အာဆီယံအလှည့်ကျဥက္ကဋ္ဌ တာဝန်ယူထားသည့် မလေးရှားနိုင်ငံ ဝန်ကြီးချုပ်နှင့် စစ်ခေါင်းဆောင် မင်းအောင်လှိုင် တို့သည် လာမည့် ဧပြီလ ၁၇ ရက်တွင် ထိုင်းနိုင်ငံ ဘန်ကောက်မြို့၌ တွေ့ဆုံသွားမည်ဖြစ်ကြောင်း ကြေညာလိုက်သည်။

လက်ရှိ ၂၀၂၅ ခုနှစ် အာဆီယံအလှည့်ကျဥက္ကဋ္ဌဖြစ်သည့် မလေးရှားနိုင်ငံ ဝန်ကြီးချုပ် အန်ဝါ အီဘရာဟင်သည် မြန်မာနိုင်ငံတွင် လှုပ်ခတ်ခဲ့သည့် ငလျင်ဘေးကို အကြောင်းပြု၍ ကူညီကယ်ဆယ်ရေး လုပ်ငန်းများအပြင် အပစ်အခတ်ရပ်စဲရေး ကိစ္စများကို တွန်းအားပေးရန် စစ်ခေါင်းဆောင် မင်းအောင်လှိုင်နှင့် ဧပြီလ ၁၇ ရက်နေ့တွင် ဘန်ကောက်မြို့၌ တွေ့ဆုံဆွေးနွေးသွားမည်ဖြစ်ကြောင်း မလေးရှားနိုင်ငံမှ သတင်းဌာနများတွင် ဖော်ပြသည်။

အဆိုပါ တွေ့ဆုံပွဲသို့ စစ်ခေါင်းဆောင် တက်ရောက်ဖြစ်ပါက စစ်အာဏာသိမ်းပြီးနောက် လေးနှစ်အတွင်း ဒုတိယအကြိမ်အဖြစ် အာဆီယံခေါင်းဆောင်များနှင့် တွေ့ဆုံခြင်း ဖြစ်လာပြီး မလေးရှားဝန်ကြီးချုပ်အပြင် ထိုင်းဝန်ကြီးချုပ် ပေထုန်တန် ရှင်နာဝပ်နှင့် အခြားသော အာဆီယံနိုင်ငံများမှ ဝန်ကြီးအဆင့် တာဝန်ရှိသူများလည်း တက်ရောက်မည်ဟု မလေးရှားနိုင်ငံ သတင်းဌာနများက ရေးသားသည်။

ပြီးခဲ့သည့် ဧပြီလ ၅ ရက်နေ့တွင် ထိုင်းနိုင်ငံ ဘန်ကောက်မြို့မှ ဘင်းမ်စတက် ထိပ်သီးအစည်းအဝေး တက်ရောက်ခဲ့သည့် စစ်ခေါင်းဆောင် မင်းအောင်လှိုင်ကို ထိုင်းနိုင်ငံခြားရေးဝန်ကြီးနှင့် လက်ရှိအာဆီယံဥက္ကဋ္ဌ၏ မြန်မာနိုင်ငံဆိုင်ရာ အထူးကိုယ်စားလှယ်ဖြစ်သည့် မလေးရှား နိုင်ငံခြားရေးဝန်ကြီးတို့ နေပြည်တော်အထိ လာရောက်တွေ့ဆုံခဲ့ပြီးနောက် ယခုခရီးစဉ် ထွက်ပေါ်လာခြင်းဖြစ်သည်။

ထိုစဉ်က ငလျင်ဒဏ်သင့် ဒေသများတွင် အာဆီယံအဖွဲ့ဝင်နိုင်ငံများမှ ရွေ့လျားဆေးရုံ တည်ဆောက်ရေး အပါအဝင် ကူညီကယ်ဆယ်ရေးလုပ်ငန်းများ ဆောင်ရွက်ရန် ဆွေးနွေးခဲ့ကြကြောင်း စစ်ကောင်စီဘက်မှ ထုတ်ပြန်ခဲ့သည်။

ထို့အပြင် ဧပြီလ ပထမပတ်အတွင်း ထိုင်းနိုင်ငံ ဘန်ကောက်မြို့၌ ထိုင်းဝန်ကြီးချုပ်ဟောင်း သက်ဆင် ရှင်နာဝပ်နှင့် စစ်ခေါင်းဆောင်တို့ သီးသန့်တွေ့ဆုံခဲ့စဉ် မြန်မာနိုင်ငံ ငြိမ်းချမ်းရေး လုပ်ငန်းစဉ်အတွက် နိုင်ငံရေးအရ ဆွေးနွေးကြရန် တိုက်တွန်းခဲ့ကြောင်း သက်ဆင်က ထိုင်းမီဒီယာများကို ဖြေကြားထားသည်။

ထိုင်းဝန်ကြီးချုပ်ဟောင်း သက်ဆင် ရှင်နာဝပ်သည် လက်ရှိ အာဆီယံဥက္ကဋ္ဌ မလေးရှားဝန်ကြီးချုပ်၏ အထူးအကြံပေးပုဂ္ဂိုလ်အဖြစ် ခန့်အပ်ခံထားရပြီး လာမည့် ဧပြီလ ၁၇ ရက် စစ်ခေါင်းဆောင်နှင့် ပြုလုပ်မည့် ဆွေးနွေးပွဲသို့ တက်ရောက်နိုင်ခြေရှိကြောင်း နိုင်ငံရေး လေ့လာသုံးသပ်သူများက အကဲခတ် ပြောဆိုထားသည်။

အခြားတစ်ဘက်တွင် ငလျင်ဒဏ်ကြောင့် အပစ်အခတ် ရပ်စဲထားသည်ကို စစ်ကောင်စီဘက်မှ အခွင့်ကောင်းယူပြီး လေကြောင်းတိုက်ခိုက်မှု ဆက်လက်လုပ်ဆောင်နေခြင်းကြောင့် နိုင်ငံတကာမှ စောင့်ကြည့်ရေးယန္တရား ထူထောင်ပေးရန် NUG နိုင်ငံခြားရေးဝန်ကြီး ဒေါ်ဇင်မာအောင်မှ တိုက်တွန်းတောင်းဆိုထားသည်။

ပုံစာ – လက်ရှိ အာဆီယံဥက္ကဋ္ဌ မလေးရှား ဝန်ကြီးချုပ်နှင့် ထိုင်းဝန်ကြီးချုပ်ဟောင်း သက်ဆင်