစ်သတ်သွားခဲ့ပြီးနောက် ယခုကဲ့သို့ စစ်ကောင်စီတပ်သားများ မကြာခဏ စစ်ကြောင်းထိုးနေသည်ဟု ကျေးရွာ ဒေသခံများထံမှ သိရသည်။
“ဧပြီလ (၁၂) ရက်နေ့တုန်းက သဖန်းပင်ရွာမှာ ပျူစောထီး (၃)ဦးနဲ့ (၈)တန်း ဖြေထားတဲ့ ကလေး တစ်ဦး စုစုပေါင်း (၄)ဦး အသတ်ခံရတယ်။ အဲ့နေ့တုန်းက မနက်(၁)နာရီ ဝန်းကျင်လောက်မှာ အိမ်(၃)အိမ်ကို ဝင်ပြီး တခါတည်း သတ်သွားတယ်၊ (၈)တန်း ဖြေထားတဲ့ ကလေးပါ အသတ်ခံလိုက်ရတယ်။ ဘယ်အဖွဲ့က လာသတ်တာလည်းတော့ မသိဘူး” ဟု ဖြစ်စဉ်သိရှိသူ အသက် (၃၀) အရွယ် အမျိုးသမီး တစ်ဦးက ပြောသည်။
ပြီးခဲ့သည့် ၂၀၂၄ ခုနှစ် အောက်တိုဘာလ (၁၂) ရက်နေ့တွင်လည်း ရွာငံမြို့နယ် သိမ်ကုန်းကျေးရွာတွင် စစ်ကောင်စီခန့် အုပ်ချုပ်ရေးမှူးနှင့် ၎င်း၏ဇနီးတို့ကို အမည်မသိ လက်နက်ကိုင်အဖွဲ့မှ ပစ်သတ်သွားခဲ့သည်။
အလားတူ ယမန်နှစ် နိုဝင်ဘာလ (၂၆) ရက်နေ့တွင်လည်း ရွာငံမြို့နယ် ဘုရားကြီးကုန်း ကျေးရွာ၌ စစ်ကောင်စီခန့် အုပ်ချုပ်ရေးမှူးနှင့် အရပ်သားတစ်ဦးတို့ သေနတ်ပစ်သတ်ခံခဲ့ရပြီး သေဆုံးသွားခဲ့သည်ဟု ဒေသခံများက ပြောသည်။
လက်ရှိ ရွာငံမြို့နယ်တွင် စစ်ကောင်စီတပ်သားများ နယ်မြေစိုးမိုးထားပြီး ရွာလုံးကျွတ် မီးရှို့ခံထားရသည့် မင်းပလောင်ကျေးရွာတွင်လည်း စားနပ်ရိက္ခာ ပြတ်လပ်မှုများ ကြုံနေရကာ အကူအညီ လိုအပ်နေကြသည်ဟု သိရသည်။
Leave a Comments