သျှမ်းပြည်မြောက်ပိုင်း နမ့်ခမ်းမြို့ တွင် သင်္ကြန်အကျနေ့၌ ရွှေလီမြစ်အတွင်း ရေနစ်သေဆုံးသည့်ကလေး ရုပ်အလောင်းအား ၃ ရက်အကြာမှ ရှာဖွေတွေ့ရှိကြသည်ဟု စုံစမ်းသိရှိရသည်။

နမ့်ခမ်းမြို့ရှိ ရွှေလီမြစ်ထဲတွင် ရေဆော့ကစားရင်း ရေနစ်ပျောက်ဆုံးသွားသော အသက် ၁၅ နှစ်အရွယ် မိုင်းနိုင် ထက်၏ ရုပ်အလောင်းကို ယမန်နေ့ ဧပြီ ၁၇ ရက်နေ့ ညနေပိုင်းတွင် ပြန်လည်တွေ့ရှိကြောင်း ပါဝင်ကူညီပေးနေ သည့် အမည်မဖေါ်လိုသူ ပရဟိတအဖွဲ့ ဝင်တစ်ဦးက သျှမ်းသံတော်ဆင့်ကိုပြောသည်။

“သင်္ကြန်အကျနေ့တုံး ဟိုဆိုင်းချောင်းသာမှာ ရေနစ်သွားတဲ့ ကလေးရဲ့ရုပ်အလောင်းကိုသွားယူတာပေါ့၊ မနေ့ညနေလောက် ရွာခံတွေဖုန်းဆက်လာလို့ သွားယူပေးရတာ၊ နောင်မရွာနဲ့မန့်ဆွမ်းရွာ ကူးတို့ဆိပ်နားလေးမှာ ပြန်တွေ့တာ” ဟု ထိုအမျိုးသားက ပြောသည်။

ထိုနေရာသို့ စေတနာမွန်လူမှုကူညီရေး၊ နမ့်ခမ်းသွေးလှူရှင်အသင်း၊ NMBG ပရဟိတ လူမှုကူညီရေးအသင်းနှင့် ဂရုဏာ ပရဟိတအသင်း တို့ပူးပေါင်းပြီး အလောင်းကို ရွှေလီမြစ်ထဲမှ ဆယ်ထုတ်ပေးခဲ့ကြောင်း စုံစမ်းသိရ သည်။

သေဆုံးသူသည် ပြီးခဲ့သည့် ဧပြီလ ၁၄ ရက် ညနေပိုင်းအချိန်တွင် နမ့်ခမ်းမြို့နယ် ဟိုဆိုင်းကျေးရွာရှိ ရွှေလီမြစ် ထဲတွင်ရေဆော့ကစားရင်း ရေနစ်ပျောက်ဆုံးခဲ့ခြင်းဖြစ်ပြီး ယမန်နေ့ ဧပြီ ၁၇ ရက်နေ့မှသာ ပုပ်ပွသည့် အနေ အထား ဖြင့်ပြန်လည်တွေ့ရှိခဲ့ခြင်းဖြစ်သည်။

နမ့်ခမ်းမြို့ရှိ ရွှေလီမြစ်တစ်လျှောက်တွင် ပြည်သူများ နှစ်စဉ်နှစ်တိုင်း သင်္ကြန်ကာလ အပန်းဖြေကြသည့် နေရာဖြစ်ပြီး ရေနစ်သေဆုံးမှုလည်း မကြာခဏဖြစ်ပွားလေ့ရှိသည်ဟု နမ့်ခမ်းဒေသခံများက ပြောသည်။

အလုပ်သင် သတင်းထောက် စိုင်းဟန်မော(ဝ်) ရေးသားသည်။